កម្ពុជាដាស់តឿនស្ថានទូតខ្លួននៅបរទេស អោយពន្លឿនការផ្តល់ទិដ្ឋាការ
ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី១៥ មករា បានចេញសារាចរមួយ ណែនាំដល់ស្ថានកុងស៊ុលកម្ពុជាប្រចាំនៅបរទេស ពន្លឿនការផ្តល់ទិដ្ឋាការ ដល់អ្នកទេសចរ និងអ្នកវិនិយោគ ចូលព្រះរាជាណាចក្រកម្ពុជា ដោយមិនបង្អង់ និងមិនគិតសេវាបន្ថែមឡើយ។ ក្រសួងយល់ថា អន្តរាគមន៍នេះ ជាការសម្រួល ដល់អ្នកទេសចរ និងទាក់ទាញអ្នកវិនិយោគ ចូលកម្ពុជាអោយកាន់តែច្រើនឡើង។ សមាគមទីភ្នាក់ងារទេសចរណ៍កម្ពុជា អំណរសាទរចំពោះចំណាត់ការនេះ ហើយយល់ថា បើស្ថានទូតអាចធ្វើបាន វានឹងជួយសាងកេរ្តិ៍ឈ្មោះល្អដល់កម្ពុជាថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សារាចរមួយរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី១៥ មករា ២០១៤នេះ បានណែនាំដល់ស្ថានទូត និងស្ថានកុងស៊ុល កម្ពុជា ប្រចាំនៅបរទេស អោយពន្លឿនការផ្តល់ទិដ្ឋាការចូលកម្ពុជា ហើយមិនត្រូវគិតថ្លៃសេវាប្រញាប់បន្ថែមឡើយ។ សារាចរនេះ ត្រូវបាន លោក កុយ គួង អ្នកនាំពាក្យក្រសួងការបរទេស ចាត់ទុកថា គ្រាន់ជាការដាស់តឿនដល់ឯកអគ្គរាជទូត និងអគ្គកុងស៊ុលកម្ពុជាប្រចាំនៅបរទេស ត្រូវខិតខំដោះស្រាយការស្នើសុំទិដ្ឋាការអោយបានលឿន កុំអោយអ្នកដាក់ពាក្យសុំមានការធុញទ្រាន់ ទោះបីជា ចំណាយពេលវេលាផ្ទាល់ខ្លួនក៏ដោយ។ ក្រសួងការបរទេសជឿជាក់ថា ការផ្តល់សេវាទិដ្ឋាការអោយបានឆាប់ ប្រាកដជាទាក់ទាញភ្ញៀវទេសចរ និងអ្នកវិនិយោគបានច្រើន។
បើតាមលោក កុយ គួង ភាពយឺតយ៉ាវក្នុងការស្នើសុំទិដ្ឋាការកន្លងមក អាចបណ្តាលមកពីអ្នកដាក់ពាក្យសុំមានចំនួនច្រើនពេក តែចាប់ពីពេលនេះតទៅ រាល់ការដាក់ពាក្យស្នើទិដ្ឋាការភ្លាម និងត្រូវពិនិត្យដោះស្រាយភ្លាម។ ចំពោះតម្លៃទិដ្ឋាការទូទៅ ដែលមានសុពលភាព ៣ខែ ត្រូវបានអ្នកនាំពាក្យរូបនេះ បញ្ជាក់ថា រដ្ឋាភិបាលកំណត់តម្លៃទិដ្ឋាការផ្លូវការ ភ្ញៀវទេសចរ គឺ ២០ដុល្លារ ឬ២៥ដុល្លារ ទិដ្ឋាការអ្នកវិនិយោគ។ តម្លៃនេះសម្រាប់ទិដ្ឋាការចេញចូលម្តង និងអាចស្នាក់នៅកម្ពុជា យ៉ាងយូរ៣០ថ្ងៃ។
បើទោះបីជាមិនទាន់បានឃើញសារាចរពន្លឿនការផ្តល់ទិដ្ឋការចូលកម្ពុជា នេះ លោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា បានសម្តែងអំណរ និងស្វាគមន៍ជាមុន ចំពោះចំណាត់ការរបស់ ក្រសួងការបរទេសកម្ពុជា។ អន្តរាគមន៍នេះ នឹងបង្កើនការពេញចិត្តដល់បរទេសកំឡុងពេលជួបខ្មែរដំបូង។ លោកក៏ជឿជាក់ថា បើធ្វើបាន វានឹងជួយសាងកេរ្តិ៍ឈ្មោះល្អដល់កម្ពុជា បន្ថែមលើការលើកទឹកចិត្តអ្នកទេសចរ អោយមកទស្សនាកម្ពុជា កាន់តែច្រើន។
បើតាមប្រធានសមាគមទីភ្នាក់ងារទេសចរណ៍កម្ពុជា ភ្ញៀវទេសចរមួយចំនួន ដែលបានមកដល់កម្ពុជា បានរអ៊ូរទាំ ពីចំនួនស្ថានទូត និងកុងស៊ុលកម្ពុជា ដែលមានតិចតួចនៅបរទេស និងការចំណាយក្រៅផ្លូវការមួយចំនួន តាមច្រកទា្វព្រំដែនអន្តរជាតិផងដែរ។ ទោះបីជាយ៉ាងនេះក្តី ពលរដ្ឋនៃប្រទេសមួយចំនួន ត្រូវបានអនុញ្ញាតអោយស្នើសុំទិដ្ឋាការពេលមកដល់កម្ពុជា ដែលជាផ្នែកមួយ នៃការសម្រួលទេសចរណ៍កម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ