វិបត្តិសេដ្ឋកិច្ចជាមូលហេតុនៃវិបត្តិផ្លូវចិត្តរបស់បុគ្គលិក
បុគ្គលិកកាន់តែច្រើនកើតជម្ងឺផ្លូវចិត្ត។ វិបត្តិសេដ្ឋកិច្ចពិភពលោក សកលភាវូបនីយកម្ម និងការរៀបចំការងាររបៀបថ្មី កំពុងធ្វើឲ្យសុខភាពផ្លូវចិត្តរបស់បុគ្គលិកបម្រើការងាររដ្ឋ និងឯកជនកាន់តែធ្លាក់ចុះ។ នេះបើតាមរបាយការណ៍ ចេញផ្សាយ ក្នុងសប្តាហ៍នេះ ដោយអង្គការOCDEដែលប្រមូលផ្តុំដោយប្រទេសចំនួន ៣៤ និងធ្វើការផ្តោតទៅលើសហប្រតិបត្តិការ និងអភិវឌ្ឍន៍សេដ្ឋកិច្ច។
ចុះផ្សាយនៅថ្ងៃ៖
ស្តាប់ - ០២:១៩
សព្វថ្ងៃនេះ តើមាននរណាមួយដែលមិនរងផលប៉ះពាល់ពីវិបត្តិសេដ្ឋកិច្ចសកល? ក្នុងបរិបទវិបត្តិសេដ្ឋកិច្ច ការព្រួយបារម្ភពីរឿងបាត់បង់ការងារ និងសម្ពាធការងារ មានកាន់តែច្រើន និងរហូតធ្វើឲ្យបុគ្គលិកបម្រើការងាររងប៉ះពាល់ផ្លូវចិត្ត។ តាមរបាយការណ៍របស់អង្គការ OCDE វិបត្តិផ្លូវចិត្តបានប៉ះពាល់រួចហើយ ដល់បុគ្គលិកជាង២០ភាគរយ ដែលកំពុងបម្រើការ នៅក្នុងប្រទេសអភិវឌ្ឍ និងកំពុងអភិវឌ្ឍ ដែលជាសមាជិករបស់អង្គការ OCDE។ អ្នកសរសេររបាយការណ៍បានទាញសញ្ញាប្រកាសអាសន្នថា គឺអនាគតមិនច្បាស់លាស់ក្នុងការងារ និងសម្ពាធការងារដែលជាមូលហេតុចម្បង ធ្វើឲ្យបុគ្គលិកបម្រើការងារមានជម្ងឺផ្លូវចិត្ត កាន់តែច្រើន នៅថ្ងៃអនាគត។
បើតាមអ្នកសរសេររបាយការណ៍ វិបត្តិផ្លូវចិត្តរបស់បុគ្គលិក ដែលគេរកឃើញបច្ចុប្បន្នសុទ្ធតែបានការបញ្ជាក់ ពីផ្នែកវេជ្ជសាស្រ្ត។ បុគ្គលិកទាំងនោះ ភាគច្រើនមានជម្ងឺធ្លាក់ទឹកចិត្ត ប្រើប្រាស់គ្រឿងញៀន និងគ្រឿងស្រវឹង ហើយបុគ្គលិកដែលរងប៉ះពាល់ផ្លូវចិត្តជាងគេ គឺអ្នកដែលមិនមានកិច្ចសន្យាការងាររយៈពេលវែង។ ការងាររបស់ពួកគេមិនទៀតទាត់ ហើយពួកគេមិនដឹងថា តើនៅពេលណាពួកគេនឹងបាត់បង់វា។ ការខ្វល់ខ្វាយពីរឿងបាត់បង់ការងារ និងដំណឹងកាត់បន្ថយបុគ្គលិកដោយសារវិបត្តិសេដ្ឋកិច្ចកំពុងរួបរឹតអារម្មណ៍បុគ្គលិក និងធ្វើឲ្យពួកគេធ្លាក់ទឹកចិត្ត។
ម្យ៉ាងទៀត របាយការណ៍បង្ហាញថា សម្ពាធការងារនៅក្នុងប្រទេសអឺរ៉ុបបានកើនឡើងខ្លាំង ក្នុងរយៈពេលប៉ុន្មានឆ្នាំចុងក្រោយនេះ។ នៅអង់គ្លេស សម្ពាធការងារបានកើនពី២៥ទៅដល់៤០ភាគរយ ចំណែកក្នុងប្រទេសអេស្ប៉ាញដែលរងគ្រោះដោយវិបត្តិគ្មានការងារ សម្ពាធការងារបានកើនពី២៩ទៅ ៤១ភាគរយ។
ទោះជារបាយការណ៍បង្ហាញថា វិបត្តិផ្លូវចិត្តមិនទាន់មានលក្ខណៈធ្ងន់ធ្ងរ ប៉ុន្តែ បញ្ហាផ្លូវចិត្តរបស់បុគ្គលិក និងអ្នកដែលកំពុងស្វែងរកការងារធ្វើ ប៉ះពាល់ខ្លាំងដល់សេដ្ឋកិច្ចប្រទេស នៅអឺរ៉ុប និងនៅក្នុងប្រទេសកំពុងរីកលូតលាស់ថ្មី ដូចជាចិន និងតួកគីជាដើម។
អ្នកសរសេររបាយការណ៍បង្ហាញថា បុគ្គលិក ទាំងនោះនៅកំពុងបម្រើការងារមែន ប៉ុន្តែ វិបត្តិផ្លូវចិត្តធ្វើឲ្យពួកគេអសកម្មនៅក្នុងការងារ។ ការងារផលិតកម្មថយចុះ ធ្វើឲ្យរោងចក្រ និងសហគ្រាសខាតបង់។ តាមរបាយការណ៍ ការខាតបង់ដោយសារជម្ងឺផ្លូវចិត្តមានទំហំធំធេងដល់បុគ្គល និយោជក និងសង្គម។ វាតំណាងឲ្យ៣ ទៅ ៤ភាគរយនៃផលិតផលក្នុងស្រុកសរុបនៅក្នុងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ