អាមេរិកស្នើឲ្យអឺរ៉ុប អាមេរិកឡាទីន និងអាស៊ីចូលរួមបន្ថែមនៅក្នុងបេសកកម្មរបស់អ.ស.ប.
សហរដ្ឋអាមេរិកបានស្នើឲ្យប្រទេសនៅក្នុងទ្វីបអឺរ៉ុប អាមេរិកឡាទីន និងទ្វីបអាស៊ីចូលរួមឲ្យបានសកម្មថែមទៀតនៅក្នុងបេសកកម្មរក្សាសន្តិភាពរបស់អង្គការសហប្រជាជាតិ។ សំណើនេះត្រូវបានធ្វើឡើងដោយលោកស្រីសាម៉ាន់ថា ផាវ័រ ឯកអគ្គរដ្ឋទូតអាមេរិកប្រចំាអង្គការសហប្រជាជាតិ។ លោកស្រីបានថ្លែងដូចនេះនៅវិទ្យាស្ថានសហគ្រាសអាមេរិកំាងក្នុងទីក្រុងវ៉ាស៊ីនតោន។
ចុះផ្សាយនៅថ្ងៃ៖
ស្តាប់ - ០១:៤៧
អ្វីដែលលោកស្រីសាម៉ាន់ថា ផាវ័រ (Samantha Power) បានកត់សម្គាល់ខ្លំាងនោះគឺថា បណ្តាប្រទេសអភិវឌ្ឍន៍ជាអ្នកដែលបានផ្តល់វិភាគទានកាន់តែច្រើនឡើងៗសម្រាប់បេសកកម្មរក្សាសន្តិភាពរបស់អង្គការសហប្រជាជាតិ រីឯបណ្តាប្រទេសកំពុងអភិវឌ្ឍន៍បានត្រឹមតែបញ្ជូនធនធានមនុស្ស។ លោកស្រីសាម៉ាន់ថាបានយល់ឃើញថា គេមិនអាចបន្តស្ថានភាពរបៀបនេះទៅថ្ងៃខាងមុខបានទៀតទេ ព្រោះវាគ្មានសមភាព។ សម្រាប់លោកស្រីសាម៉ាន់ថា ទង្វើនេះនឹងមិនអាចបង្កើតចេញនូវកម្លំាងរក្សាសន្តិភាពដើម្បីប្រឈមទប់នឹងជម្លោះ និងការពារសន្តិសុខជាតិបានឡើយ។ ទន្ទឹមគ្នានេះ លោកស្រីសាម៉ាន់ថា ក៏បានស្នើឲ្យមានការធ្វើកំណែទម្រង់លើផ្នែកមួយចំនួនរបស់កម្លំាងរក្សាសន្តិភាពដើម្បីអាចឆ្លើយតប ឬមួយក៏តម្រូវទៅតាមស្ថានការណ៍ជាក់ស្តែងដែលពិភពលោកកំពុងប្រឈមមុខសព្វថ្ងៃ។ ផ្នែកដែលត្រូវកែប្រែឲ្យចម្រើនរួមមាន ភាពរហ័សរហួនក្នុងការដាក់ពង្រាយ ឬមួយក៏សមត្ថភាពក្នុងការប្រឈមទប់នឹងសត្រូវ និងការការពារជនស៊ីវិល។
លទ្ធផលនៃការសិក្សាផ្ទៃក្នុងមួយរបស់អង្គការសហប្រជាជាតិចេញផ្សាយកាលពីខែឧសភាកន្លងទៅបានបង្ហាញថា ទោះបីជាទាហានមួកខៀវមានសិទ្ធិប្រើអាវុធដើម្បីការពារជនស៊ីវិលដែលកំពុងទទួលរងការវាយប្រហារក៏ដោយ ក៏មានទាហានមួកខៀវភាគច្រើនបានបដិសេធការប្រើអាវុធរបស់ខ្លួន។ ជាមួយគ្នានេះ លោកស្រីសាម៉ាន់ថាក៏បានឆ្លៀតអំពាវនាវបណ្តាប្រទេសនៅអឺរ៉ុប អាមេរិកឡាទីន ពិសេសនៅអាស៊ីបូព៌ាឲ្យបញ្ជូនទាហានរបស់ខ្លួនបន្ថែមទៅក្នុងកម្លំាងរក្សាសន្តិភាពរបស់អង្គការសហប្រជាជាតិ។ នៅអាស៊ីបូព៌ាដែលលោកស្រីសាម៉ាន់ថាបានទទួលស្គាល់ថា មានប្រទេសខ្លះបានចូលរួមជាលើកទី១ ដូចករណីប្រទេសចិនដែលត្រៀមបញ្ជូនទាហានមួកខៀវចិនថ្មើរជើងចំនួន ៧០០នាក់ទៅកាន់ប្រទេសស៊ូដង់ខាងត្បូងនៅដើមឆ្នំា ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ