កងទ័ពដាក់ពង្រាយទ័ពនៅMeiktila ដែលស្ថិតក្នុងការប្រកាសភាពអាសន្ន
នៅថ្ងៃសៅរ៍២៣មីនានេះទាហានភូមា បានប្រតិបត្តិការយាមល្បាតគ្រប់ទិសទីក្នុងក្រុងMeiktila ដែលស្ថិតក្រោមការប្រកាសភាពអាសន្ន ក្រោយពីមានអំពើហិង្សាដ៏កាចសាហាវអស់៣ថ្ងៃជាប់ៗគ្នានិង បណ្តាលឲ្យមនុស្សស្លាប់អស់ជាច្រើននាក់។ មិនតែប៉ុណ្ណោះ វិហារអ៊ីស្លាមជាច្រើនកន្លែង ត្រូវវិនាសអន្តរាយគ្មានសល់ដោយអគ្គីភ័យបង្កដោយពួកបះបោរជាច្រើនក្រុមប្រដាប់ដោយកាំបិតនិងដំបងដែលចូលលុកលុយនិងប្លន់ក្នុងសង្កាត់នានានៃក្រុង Meiktila កាលពីម្សិលមិញ។
ចុះផ្សាយនៅថ្ងៃ៖
ស្តាប់ - ០២:៥៦
កាម៉្ញុងយោធា ប្រមាណ៥០គ្រឿង ត្រូវបានបញ្ជូនជាបន្ទាន់ទៅកាន់ទីប្រជុំជន តូចMeiktila ដែលស្ថិតនៅចម្ងាយ១៣០គ.ម.ពីរដ្ឋធានីNaypyidaw ។ នៅ Meiktila នេះហើយ ដែលពួកបះបោរប្រដាប់ដោយកាំបិតនិងដំបង បានចូលលុកលុយនិងលួចប្លន់តាមអំពើចិត្ត។ សង្កាត់ទាំងអស់ក្នុងក្រុងនិងវិហារអ៊ីស្ថាមជាច្រើនកន្លែង ត្រូវអន្តរាយដោយអគ្គីភ័យ ហើយគេឃើញសាកសព ឆេះខ្លោចនៅស្តូកស្តឹងលើផ្លូវ។ រហូតមកដល់យប់ថ្ងៃសុក្រម្សិលមិញ កងរក្សាសណ្តាប់ធ្នាប់ ហាក់ដូចជាហួសសមត្ថភាពខ្លួន ប្រឈមមុខនឹងផលវិបាកដ៏ធ្ងន់ធ្ងរ ដែលបន្សល់ទុកដោយឧប្បត្តិហេតុហិង្សា។
ឧប្បត្តិហេតុហិង្សា ទាំងនេះ សរបញ្ជាក់ផងដែរ ពីការរីករាលដាលយ៉ាងខ្លាំងនៃភាពតានតឹងរវាងសហគមន៍អ្នកកាន់សាសនាអ៊ីស្លាមនិងសហគមន៍អ្នកកាន់ព្រះពុទ្ធសាសនា និង ចោទជាបញ្ហាដ៏ចម្បងមួយដែរសំរាប់រដ្ឋាភិបាលថ្មីភូមា ដែលជាអ្នកកំណែទម្រង់។
ស្របគ្នានេះ ទីកន្លែងសំរាប់ធ្វើកីឡាមួយនៅក្នុងក្រុង ត្រូវបានគេយកមកធ្វើជាកន្លែងទុកសម្រាប់ទទួលប្រជាជនកាន់សាសនាអ៊ីស្លាម ចំនួន ២ ទៅ៣០០០នាក់ដែលបានភៀសខ្លួនដើម្បីគេចពី អំពើហិង្សា។ អ្នកដឹកនាំសាសនាអ៊ីស្លាមម្នាក់អាយុ២៧ឆ្នាំ ដែលរស់នៅក្នុងក្រុងMeiktilaតាំងពីវ័យកុមារ បានប្រាប់ដល់ទីភ្នាក់ងារព័ត៌មាន AFP ថា ក្រុមព្រះសង្ឃពុទ្ធសាសនានិងប្រជាជនរស់នៅក្នុងក្រុង មួយចំនួន បានជួយជ្រោមជ្រែងគាត់ក្នុងការរត់ភៀសចេញពីផ្ទះរបស់គាត់ដោយគ្មានយកបានអ្វីទាំងអស់។ គាត់បានសារភាពទៀតថា “គាត់បានរស់នៅជាយូរឆ្នាំមកហើយជាមួយប្រជាជនអ្នកកាន់សាសនាព្រះពុទ្ធសាសនា ហើយក៏ពុំយល់ទាល់តែសោះ ថាតើហេតុអ្វី បានជាកើតការវាយប្រហារដោយការស្អប់គំគួនគ្នាយ៉ាងដូច្នេះ -ដែលធ្វើឲ្យគាត់ភ័យស្លុតយ៉ាងខ្លាំងក្លា។
កាលពីម្សិលមិញ អ្នកកាសែតមួយក្រុម ដែលធ្វើការឲ្យសារព័ត៌មានបរទេសនិងភូមា ត្រូវបានព្រះសង្ឃពុទ្ធសាសនានិងពួកយុវជនប្រដាប់ដោយកាំបិតនិងដំបង គំរាមកំហែងដកហូត យក រូបថតទាំងអស់ ពី memory card របស់ពួកគេ។ តែអ្នកកាសែតខ្លះ ត្រូវបានកងរក្សាសន្តិសុខ ភូមា ជួយជម្លៀសចេញពីតំបន់កើតហេតុ និងបាន រួចផុតពីការឆែកឆេរពីសំណាក់ពួកបះបោរដែរ។
អាជ្ញាធរភូមា បានចាត់តាំង គណកម្មការអង្កេតមួយ ដើម្បី ស្រាវជ្រាវនិងកំណត់ឲ្យបានច្បាស់លាស់ ពីមូលហេតុដែលបានបណ្តាលឲ្យមានអំពើហិង្សាដ៏កាចសាហាវបែបនេះកើតឡើង នៅក្នុងក្រុងមួយដែលធ្លាប់តែបានទទួលសេចក្តីសុខសាន្តជានិច្ច។
គួរបញ្ជាក់ថា ប្រជាជនកាន់សាសនាអ៊ីស្លាម ជាផ្លូវការ មានចំនួន៣% នៃប្រជាជនភូមាសរុប៦០លាននាក់ ។ ក៏ប៉ុន្តែ តាំងពី៣០ឆ្នាំមកហើយ អាជ្ញាធរភូមាពុំដែលធ្វើការជំរឿនអ្វីទៀតឡើយ ហើយភាគច្រើន ប្រជាជនអ៊ីស្លាមនេះ មានដើមកំណើតឥណ្ឌា ចិនឬ ក៏បង់ក្លាដែស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ