ប្រជាជនសហគមន៍ផ្លូវរថភ្លើងខកចិត្តនឹង ADBដែលមានចំលើយដដែល
ប្រជាពលរដ្ឋ សហគមន៍នានា ដែលរស់នៅតាមបណ្តោយផ្លូវរថភ្លើងក្នុងរាជធានីភ្នំពេញ បានឡើងទៅតវ៉ាជាលើកទីបីនៅមុខការិយាល័យ ADBប្រចាំប្រទេសកម្ពុជា ក៏ប៉ុន្តែមិនមានការឆ្លើយតបអ្វីជឿនលឿនជាងលើកមុនៗនៅឡើយ។ ក្រុមប្រជាពលរដ្ឋចង់ឲ្យ ADBបញ្ជាក់ឲ្យបានច្បាស់ពីការអភិវឌ្ឍន៍គម្រោងផ្លូវរថភ្លើងដែលគាំទ្រហិរញ្ញវត្ថុដោយធនាគារនេះ ហើយប៉ះពាល់តំបន់របស់ពួកគេរស់នៅ និងសំណងអាចទទួលយកបានប្រសិនបើមានការបណ្តេញចេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ប្រជាពលរដ្ឋដែលរស់នៅតាមបណ្តោយផ្លូវរថភ្លើងជាង១០០នាក់ រួមមាន៨សហគមន៍ នៅព្រឹកថ្ងៃចន្ទទី ២០តុលានេះ បានដើរក្បួនតាមផ្លូវ ហើយប្រមូលផ្តុំគ្នានៅខាងមុខទីស្នាក់ការធនាគាអភិវឌ្ឍន៍អាស៊ី ADB ប្រចាំប្រទេសកម្ពុជា ដើម្បីស្នើសុំឲ្យអ្នកទទួលខុសត្រូវធនាគារនេះបកស្រាយពីផលប៉ះពាល់នៃគម្រោងស្តារផ្លូវរថភ្លើងជាសាធារណៈនិងមានការសម្របសម្រួល ឲ្យមានការជួបប្រជុំ ត្រីភាគី ដែលមានខាងរាជរដ្ឋាភិបាល ប្រជាពលរដ្ឋ និងធនាគារអភិវឌ្ឍន៍អាស៊ី ទាក់ទងគំរោងអភិវឌ្ឍន៍ផ្លូវដែក ក្នុងប្រទេសកម្ពុជា ជាពិសេសក្នុងរាជធានីភ្នំពេញ។
អ្នកស្រី មាស ស្រីមុំ តំណាងប្រជាពលរដ្ឋនៃសហគមន៍ដែលរស់នៅបណ្តោយផ្លូវរថភ្លើងថ្លែងថា ពួកគេមានកង្វល់ជាខ្លាំង ចំពោះគំរោងអភិវឌ្ឍន៍ផ្លូវដែក ក្នុងប្រទេសកម្ពុជា ជាពិសេស ក្នុងរាជធានីភ្នំពេញ។ កន្លងមក ប្រជាពលរដ្ឋ បានខិតខំធ្វើសកម្មភាព ជាច្រើនលើក ច្រើនសារ ដើម្បីទាមទារឲ្យ ធនាគារអភិវឌ្ឍន៍អាស៊ី ផ្តល់ព័ត៌មានលំអិត ពីគំរោងអភិវឌ្ឍន៍ផ្លូវដែក នៅកម្ពុជា ជាពិសេស នៅតំបន់ទីក្រុងភ្នំពេញ និងធានាពីសិទ្ធិលំនៅដ្ឋាន របស់ប្រជាពលរដ្ឋ រស់នៅតាមបណ្តោយ ផ្លូវរថភ្លើង។
តំណាងប្រជាពលរដ្ឋ រូបនេះអះអាងថាពួកគេមិនទទួលបានលទ្ធផលអ្វីទេក្នុងការតវ៉ាពេញមួយព្រឹកនេះ ដោយសារតំណាង ADB នៅប្រទេសកម្ពុជានៅតែពោលពាក្យដូចកាលពីពួកគេឡើងទៅតវ៉ាលើកទី១និងលើកទី២ដែរ ថាABD នឹងព្យាយាមសម្របសម្រួលជាមួយរដ្ឋាភិបាលទាក់ទងទៅនឹងការអភិវឌ្ឍន៍គម្រោងផ្លូវដែកដែលមានផលប៉ះពាល់នេះ។
សូមបញ្ជាក់ថាប្រជាពលរដ្ឋនឹងមានផលប៉ះពាល់ច្រើនគ្រួសារ ប្រសិនបើមានការអភិវឌ្ឍន៍នេះតម្រូវឲ្យការតាំងទីលំនៅឃ្លាតឆ្ងាយពីអ័ក្សផ្លូវចំងាយ ២០ម៉ែត្រ។ ជាញឹកញយអាជ្ញាធរពាក់ព័ន្ធនានា ជាពិសេសសាលារាជធានីភ្នំពេញ បានហៅការតាំងទីលំនៅរបស់ប្រជាពលរដ្ឋថា ប៉ះពាលដល់ដីចំណីផ្លូវដែក។ ក៏ប៉ុន្តែក្រុមប្រជាពលរដ្ឋទាំងនោះនៅតែរក្សាការតវ៉ាថា ពួកគេត្រូវបានទទួលស្គាល់ដោយអាជ្ញាធរមូលដ្ឋានខ្លះជាង១០ឆ្នាំ ខ្លះជាង២០ឆ្នាំមកហើយ ចាប់តាំងពីការធ្វើប័ណ្ណបោះឆ្នោតនិងការចេញលិខិតស្នាមផ្លូវការផ្សេៗឲ្យ។
ទោះជាយ៉ាងនេះក្តីក្រុមអ្នកតវ៉ាប្តេជ្ញាថានឹងបង្កើនសកម្មភាពរបស់ពួកគេបន្ថែមទៀត និងតាមទារសំណងផងដែរ ខណៈដែលអាជ្ញាធរនៅតែមើលឃើញថាពួកគេតាំងទីលំនៅខុសច្បាប់ ប្រសិនបើលំនៅឋានទាំងនោះស្ថិតក្រោមកម្រោងដែលប៉ះពាលនៃការអភិវឌ្ឍន៍ផ្លូវដែកកម្ពុជាដែលគាំទ្រហិរញ្ញវត្ថុដោយ ADB៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ