លោក កឹម សុខា ជំរុញឲ្យលោក សម រង្ស៊ី បន្តការជជែកពីការបង្កើតសម្ព័ន្ធភាព
លោក កឹម សុខា ប្រធានគណបក្សសិទ្ធិមនុស្សបានជម្រុញឲ្យលោក សម រង្ស៊ី បន្តជជែកពីការបង្រួបបង្រួម ក្នុងនាមសម្ព័ន្ធភាពគណបក្សប្រឆាំង។ សម្ព័ន្ធគណបក្សសមរង្ស៊ី និងគណបក្សសិទ្ធិមនុស្ស បានបង្កើតឡើងកាលពីថ្ងៃ១៥មករា ឆ្នាំ២០០៩ ដើម្បីចូលរួមការបោះឆ្នោតឃុំសង្កាត់ឆ្នាំ២០១២ និងការបោះឆ្នោតជាតិឆ្នាំ២០១៣។ ប៉ុន្តែមកដល់ពេលនេះ សម្ព័ន្ធភាពគណបក្សប្រឆាំង ត្រូវជាប់គាំង ដោយគណបក្សសមរង្ស៊ី មិនរវីរវល់ វិលចូលរួមតុចរចាឡើយ។ នេះបើតាមការបញ្ជាក់ពីគណបក្សសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរ
ក្នុងលិខិតផ្ញើជូនលោក សម រង្ស៊ី ចុះថ្ងៃទី២៥មករា ឆ្នាំ២០១១ លោក កឹម សុខាបានស្នើឲ្យលោក សម រង្ស៊ីងាកមកចូលរួមតុចរចានិងបន្តការជួបជជែកលើការបង្រួបបង្រួមគណបក្សសិទ្ធិមនុស្ស និងគណបក្សសមរង្ស៊ី។ ការចរចាដើម្បីសម្រេចបាននូវគោលជំហរជាក់លាក់ដើម្បីបង្កើតឲ្យបាននូវចលនាប្រជាធិបតេយ្យដ៏ធំមួយដើម្បីការផ្លាស់ប្តូរស្របតាមស្មារតីនៃសេចក្តីថ្លែងការណ៍រួមដែលបានចុះហត្ថលេខាដោយប្រធានគណបក្សទាំងពីរកាលពីថ្ងៃទី១៥មករាឆ្នាំ២០០៩ នៅទីក្រុងភ្នំពេញ។
លោក កឹម សុខានិងលោក សម រង្ស៊ីបានចុះហត្ថលេខារួមគ្នាដើម្បីបង្កើតសម្ព័ន្ធភាពគណបក្សប្រឆាំងថ្មីមួយដែលមានឈ្មោះថា “ចលនានយោបាយប្រជាធិបតេយ្យដើម្បីការផ្លាស់ប្តូរ”។ តាមរយៈសម្ព័ន្ធភាពនេះ គណបក្សប្រឆាំងទាំងពីរត្រូវរួមគ្នាបង្កើតជាបញ្ជីបេក្ខជនតែមួយសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១២ និងការបោះឆ្នោតជាសកលជ្រើសតាំងតំណាងរាស្ត្រឆ្នាំ២០១៣។
ក៏ប៉ុន្តែអស់រយៈពេលជាងពីរឆ្នាំមកហើយសម្ព័ន្ធភាពគណបក្សប្រឆាំងនេះហាក់ដូចជាមិនដំណើរទៅមុខសោះឡើយ។ នោះគឺគណបក្សសមរង្ស៊ីមិនចង់ជួបជជែកជាមួយគណបក្សរបស់លោក កឹម សុខា ដោយសំអាងថាគណបក្សប្រឆាំងនេះ មានបញ្ហាសំខាន់ដែលត្រូវធ្វើ ហើយលោក សម រង្ស៊ីនៅក្រៅប្រទេស។ មួយវិញទៀត ការមិនត្រូវរ៉ូវគ្នានិងមិនព្រមវិលមកចូលរួមតុចរចារវាងគណបក្សប្រឆាំងទាំងពីរ ក៏ដោយសារតែក្រុមរបស់លោក កឹម សុខា មិនចង់ឲ្យយកឈ្មោះលោក សម រង្ស៊ី ដាក់ជាឈ្មោះគណបក្សដែលត្រូវរួបរួមព្រមទាំងការកំណត់អាណត្តិប្រធានបក្សជាដើម។
យ៉ាងណាក៏ដោយក្នុងលិខិតដែលចែកចាយដល់ដៃអ្នកកាសែតនៅថ្ងៃទី២៧មករាឆ្នាំ២០១១ លោក កឹម សុខា បានជម្រុញឲ្យលោក សម រង្ស៊ីបើកទូលាយហើយហ៊ានប្រថុយដើម្បីការផ្លាស់ប្តូរ។ ម្យ៉ាងវិញទៀត លោក កឹម សុខាចង់ឃើញការរួបរួមរវាងគណបក្សប្រឆាំងទាំងពីរឲ្យសម្រេចបានជាលទ្ធផលជាក់លាក់មុនខែកក្កដាឆ្នាំ២០១១។ មកដល់រសៀលថ្ងៃទី២៧មករា ឆ្នាំ២០១១ មិនមានការឆ្លើយតបពីលោក សម រង្ស៊ីប្រធានគណបក្សសមរង្ស៊ីចំពោះលិខិតរបស់លោក កឹម សុខា ខាងលើនេះទេ។ ក៏ប៉ុន្តែលោក យឹម សុវណ្ណអ្នកនាំពាក្យគណបក្សសមរង្ស៊ីបានប្រកាសក្នុងសន្និសីទកាសែតកាលពីប៉ុន្មានមុននេះថា សម្ព័ន្ធភាពគណបក្សប្រឆាំងនៅតែបន្តហើយអាចនឹងចេញលទ្ធផលជាដុំកំភួននាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ