គណបក្សសង្គ្រោះជាតិលុបចោលគម្រោងទៅព្រំដែនប្រាសាទព្រះវិហារ
គណបក្សសង្គ្រោះជាតិ បានសម្រេចលុបចោលគម្រោងទៅកាន់តំបន់ព្រំដែនប្រាសាទព្រះវិហារ នាថ្ងៃទី១១វិច្ឆិកា។ មូលហេតុត្រូវបានអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានប្រកាសថា មកពីមេដឹកនាំបក្សប្រឆាំង លោកសម រង្ស៊ី និងលោកកឹម សុខា ជាប់រវល់ការងារ ខានមិនបាននៅភ្នំពេញ។ ប៉ុន្តែយ៉ាងណាក៏ដោយ ប្រមុខបក្សប្រឆាំងទាំងពីរ នៅរក្សាគម្រោងជួបជុំមហាជន នៅថ្ងៃ១០ធ្នូ ទិវាសិទ្ធិមនុស្សអន្តរជាតិ នៅខេត្តសៀមរាប និងគម្រោងចុះទៅកាន់ព្រៃឡង់ ក្នុងខេត្តកំពង់ធំ នាថ្ងៃទី១១ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ជាការសម្រេចថ្មីមួយទៀត ដែលគណបក្សសង្គ្រោះជាតិប្រកាសថា មេដឹកនាំបក្សប្រឆាំង លោកសម រង្ស៊ី និងលោកកឹម សុខា មិននាំសកម្មជនអ្នកគាំទ្រចុះទៅកាន់តំបន់ព្រំដែនប្រាសាទព្រះវិហារ ដើម្បីពិនិត្យស្ថានភាពព្រំដែន និងជួបកងទ័ពនៅទល់ដែនថៃនោះទេ។
ការលុបចោលដំណើររបស់បក្សប្រឆាំង មិនទៅកាន់តំបន់ព្រំដែនប្រាសាទព្រះវិហារ ពេលនេះ គាប់ជួននឹងព្រឹត្តិការណ៍ក្តៅគគុក នៅទីក្រុងបាងកក ប្រទេសថៃ។ ថៃ ដែលកំពុងមានជម្លោះព្រំដែន នៅតំបន់ប្រាសាទព្រះវិហារ ជាមួយកម្ពុជា។
ប៉ុន្តែអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បដិសេធថា មិនមែនមកពីហេតុផល ថាមានកងទ័ពរារាំងនៅព្រំដែន រួមទាំងមានសភាពការណ៍បាតុកម្ម នៅក្រុងបាងកក ប្រទេសថៃ ទើបបក្សប្រឆាំង មិនទៅនោះទេ។ ប៉ុន្តែហេតុផលតែមួយគត់ ត្រូវបានលោក យ៉ែម បុញ្ញឫទ្ធិ អះអាងថា មកពីមេបក្សទាំងពីររូប មានធុរៈនៅភ្នំពេញ។
យ៉ាងណាក៏ដោយ លោក យ៉ែម បុញ្ញឫទ្ធិ បានឲ្យដឹងថា នៅថ្ងៃទី១១វិច្ឆិកា គឺបន្ទាប់ពីការជួបជុំ នៅខេត្តសៀមរាបហើយ លោកសម រង្ស៊ី និងលោកកឹម សុខា ដែលពេលនេះ កំពុងស្ថិតនៅក្រៅប្រទេស នឹងធ្វើដំណើររួមគ្នាចុះទៅកាន់តំបន់ព្រៃឡង់ ក្នុងខេត្តកំពង់ធំ មុននឹងវិលត្រឡប់មកភ្នំពេញវិញ។
ជាមួយគ្នានោះ គណបក្សសង្គ្រោះជាតិ ក៏បានផ្លាស់ប្តូរកម្មវិធី សម្រាប់ការជួបជុំ នៅថ្ងៃ១០ធ្នូ ទិវាសិទ្ធិមនុស្សអន្តរជាតិ។ គឺការជួបជុំនៅភ្នំពេញ នឹងធ្វើឡើងនៅពេលព្រឹក ដោយមានវត្តមានរបស់លោកសម រង្ស៊ី និងលោកកឹម សុខា ដឹកនាំក្បួនដង្ហែរៀងៗខ្លួន ទៅកាន់ទីលានប្រជាធិបតេយ្យ ដើម្បីប្រារព្ធទិវាសិទ្ធិមនុស្សអន្តរជាតិ ថ្ងៃ១០ធ្នូ ជាមួយនឹងក្រុមអង្គការសង្គមស៊ីវិល។ រហូតដល់ពេលរសៀល ថ្ងៃទី១០ធ្នូ ទើបមេដឹកនាំគណបក្សប្រឆាំងទាំងពីរ ចាកចេញពីភ្នំពេញរួមគ្នា ឆ្ពោះទៅកាន់ខេត្តសៀមរាប ដើម្បីជួបជុំសកម្មជន នៅមុខប្រាសាទអង្គរវត្ត។
ដោយឡែក សម្រាប់គម្រោងធ្វើបាតុកម្មជាថ្មី នៅទីលានប្រជាធិបតេយ្យ នាថ្ងៃអាទិត្យ ទី១៥ធ្នូ និងបាតុកម្មរៀងរាល់ថ្ងៃអាទិត្យ គឺគណបក្សប្រឆាំង នៅរក្សាដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ