លោកកឹម សុខារើយកសម្ព័ន្ធភាពមកនិយាយជាមួយលោកសម រង្ស៊ីឡើងវិញ
នៅក្នុងសន្និសីទកាសែត នៅព្រឹកថ្ងៃចន្ទនេះ ប្រធានគណបក្សសិទ្ធិមនុស្សលោកកឹម សុខាបានប្រកាសអំពីបំណងចាប់ដៃជាមួយលោក សម រង្ស៊ីដើម្បីអ្វីដែលលោកកឹម សុខាហៅថាជាការប្រមូលផ្តុំអ្នកប្រជាធិបតេយ្យ។ មិនទាន់មានការឆ្លើយតបយ៉ាងណាពីគណបក្សសម រង្ស៊ីនៅឡើយទេ មុនកិច្ចប្រជុំគណៈកម្មាធិការអចិន្ត្រៃយ៍របស់គណបក្សសម រង្ស៊ីនៅថ្ងៃស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ទន្ទឹមនឹងភាពសប្បាយចិត្តនឹងជ័យជំនះលើកដំបូង នៅក្នុងការបោះឆ្នោតក្រុមប្រឹក្សាឃុំសង្កាត់ លោកកឹម សុខាប្រធានគណបក្សសិទ្ធិមនុស្សបាននឹកឃើញអតីតដៃគូសម្ព័ន្ធភាពភ្លាម គឺលោកសម រង្ស៊ី។
នៅព្រឹកថ្ងៃចន្ទនេះ ពោលគឺមួយថ្ងៃក្រោយថ្ងៃបោះឆ្នោត លោកកឹម សុខាបានប្រកាស នៅក្នុងសន្និសីទកាសែតថា លោកនឹងបោះដៃទូរស័ព្ទទៅលោកសម រង្ស៊ីដើម្បីសើរើនិយាយភ្ជាប់សម្ព័ន្ធភាពឡើងវិញ។ សម្ព័ន្ធភាពដែលគណបក្សទាំងពីរធ្លាប់ព្រមព្រៀងបង្កើតឡើងដើម្បីទប់ទល់ និងប្រជែងជាមួយគណបក្សប្រជាជនកម្ពុជាដែលឈ្នះការបោះឆ្នោតកាន់អំណាចរហូតមកនោះ។
លោកកឹម សុខាមានទឹកមាត់នឹងនិយាយជាមួយលោកសម រង្ស៊ីដោយសារតែគណបក្សសិទ្ធិមនុស្សទទួលបានសំឡេងគាំទ្រច្រើនប្រហាក់ប្រហែលគណបក្សសម រង្ស៊ីដែរ នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៣នេះ។ លោកកឹម សុខាបានអះអាងយ៉ាងដូច្នេះ ដោយសារតែកន្លងមកគណបក្សសម រង្ស៊ីធ្លាប់និយាយថា គណបក្សសិទ្ធិមនុស្សជាគណបក្សតូច។
នៅមិនទាន់មានការឆ្លើយតបយ៉ាងណាពីគណបក្សសម រង្ស៊ីដែលប្រកាសមិនទទួលស្គាល់ការបោះឆ្នោតនោះនៅឡើយទេ ចំពោះការអំពាវនាវរបស់លោកកឹម សុខា។ លោកគង់ គាំប្រធានស្តីទីគណបក្សសម រង្ស៊ីបានថ្លែងប្រាប់វិទ្យុបារាំងអន្តរជាតិនៅរសៀលថ្ងៃចន្ទនេះថា លោកមិនអាចធ្វើអត្ថាធិប្បាយអ្វី មុនកិច្ចប្រជុំគណៈកម្មាធិការអចិន្ត្រៃយ៍គណបក្សដែលគ្រោងរៀបចំធ្វើ នៅព្រឹកថ្ងៃអង្គារស្អែកនោះឡើយ។ ជាកិច្ចប្រជុំថ្នាក់កំពូលរបស់បក្សដើម្បីវាយតម្លៃអំពីស្ថានភាពនៃការបោះឆ្នោត។
គណបក្សសិទ្ធិមនុស្ស និងគណបក្សសម រង្ស៊ីបានចំណាយអស់ជាច្រើនខែដើម្បីសាកល្បងបង្កើតសម្ព័ន្ធភាពភ្លើងចំបើងមួយកាលពីដើមឆ្នាំ២០០៩។ មិនបានប៉ុន្មានផង សម្ព័ន្ធភាពនេះបានរលាយ ដោយសារតែភាពមិនទុកចិត្តគ្នា។ គណបក្សសម រង្ស៊ីបានចោទប្រកាន់គណបក្សសិទ្ធិមនុស្សរបស់លោកកឹម សុខាថា ជាគណបក្សអាយ៉ងរបស់គណបក្សប្រជាជនកម្ពុជា។
គួររម្លឹកថា គណបក្សសិទ្ធិមនុស្សបានប្រកាសថា ខ្លួនបានឈ្នះធ្វើមេឃុំចំនួន១៨ និងអាចទទួលបានតំណែងជំទប់ទី១ និងទី២បាននៅច្រើនឃុំសង្កាត់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ