អ្នកគាំទ្របក្សប្រឆាំងនៅបរទេសបន្តធ្វើបាតុកម្មទាមទារដំណោះស្រាយបោះឆ្នោត
សហគមន៍ខ្មែរនៅប្រទេសបារាំងបាននាំគ្នាធ្វើបាតុកម្ម នៅទីក្រុងប៉ារីស នៅរសៀលថ្ងៃសៅរ៍នេះ ដើម្បីទាមទារឲ្យមានដំណោះស្រាយ ចំពោះភាពមិនប្រក្រតីក្នុងពេលបោះឆ្នោត។ បាតុកម្មពីរទៀតត្រូវបានគ្រោងឡើងជាបន្តបន្ទាប់ នៅថ្ងៃទី ២៦ សីហានេះ នៅពីមុខទីស្នាក់ការអង្គការសហប្រជាជាតិទីក្រុងហ្ស៊ឺណែវ ប្រទេសស្វីស និងនៅថ្ងៃទី ៣០ សីហា នៅពីមុខទីស្នាក់ការសហភាពអឺរ៉ុប នៅទីក្រុងព្រុចសែល ប្រទេសប៊ែលហ្ស៊ិក ដើម្បីទាមទារឲ្យមានគណៈកម្មការឯករាជ្យដោះស្រាយភាពមិនប្រក្រតីនៃការបោះឆ្នោត។ នៅឯក្នុងប្រទេសកម្ពុជាឯណេះវិញ ស្ថានភាពហាក់ដូចជាស្ងប់ស្ងាត់បន្តិច ខណៈដែល គ.ជ.ប គ្រោងបើកកញ្ចប់សុវត្ថិភាព នៅថ្ងៃអាទិត្យស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
មួយថ្ងៃក្រោយពីមានបាតុកម្មរបស់សហគមន៍ខ្មែរ នៅប្រទេសបារាំង កាលពីរសៀលថ្ងៃសៅរ៍ ២៤សីហា មហាបាតុកម្មមួយទៀតរបស់អ្នកគាំទ្រគណបក្សសង្គ្រោះជាតិ នឹងត្រូវរៀបចំឡើងនៅថ្ងៃអាទិត្យទី២៦ សីហានេះ នៅពីមុខទីស្នាក់ការអង្គការសហប្រជាជាតិ ទីក្រុងហ្ស៊ឺណែវ។ អ្នករៀបចំបាតុកម្មកំពុងអំពាវនាវឲ្យមានការចូលរួមឲ្យបានច្រើនកុះករ។ រីឯអ្នកមិនបានចូលរួម ក៏ត្រូវបានគេស្នើសុំឲ្យចុះហត្ថលេខាលើញត្តិមួយផងដែរ។ នេះបើយោងតាមសេចក្តីអំពាវនាវរបស់អ្នករៀបចំបាតុកម្ម ដែលត្រូវបានគេផ្សព្វផ្សាយនៅថ្ងៃសៅរ៍នេះ។
ញត្តិទាំងនោះនឹងត្រូវគេប្រគល់ជូនអគ្គលេខាធិការអង្គការសហប្រជាជាតិ ការិយាល័យឧត្តមស្នងការទទួលបន្ទុកសិទ្ធិមនុស្ស និងអ្នករាយការណ៍ពិសេសនៃអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក សូរីយា ប្រាសាទ ស៊ូប៊ែឌី ផងដែរ។ ញត្តិនោះមានន័យសុំឲ្យអង្គការសហប្រជាជាតិជួយជំរុញឲ្យរដ្ឋាភិបាលកម្ពុជា បង្កើតគណៈកម្មការឯករាជ្យដោះស្រាយភាពមិនប្រក្រតីនៃការបោះឆ្នោត។
ចំណែកឯបាតុកម្មមួយទៀត ត្រូវគេគ្រោងបើកធ្វើនៅថ្ងៃទី៣០ សីហា នៅពីមុខទីស្នាក់ការកណ្តាលសហភាពអឺរ៉ុប នៅទីក្រុងព្រុចសែល។ នៅទីនោះ ក្រុមបាតុករក៏គ្រោងប្រគល់ញត្តិដូចគ្នានេះ ជូនលោកស្រី កាតឺរីន អាស្តុន តំណាងជាន់ខ្ពស់ទទួលបន្ទុកកិច្ចការបរទេស នយោបាយ និងសន្តិសុខសហភាពអឺរ៉ុបផងដែរ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានប្រាប់វិទ្យុបារាំងអន្តរជាតិ នៅថ្ងៃសៅរ៍នេះថា នេះគឺជាបាតុកម្មរបស់សហគមន៍ខ្មែរនៅក្រៅប្រទេស ក្នុងនោះក៏មានអ្នកគាំទ្រគណបក្សសង្គ្រោះជាតិផងដែរ។ ប៉ុន្តែ លោកបានបដិសេធមិនផ្តល់អត្ថាធិប្បាយលម្អិតពីបាតុកម្មនេះទេ ព្រោះជាការរៀបចំរបស់សហគមន៍ខ្មែរនៅក្រៅប្រទេស។
ខណៈដែលអ្នកគាំទ្រគណបក្សសង្គ្រោះជាតិនៅក្រៅប្រទេសកំពុងពុះកញ្ជ្រោល នៅក្នុងស្រុកឯណេះវិញ ស្ថានការណ៍ហាក់ដូចជាបានបស្ងប់ស្ងាត់បន្តិចវិញ បន្ទាប់ពីក្រុមប្រឹក្សាធម្មនុញ្ញបានសម្រេចឲ្យគ.ជ.ប បើកកញ្ចប់សុវត្ថិភាព«ក» មួយចំនួន ដើម្បីផ្ទៀងផ្ទាត់លទ្ធផលបោះឆ្នោត ទៅតាមការទាមទាររបស់បក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ