លោក ហ៊ុន សែន សុំឲ្យអាជ្ញាធរបើកសិទ្ធិស្មើគ្នារវាងបាតុកម្មប្រឆាំងនិងបាតុកម្មគាំទ្រ
ថ្លែងពីក្រុងព្រះសីហនុនៅព្រឹកថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានអំពាវនាវឲ្យអាជ្ញាធរត្រូវបើកសិទ្ធិស្មើគ្នាដល់បាតុកម្មប្រឆាំងនិងបាតុកម្មគាំទ្ររដ្ឋាភិបាល។ សេចក្តីថ្លែងការណ៍បែបនេះបានធ្វើឡើងបន្ទាប់ពីអាជ្ញាធរបានហាមមិនឲ្យមានការជួបជុំធ្វើបាតុកម្មតាំងពីដើមខែមករាមក និងបន្ទាប់ពីអ្នកគាំទ្រគណបក្សប្រជាជនកម្ពុជាចេញមុខប្រឆាំងពិធីជួបជុំគណបក្សសង្គ្រោះជាតិជាបន្តបន្ទាប់។ អ្នកការពារសិទ្ធិមនុស្សសាទរចំពោះសេចក្តីអំពាវនាវនេះ តែស្នើកុំឲ្យមានបាតុកម្មប្រឈមមុខគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
អំណឹះតទៅ អាជ្ញាធរត្រូវផ្តល់សិទ្ធិស្នើគ្នាក្នុងការប្រើប្រាស់សិទ្ធិសេរីភាពរបស់ប្រជាពលរដ្ឋក្នុងការជួបជុំធ្វើបាតុកម្មតវ៉ាទាំងអ្នកគាំទ្រនិងទាំងអ្នកប្រឆាំងរដ្ឋាភិបាល។ នេះគឺជាសេចក្តីអំពាវនាវរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃអង្គារទី ២៥ កុម្ភៈនេះពីខេត្តព្រះសីហនុ។
ថ្លែងក្នុងពិធីសម្ពោធដាក់ឲ្យប្រើប្រាស់រោងចក្រអគ្គិសនីប្រើដោយថាមពលធ្យូងថ្ម លោកនាយករដ្ឋមន្ត្រីបានគូសបញ្ជាក់ថា នៅពេលនេះ ចលនាបាតុកម្មបានប្រែរូបរាងជាពីរគឺ បាតុកម្មរបស់ក្រុមប្រឆាំង និងបាតុកម្មរបស់អ្នកគាំទ្ររាជរដ្ឋាភិបាល។ បើតាមលោកនាយករដ្ឋមន្ត្រីបាតុកម្មទាំងពីរគឺជាឆន្ទៈរបស់ប្រជារាស្ត្រដូចគ្នាដែលគេមិនអាចជំទាស់បានទេ។
លោក ចាន់ សូវ៉េត មន្ត្រីការពារសិទ្ធិមនុស្សរបស់អង្គការអាដហុកបានស្វាគមន៍ចំពោះការបើកឲ្យមានសិទ្ធិស្មើគ្នានៃការធ្វើបាតុកម្មសម្តែងមតិ។ ប៉ុន្តែ លោកសំណូមពរឲ្យអាជ្ញាធររៀបចំបាតុកម្មនោះនៅកន្លែងផ្សេងគ្នាឬពេលវេលាខុសគ្នាដើម្បីចៀសវាងការប្រឈមមុខដាក់គ្នាដែលនាំឲ្យកើតអំពើហិង្សា។
គួរកត់សម្គាល់ថា សេចក្តីអំពាវនាវរបស់ប្រមុខរដ្ឋាភិបាលគណបក្សកាន់អំណាចបែបនេះបានធ្វើឡើងបន្ទាប់ពីអាជ្ញាធរបានហាមប្រាមមិនឲ្យមានការជួបជុំធ្វើបាតុកម្មចាប់តាំងពីដើមខែមករាមក និងបន្ទាប់ពីអ្នកគាំទ្រគណបក្សប្រជាជនកម្ពុជាក៏តែងតែធ្វើសកម្មភាពប្រឆាំងជាមួយពិធីជួបជុំរបស់គណបក្សសង្គ្រោះជាតិជាបន្តបន្ទាប់។ គណបក្សប្រឆាំងបានហៅសកម្មភាពទាំងនោះថា ជាការយាយីរំខានដល់គណបក្សរបស់ខ្លួន ហើយធ្លាប់បានព្រមានបញ្ឈប់ការចរចាប្រសិនបើសកម្មភាពរំខាននេះនៅតែបន្ត។
កាលពីខែមករាកន្លងទៅ លោកនាយករដ្ឋមន្ត្រីធ្លាប់បានថ្លែងពីខេត្តក្រចេះឲ្យអ្នកគាំទ្រគណបក្សកាន់អំណាចត្រៀមធ្វើសកម្មភាពប្រឆាំងតបវិញចំពោះបាតុកម្មដែលមានចរិតទម្លាក់រដ្ឋាភិបាលចេញពីអំណាច។ យ៉ាងណាក៏ដោយ នៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានបញ្ជាក់ថា លោកមិនអំពាវនាវឲ្យមានបាតុកម្មគាំទ្ររដ្ឋាភិបាលដូចនៅប្រទេសវេណេស៊ូអេឡានោះឡើយ តែក៏មិនបិទសិទ្ធិរបស់ពួកគេដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ