ការបាញ់ផ្ទួនៗកណ្តាលក្រុងប៉ារីស ប៉ូលិសប្រើមធ្យោបាយធំតាមចាប់ជនដៃដល់
ប៉ូលិសព្រហ្មទណ្ឌក្រុងប៉ារីស វក់វីបីថ្ងៃមកហើយ តាមស្វែងរកចាប់ខ្លួនបុរសម្នាក់ ដែលបាញ់រះនៅ ទីស្នាក់ការកាសែតលីបេរ៉ាស្យុង ទីស្នាក់ការទូរទស្សន៍ និងក្នុងសង្កាត់ពាណិជ្ជកម្ម La défense កាលពីថ្ងៃចន្ទ បណ្តាលឱ្យអ្នកថតរូបម្នាក់រងរបួសជាទម្ងន់។ នៅថ្ងៃនេះ លទ្ធផលនៃការវិភាគអាដេអិន បានបញ្ជាក់កាន់តែច្បាស់ថា ហេតុការណ៍ទាំងបីកន្លែងជាស្នាដៃមនុស្សតែម្នាក់។ មនុស្សម្នាក់ដែលប៉ូលិសនៅ មិនរកអត្តសញ្ញាណឃើញនៅឡើយ ទោះបីជាមានជំនួយរូបថតវីដេអូ ថតបាននៅជាច្រើនកន្លែងក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
គ្មានការប្រកាសពីមូលហេតុ ឬការទាមទារអ្វីទេ រហូតមកទល់នឹងពេលនេះ ម៉ោងនេះ ជនបាញ់កាំភ្លើងនៅបាត់ស្រមោល គ្មានចេញដានអ្វីសោះ។ ប៉ូលិសក្រុងប៉ារីស បានសិក្សាយ៉ាងលម្អិត កាត់ផ្គុំរូបថត បានមកពីកាមេរ៉ាឃ្លាំមើលតាមស្ថានីយ៍រថភ្លើង តាមការិយាល័យធ្វើការ ដើម្បីស្វែងយល់អំពីសកម្មភាព និងបំណងរបស់ឧក្រិដ្ឋជន ដែលទំនងជាប្រព្រឹត្តអំពើតែម្នាក់ឯង និងបានផ្សព្វផ្សាយរូបថតឧក្រិដ្ឋជនយ៉ាងទូលំទូលាយ។
សាក្សីជាច្រើនបានផ្តល់ព័ត៌មានតាមទូរស័ព្ទ។ ឯការចាប់ខ្លួនសាកសួរក៏មានច្រើន ក្នុងនោះមានបីនាក់ ដែលត្រូវនាំដល់ប៉ុស្តិ៍ប៉ូលិស ដើម្បីផ្ទៀងផ្ទាត់បន្ថែម ប៉ុន្តែគ្មានលទ្ធផល មិនមែនបុរស មានភិនភាគជាសញ្ជាតិអឺរ៉ុប អាយុខ្ទង់ពី៣៥ ទៅ៤៥ឆ្នាំ ដែលប៉ូលិសតាមស្វែងរកចាប់ជាទីបំផុតនោះទេ។
ប៉ូលិសប្រមូលព័ត៌មានបានច្រើនទាក់ទងនឹងជនបាញ់កាំភ្លើងនេះ ប៉ុន្តែគេនៅតែពុំទាន់អាចកំណត់អត្តសញ្ញាណបាន។ ការវិភាគអាដេអិន ដែលទើបបញ្ជាក់ថាហេតុការណ៍បាញ់រះដែលកើតឡើងនៅទីស្នាក់ការទូរទស្សន៍ កាលពីថ្ងៃសុក្រ និងនៅទីស្នាក់ការកាសែតលីបេរ៉ាស្យុង និងធនាគារ La Société Générale នៅចន្ទ ជាស្នាដៃជនតែម្នាក់ ទំនងជាអាចជួយស្វែងរកអត្តសញ្ញាណបាន ប្រសិនបើជនបាញ់កាំភ្លើងធ្លាប់ជាប់ពន្ធនាគារ ដូចបានអះអាងប្រាប់ទៅអ្នកបើកបររថយន្តជាចំណាប់ថ្នូរមែន។
សូមបញ្ជាក់ថា ហេតុការណ៍បាញ់រះ កណ្តាលក្រុងប៉ារីស ដែលបានធ្វើអ្នកថតរូបម្នាក់រងរបួសធ្ងន់ ត្រូវបានតាមដាននិងធ្វើអត្ថាធិប្បាយយ៉ាងពុះកញ្ជ្រោល តាមប្រព័ន្ធសង្គម។ ខ្លះហ៊ានដល់ទៅចោទសួរពីភាពយឺតយ៉ាវរបស់ប៉ូលិស ដែលនៅតែពុំទាន់អាចចាប់ខ្លួនជនដៃដល់បានទៀត។ នៅតាមទីស្នាក់ការវិទ្យុ និងទូរទស្សន៍ ក៏ដូចជាប្រព័ន្ធផ្សព្វផ្សាយព័ត៌មានសំខាន់ៗរបស់បារាំង បានពង្រឹងការរក្សាសន្តិសុខយ៉ាងតឹងរ៉ឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ