ទស្សនកិច្ចសម្តេចប៉ាបនៅអង់គ្លេសដើម្បីផ្សះផ្សាជម្លោះជិត៥០០ឆ្នាំ
សម្តេចប៉ាប Benoît ទី១៦ បានយាងទៅដល់ប្រទេសអង់គ្លេស កាលពីថ្ងៃព្រហស្បតិ៍ ទី១៦ កញ្ញា ២០១០ ដើម្បីបំពេញទស្សនកិច្ចផ្លូវរដ្ឋជាប្រវត្តិសាស្រ្ត។ នេះ គឺជាទស្សនកិច្ចផ្លូវរដ្ឋជាលើកទី១ ចាប់តាំងពីអង់គ្លេស និងវិហារកាតូលិកបានកាត់ផ្តាច់ទំនាក់ទំនងជាមួយគ្នា កាលពីសតវត្សរ៍ទី១៦មក។
ចុះផ្សាយនៅថ្ងៃ៖
ការពន្យល់របស់សេង ឌីណា
សម្តេចសង្ឃកាតូលិកធ្លាប់បានទៅបំពេញទស្សនកិច្ច នៅរាជាណាចក្រអង់គ្លេសម្តងរួចមកហើយ គឺសម្តេចប៉ាប Jean-Paul ទី២ នៅឆ្នាំ១៩៨២។ ក៏ប៉ុន្តែ ទស្សនកិច្ច កាលពីឆ្នាំ១៩៨២ មិនមែនជាទស្សនកិច្ចផ្លូវរដ្ឋនោះទេ ខុសពីទស្សនកិច្ចរបស់សម្តេចប៉ាប Benoît ទី១៦ នៅពេលនេះ ដែលធ្វើឡើងតាមការអញ្ជើញរបស់ប្រមុខរដ្ឋអង់គ្លេស គឺ ព្រះមហាក្សត្រិយានីអេលីហ្សាបិតទី២។ ដំណើរទស្សនកិច្ចផ្លូវរដ្ឋរបស់ប្រមុខដឹកនាំវិហារកាតូលិក នៅពេលនេះ គឺជានិមិត្តរូបនៃការផ្សះផ្សាជម្លោះជាមួយអង់គ្លេស ដែលបានផ្តាច់ទំនាក់ទំនងជាមួយគ្នា អស់រយៈពេលជិត ៥០០ឆ្នាំមកហើយ។
ប្រជាជន និងស្តេចអង់គ្លេសកាន់សាសនាកាតូលិក ហើយស្ថិតក្រោមអំណាចរបស់សម្តេចប៉ាប នៅក្រុងរ៉ូម រហូតដល់សតវត្សរ៍ទី១៦ ក្រោមរាជរបស់ស្តេច Henry ទី៨ ទើបអង់គ្លេសផ្តាច់ខ្លួនចេញពីវិហារកាតូលិក ហើយងាកទៅបង្កើតនិកាយថ្មីមួយ ឈ្មោះ Anglican ។
ភាពប្រេះឆារវាងអង់គ្លេស និងវិហារកាតូលិក នៅពេលនោះ បណ្តាលមកពីរឿងរ៉ាវច្រើន។ ក៏ប៉ុន្តែ មូលហេតុដ៏ចម្បងបំផុត ដែលនាំរហូតទៅដល់ការផ្តាច់ទំនាក់ទំនងជាមួយគ្នា គឺទំនាស់រវាងស្តេច Henry ទី៨ និងសម្តេចប៉ាប ជុំវិញការលែងលះព្រះមហេសី។
ស្តេច Henry ទី៨ ដែលងប់ស្រឡាញ់ស្រីក្មេងឈ្មោះ Anne Boleyn ចង់លែងលះជាមួយព្រះរាជនី Cathrine ដើម្បីយក Anne Boleyn មកធ្វើជាមហេសីពេញច្បាប់។ ស្តេច Henry ទី៨ ក៏បានស្នើសុំទៅសម្តេចប៉ាប ដើម្បីសុំលែងលះជាមួយ Cathrine ក៏ប៉ុន្តែ សម្តេចប៉ាបបានបដិសេធ។ Henry ទី៨ ក៏បានសម្រេចផ្តាច់ប្រទេសអង់គ្លេស ពីអំណាចរបស់វិហារកាតូលិក ហើយងាកទៅបង្កើតនិកាយ Anglican វិញ។ ទំនាក់ទំនងរវាងរាជាណាចក្រអង់គ្លេស និងវិហារកាតូលិកក៏ត្រូវកាត់ផ្តាច់ចាប់តាំងពីឆ្នាំ១៥៣៤ រហូតមកទល់នឹងពេលបច្ចុប្បន្ននេះ។
ទស្សនកិច្ចផ្លូវរដ្ឋរបស់សម្តេចប៉ាប Benoît ទី១៦ នៅអង់គ្លេស នៅពេលនេះ គឺជាការបង្ហាញអំពីឆន្ទៈរបស់ភាគីទាំងសងខាង ក្នុងការផ្សះផ្សាជម្លោះជិត ៥សតវត្សរ៍កន្លងមកនេះ។ កាលពីម្សិលមិញ ព្រះមហាក្សត្រិយានីអេលីហ្សាបិតទី២ បានយាងដោយផ្ទាល់ ទៅទទួលស្វាគមន៍ដំណើរមកដល់អង់គ្លេសរបស់សម្តេចប៉ាប។ នៅថ្ងៃសុក្រនេះ សម្តេចប៉ាបនឹងជួបជាមួយប្រមុខដឹកនាំវិហារ Anglican របស់អង់គ្លេស និងថ្លែងសុន្ទរកថា នៅមុខសភាទាំងពីររបស់អង់គ្លេស នៅទីក្រុងឡុងដ៍។
ក៏ប៉ុន្តែ ប្រជាជនអង់គ្លេសភាគច្រើន នៅតែមាននិន្នាការប្រឆាំងនឹងវិហារកាតូលិក។ ចលនាប្រឆាំងនឹងវិហារកាតូលិក បានកើតមានកាន់តែខ្លាំង ក្រោយពីមានរឿងរ៉ាវអាស្រូវជុំវិញសង្ឃកាតូលិកចាប់រំលោភកុមារ នៅអៀរឡង់ នាពេលថ្មីៗនេះ។ នៅក្នុងពេលដែលសម្តេចប៉ាប Benoît ទី១៦ កំពុងបំពេញទស្សនកិច្ចនៅអង់គ្លេសនេះ គេក៏ឃើញមានប្រជាជនអង់គ្លេសខ្លះ បាននាំគ្នាចេញធ្វើបាតុកម្មប្រឆាំងនឹងសម្តេចប៉ាបដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ