តុលាការសុំឲ្យយុវជនដែលប្តឹងលោកនាយករដ្ឋមន្ត្រីបន្ថែមភស្តុតាង
យុវជនម្នាក់ដែលបានដាក់ពាក្យប្តឹងលោកនាយករដ្ឋមន្ត្រី ហ៊ុន សែន ទៅតុលាការទាក់ទងនឹងការបាត់បង់កោះត្រល់និងកោះក្រចកសេះទៅឲ្យប្រទេសវៀតណាមនោះ ត្រូវបានតុលាការទាមទារឲ្យបង្ហាញភស្តុតាងបន្ថែមទៀត។ យុវជន នាង សុឃុន ត្រូវបានតុលាការសាលាដំបូងរាជធានីភ្នំពេញកោះហៅឲ្យទៅបំភ្លឺពាក្យបណ្តឹងរបស់ខ្លួននៅព្រឹកថ្ងៃព្រហស្បតិ៍ទី ២៧ កុម្ភៈនេះ។ ក្រោយចេញពីតុលាការ យុវជនរូបនោះអះអាងថា នឹងដាក់ភស្តុតាងបន្ថែមជូនតុលាការនៅដើមខែមីនាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
បន្ទាប់ពីបានទទួលពាក្យបណ្តឹងនិងក្រោយពីបានសាកសួរដើមបណ្តឹងរួចមក តុលាការសាលាដំបូងរាជធានីភ្នំពេញបានទាមទារឲ្យយុវជនឈ្មោះ នាង សុឃុន បង្ហាញភស្តុតាងបន្ថែមទៀតដើម្បីការពារពាក្យបណ្តឹងរបស់ខ្លួន។ យុវជនរូបនេះបានដាក់ពាក្យប្តឹងប្រឆាំងលោកនាយករដ្ឋមន្ត្រី ហ៊ុន សែន ទៅតុលាការសាលាដំបូងរាជធានីភ្នំពេញពីបទធ្វើឲ្យបាត់បង់កោះត្រល់ និងកោះក្រចកសេះទៅឲ្យប្រទេសវៀតណាម។
ក្រោយចេញពីតុលាការនៅព្រឹកថ្ងៃព្រសហ្បតិ៍នេះ យុវជននាង សុឃុន បានប្រាប់វិទ្យុបារាំងអន្តរជាតិថា លោកនឹងបន្ថែមភស្តុតាងតាមការទាមទាររបស់តុលាការនៅថ្ងៃទី៧មីនាខាងមុខ។ យុវជនដែលហ៊ានប្តឹងមេដឹកនាំកំពូលរូបនេះបានបញ្ជាក់ថា ខ្លួនបានដាក់ភស្តុតាងមួយចំនួនរួចហើយដូចជាកិច្ចព្រមព្រៀងសន្ធិសញ្ញាឆ្នាំ ១៩៨២ រវាងកម្ពុជានិងវៀតណាម និងឯកសារទាក់ទងនឹងកិច្ចព្រមព្រៀងទីក្រុងប៉ារីសឆ្នាំ ១៩៩១ ជាដើម។ ប៉ុន្តែ ភស្តុតាងទាំងនោះត្រូវបានតុលាការអះអាងថាមិនទាន់គ្រប់គ្រាន់ទេ។
ជាកូនកសិករអាយុ ២៥ឆ្នាំមកពីខេត្តកំពង់ធំ យុវជន នាង សុឃុន បញ្ជាក់ថា ពាក្យបណ្តឹងនេះធ្វើឡើងក្នុងនាមជាកូនខ្មែរ និងមិនជាប់ទាក់ទងនឹងនយោបាយនោះទេ។ យ៉ាងណាក៏ដោយ យុវជនរូបនេះអះអាងថា ខ្លួនជាអ្នកគាំទ្រគោលនយោបាយគណបក្សសង្គ្រោះជាតិ។ ទំនងជាឆ្លើយតបដោយប្រយោលចំពោះបញ្ហានេះ លោកនាយករដ្ឋមន្ត្រី ហ៊ុន សែន បានរិះគន់ចំពោះការប្រើប្រាស់យុវជនដើម្បីសម្រេចគោលដៅនយោបាយ។ ថ្លែងក្នុងសន្និសីទស្តីពីចក្ខុវិស័យកម្ពុជាឆ្នាំ ២០១៤ នៅឯសណ្ឋាគារ Intercontinental ក្នុងទីក្រុងភ្នំពេញ នៅព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី បានអះអាងថា លោកការពារដាច់ខាតចំពោះផលប្រយោជន៍យុវជន ប៉ុន្តែ មិនគាំទ្រសកម្មភាពដែលយកអនាគតរបស់យុវជនកម្ពុជាដើម្បីជាសាកល្បងនិងធ្វើជាដើមទុនក្នុងការសម្រេចមហិច្ឆតានយោបាយរបស់មនុស្សមួយក្រុមតូចណានោះទេ។
កាលពីឆ្នាំ ២០១២ កន្លងទៅ លោកនាយករដ្ឋមន្ត្រី ក៏ធ្លាប់បានពន្យល់ចំពោះមុខអង្គសភាអំពីមូលហេតុនៃការបាត់បង់កោះត្រល់នេះរួចហើយ។ យ៉ាងណាក៏ដោយ គេនៅរង់ចាំមើលថា តើតុលាការនឹងចាត់ការពាក្យបណ្តឹងនេះបន្តទៀតដោយរបៀបណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ