លោកអូបាម៉ាព្រមានក្រុមឧទ្ទាមស៊ូដង់ខាងត្បូង បន្ទាប់ពីទាហានអាមេរិកាំង៤រូបរងរបួស
យោងតាមសារព័ត៌មានបារាំងអាអេហ្វប៉េ នៅថ្ងៃអាទិត្យនេះ ប្រធានាធិបតីអាមេរិក បារ៉ាក់ អូបាម៉ា បានធ្វើការព្រមានទៅក្រុមឧទ្ទាមនៅប្រទេសស៊ូដង់ខាងត្បូងថា ប្រសិនមានករណីប្រើកម្លាំងបាយដណ្តើមយកអំណាចមកកាន់កាប់ នោះអាមេរិកនឹងឈប់គាំទ្រប្រទេសស៊ូដង់ខាងត្បូងដែលទើបបានទទួលឯករាជ្យកាលពីឆ្នាំ២០១១ តទៅទៀតហើយ។ លោកអូបាម៉ាព្រមានបែបនេះ បន្ទាប់ពីពេលដែលទាហានអាមេរិកកាំង៤នាក់ បានរងរបួស នៅស៊ូដង់ខាងត្បូង កាលពីថ្ងៃសៅរ៍ នៅពេលដែលពួកគេព្យាយាមចុះចតយន្តហោះដើម្បីជម្លៀសពលរដ្ឋអាមេរិកនៅទីនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ប្រធានាធិបតីអាមេរិក បារ៉ាក់ អូបាម៉ា បានធ្វើការព្រមានទៅក្រុមឧទ្ទាមដែលគាំទ្រអតីតប្រធានាធិបតី រៀក ម៉ាស្ហារ នៅប្រទេសស៊ូដង់ខាងត្បូងថា ប្រសិនក្រុមឧទ្ទាមប្រើកម្លាំងបាយដណ្តើមមកអំណាចមកកាន់កាប់ នោះអាមេរិកនឹងឈប់គាំទ្រស៊ូដង់ខាងត្បូងដែលជាប្រទេសឯករាជ្យក្មេងខ្ចីនេះ តទៅទៀតហើយ។
លោកអូបាម៉ាព្រមានបែបនេះ បន្ទាប់ពីពេលដែលយន្តហោះអាមេរិកបីគ្រឿង បានរងការបាញ់ប្រហារ កាលពីថ្ងៃសៅរ៍ នៅជិតក្រុងបរ ដែលមានចំងាយប្រមាណ២០០គីឡូម៉ែត្រពីរដ្ឋធានី ជូបា។ យន្តហោះទាំងនេះបានព្យាយាមចុះចតនៅទីនោះ ដើម្បីជម្លៀសពលរដ្ឋអាមេរិក។ ទាហានអាមេរិកាំង៤នាក់ក្នុងយន្តហោះទាំងនេះ បានរងរបួសដោយសារការបាញ់នោះ។
ប្រមុខការទូតអាមេរិក ចន ឃែររី ក៏បានព្រមានប្រធានាធិបតីស៊ូដង់ខាងត្បូង គឺលោក សាល់វ៉ា កៀ ដែរថា ការបន្តការប្រយុទ្ធជាមួយក្រុមឧទ្ទាមអាចនឹងធ្វើអោយមហន្តរាយដល់ឯករាជ្យភាពរបស់ស៊ូដង់ខាងត្បូង ដែលទើបទទួលបានកាលពីឆ្នាំ២០១១នោះ។
តាំងពីថ្ងៃ១៥ធ្នូមក កងទ័ពរដ្ឋាភិបាលបានប្រយុទ្ធគ្នាជាប្រចាំ ជាមួយនឹងក្រុមឧទ្ទាមដែលគាំទ្រអតីតប្រធានាធិបតីរៀក ម៉ាស្ហារ។ កាលពីខៃកក្កដា ប្រធានាធិបតីសាល់វ៉ា កៀ បានទំលាក់អតីតប្រធានាធិបតីម៉ាស្ហារនេះចេញពីតំណែង។ គិតត្រឹមតែក្នុងរដ្ឋធានីជូបាមួយ ការប្រយុទ្ធរវាងកងទ័ពរដ្ឋាភិបាលនិងក្រុមឧទ្ទាមបានធ្វើអោយមានមនុស្សស្លាប់យ៉ាងហោចណាស់ ៥០០នាក់។ ទោះជានៅតែមានការប្រយុទ្ធជាប្រចាំក្តី មេបញ្ជាការកងទ័ពស៊ូដង់ខាងត្បូង បានប្រកាសថា ប្រទេសជាតិមិនទាន់ធ្លាក់ក្នុងសង្គ្រាមស៊ីវិលនៅឡើយទេ។
អង្គការសហប្រជាជាតិបានអំពាវនាវអោយភាគីប្រឆាំងទាំងពីរចរចាគ្នារកដំណោះស្រាយ។ ប្រធានាធិបតីកៀ បានសន្យាថា នឹងចចាជាមួយ អតីតប្រធានាធិបតីម៉ាស្ហារ ដោយគ្មានលក្ខខណ្ឌអ្វីទាំងអស់។
នៅថ្ងៃអាទិត្យនេះ អាមេរិកនិងនីហ្សេរីយ៉ាបានបញ្ជូនបេសកជនរបស់ខ្លួន ទៅរដ្ឋធានីជូបា ដើម្បីពង្រឹងកិច្ចប្រឹងប្រែងការទូតអន្តរជាតិ ក្នុងទិសដៅចៀសវាងមិនអោយសង្គ្រាមស៊ីវិលបែកធ្លាយពេញក្នុងទឹកដីស៊ូដង់ខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ