អំពើហិង្សាដ៏ពុះកញ្ជ្រោលរវាងសហគមន៍ពុទ្ធសាសនានិងអ៊ីស្លាមនៅភូមា
ជម្លោះរវាងសហគមន៍អ្នកកាន់សាសនាព្រះពុទ្ធនិងសហគមន៍អ្នកកាន់សាសនាអ៊ីស្លាម កាន់តែរីករាលដាលនិងមានលក្ខណៈយ៉ាងកាចសាហាវ។ នៅព្រឹកមិញអំពើហិង្សាប្រឈមមុខគ្នារវាងសហគមន៍សាសនាទាំងពីរនេះ បានផ្ទុះឡើងជាថ្មីទៀត និងបានបណ្តាលឲ្យមនុស្សស្លាប់យ៉ាងតិច១០នាក់ នៅកណ្តាលប្រទេសភូមា។ អំពើហិង្សានេះ- បានចាប់ផ្ទុះឡើងក្រោយពីមានការឈ្លោះប្រកែកទាស់ទែងគ្នានៅផ្សារមួយកាលពីថ្ងៃពុធម្សិលមិញរវាងអ្នកលក់ជាអ្នកកាន់សាសនាអ៊ីស្លាមនិងក្រុមអ្នកទិញកាន់ព្រះពុទ្ធសាសនា-នេះបើយោងតាមអ្នកតំណាងរាស្រ្តម្នាក់នៃគណបក្សប្រឆាំងនៅក្រុង Meiktila។
ចុះផ្សាយនៅថ្ងៃ៖
ស្តាប់ - ០២:៤៣
នៅថ្ងៃពុធម្សិលមិញក្រោយពីមានអំពើហិង្សាឈ្លោះប្រកែកទាស់ទែងគ្នាយ៉ាងខ្លាំងក្លាមួយនៅផ្សាររវាងអ្នកលក់ជាអ្នកកាន់សាសនាអ៊ីស្លាមនិងក្រុមអ្នកទិញជាអ្នកកាន់ព្រះពុទ្ធសាសនា អាជ្ញាធរភូមា បានសម្រេចចិត្តដាក់បំរាមគោចរជាបន្ទាន់ភ្លាមនៅក្រុង Meiktila ដែលស្ថិតនៅជិត តំបន់ Mandalay។
មន្ត្រីនគរបាលភូមាម្នាក់ បានថ្លែងប្រាប់ដល់ទីភ្នាក់ងារព័ត៌មានបារាំង AFP ថា « ការដាក់បម្រាមគោចរដែលនៅតែបន្តជាធរមាន ចាប់ពីតាំងពីម៉ោង២០ យប់រហូតដល់ម៉ោង៥ព្រឹកនេះ គឺដោយហេតុតែស្ថានការណ៍នៅក្នុងតំបន់ ធ្លាក់ចុះដុនដាបនិងនៅពុំទាន់មានភាពប្រក្រតីនៅឡើយទេ។
អំពើហិង្សាម្សិលមិញនេះ បានសម្លាប់មនុស្សពីរនាក់ក្នុងនោះក៏មានព្រះសង្ឃមួយអង្គដែរ និងបានបណ្តាលឲ្យវិហារសាសនាអ៊ីស្លាម៣កន្លែងត្រូវវិនាសអន្តរាយ។ គេនៅតែពុំទាន់មានតួលេខជាផ្លូវការណ៍ណាមួយនៅឡើយទេនៅថ្ងៃព្រហស្បតិ៍២១មីនានេះ។ លោក Win Htein អ្នកតំណាងរាស្ត្រនៃបក្សប្រឆាំងភូមារបស់លោកស្រីស៊ូជី បានថ្លែងបញ្ជាក់ថា គឺជាភាពតានតឹងមួយរវាងសហគមន៍សាសនានៅក្រុង Meiktila នេះ ដែលមានប្រជាជនរស់នៅចំនួន៨ម៉ឺននាក់ក្នុងនោះ៣ម៉ឺននាក់ ជាអ្នកកាន់សាសនាអ៊ីស្លាមនិងបានរួមរស់ជាមួយគ្នាដោយសុខសាន្តមកទល់ពេលនេះ។
ឧប្បត្តិហេតុទាំងនេះ បានប្រព្រឹត្តទៅនៅក្នុងប្រទេសមួយដែលទំនាក់ទំនងរវាងសហគមន៍ពុទ្ធសាសនានិងសហគមន៍អ៊ីស្លាម កំពុងតែមានភាពតានតឹងយ៉ាងខ្លាំងក្នុងរយៈពេលប៉ុន្មានខែចុងក្រោយនេះ។ ដោយអំពើហិង្សាដ៏សែនសាហាវ ២លើករវាងសហគមន៍ពុទ្ធសាសនានៅរដ្ឋរ៉ាគីននិងសហគមន៍សាសនាអ៊ីស្លាមដែលជាជនជាតិភាគតិច Rohingyas បានបណ្តាលឲ្យមនុស្សស្លាប់យ៉ាងតិច ១៨០នាក់និងមានជនភៀសខ្លួនជាង ១១ម៉ឺន៥០០០នាក់នៅឆ្នាំ២០១២ក្នុងរដ្ឋរ៉ាគីននៅភាគខាងលិចប្រទេសភូមា។
សូមបញ្ជាក់ថា ជនភៀសខ្លួនតាមទូក រ៉ូហីងយ៉ា ទាំងហ្វូងៗ បាននាំគ្នាចូលមកតាំងទីលំនៅក្នុងប្រទេសភូមាដែលជាប្រទេសមួយ ចាត់ទុកព្រះពុទ្ធសាសនាជាវប្បធម៌ជាតិរបស់ខ្លួន។
ម្យ៉ាងទៀត រដ្ឋរ៉ាគីន មិនដែលទទួលស្គាល់ជនភាគតិចរ៉ូហីងយ៉ាឡើយ ដែលមានគ្នា ៨០ ម៉ឺននាក់រស់នៅផ្តុំគ្នាយ៉ាងណែនណាន់តាន់តាប់នៅរដ្ឋរ៉ាគីន។ ជំនាន់របបសឹកភូមា ជនភាគតិចរ៉ូហីងយ៉ា ត្រូវបានបង្ក្រាបអស់រយៈពេលជាច្រើនទស្សវត្តន៍និងឥឡូវនេះ នៅតែត្រូវបានប្រជាជនភូមាភាគច្រើននៅក្នុងប្រទេស ចាត់ទុក ជាជនអន្តោប្រវេស្តន៍ខុសច្បាប់ដដែល។
ប្រជាជនភូមា ដែលសុទ្ធសឹងតែជាអ្នកកាន់ព្រះពុទ្ធសាសនា មិនដែលលាក់លាមអ្វី ឡើយ នូវកំហឹងគំគួនខ្លាំងរបស់ខ្លួនទៅលើសហគមន៍រ៉ូហីងយ៉ានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ