បារាំងទទួលព្យាបាលបុគ្គលិកអ.ស.បដែលឆ្លងមេរោគអេបូឡាពីអាហ្វ្រិក
ក្រសួងសុខាភិបាលបារាំងបានប្រកាសឲ្យដឹង នៅថ្ងៃអាទិត្យនេះថា បារាំងបានទទួលព្យាបាលបុគ្គលិកម្នាក់របស់ទីភ្នាក់ងារអ.ស.ប ដែលឆ្លងមេរោគអេបូឡា នៅក្នុងពេលកំពុងបំពេញការងារ នៅក្នុងតំបន់អាហ្វ្រិក។ ក្នុងពេលជាមួយគ្នា ក្រសួងសុខាភិបាលបារាំងក៏បានបញ្ជាក់បន្ថែមផងដែរថា រហូតមកទល់ពេលនេះមិនមានករណីឆ្លងមេរោគអេបូឡាណាមួយត្រូវបានគេរកឃើញ នៅក្នុងទឹកដីបារាំងនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
បុគ្គលិកអ.ស.ប ដែលកំពុងទទួលព្យាបាលជំងឺអេបូឡានៅក្នុងប្រទេសបារាំង នៅពេលនេះ បានឆ្លងមេរោគអេបូឡា ពីប្រទេសសៀរ៉ាឡេអូន ទីដែលគាត់កំពុងបំពេញបេសកកម្ម ក្នុងការប្រយុទ្ធប្រឆាំងនឹងការរាតត្បាតនៃមេរោគអេបូឡា។ នេះបើតាមការឲ្យដឹងរបស់ក្រសួងសុខាភិបាលបារាំង នៅក្នុងសេចក្តីប្រកាសព័ត៌មាន ដោយបានបញ្ជាក់បន្ថែមថា អ្នកជំងឺអេបូឡារូបនេះត្រូវបានដឹកចេញពីសៀរ៉ាឡេអូនមកកាន់ប្រទេសបារាំង តាមយន្តហោះ ពិសេស ហើយបច្ចុប្បន្ន គាត់កំពុងទទួលការព្យាបាល និងត្រូវដាក់ឲ្យនៅដាច់ពីគេក្នុងបន្ទប់ពិសេស នៅក្នុងមន្ទីរពេទ្យយោធា ស្ថិតនៅជាយក្រុងប៉ារីស (Saint-Mandé)។
គួរបញ្ជាក់ថា មន្ទីរពេទ្យយោធានៅជាយក្រុងប៉ារីសនេះធ្លាប់ទទួលព្យាបាលអ្នកជំងឺអេបូឡាម្នាក់រួចមកហើយ កាលពីខែកញ្ញាកន្លងទៅ ហើយព្យាលបាលរហូតជាសះស្បើយ។ អ្នកជំងឺអេបូឡា កាលពីខែកញ្ញា គឺគិលានុប្បដ្ឋាកយិកាបារាំង ដែលធ្វើការឲ្យអង្គការគ្រូពេទ្យគ្មានព្រំដែន ហើយឆ្លងមេរោគអេបូឡា នៅក្នុងប្រទេសលីបេរីយ៉ា។
ចំពោះអ្នកជំងឺអេបូឡា ដែលទើបនឹងបញ្ជូនមកព្យាបាលនៅពេលនេះវិញ ក្រសួងសុខាភិបាលបារាំងមិនបានបញ្ជាក់ឲ្យដឹងថាតើគាត់ជាជនជាតិអ្វីនោះទេ ដោយគ្រាន់តែបញ្ជាក់ថា ក្រៅពីអ្នកជំងឺអេបូឡារូបនេះ មិនមានករណីឆ្លងមេរោគអេបូឡាណាមួយផ្សេងទៀតនោះទេ នៅក្នុងប្រទេសបារាំង។
យោងតាមតួលេខនៃក្រសួងសុខាភិបាលបារាំង ចាប់តាំងពីខែមិថុនា រហូតមកទល់នឹងពេលនេះ បារាំងជួបនឹងករណីសង្ស័យពីមេរោគអេបូឡាចំនួន ១៨ករណី ក៏ប៉ុន្តែ ក្រោយពីឆ្លងកាត់ការធ្វើតេស្តយ៉ាងម៉ត់ចត់ លទ្ធផលសុទ្ធតែបង្ហាញថា គ្មានមេរោគអេបូឡា។ ទោះជាយ៉ាងណាក៏ដោយ គ្រប់ករណីសង្ស័យទាំងអស់សុទ្ធតែត្រូវបានគេបញ្ជូនឲ្យទៅទទួលការតាមដានជំងឺ និងដាក់ឲ្យនៅដាច់ពីគេ នៅក្នុងមន្ទីរពេទ្យជំនាញខាងមេរោគអេបូឡា ដែលមានទាំងអស់ចំនួន ១២ នៅទូទាំងប្រទេសបារាំង ក្នុងនោះ មាន ៣កន្លែង ស្ថិតនៅក្នុងក្រុងប៉ារីស និងជាយក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ