លោកអូបាម៉ានិងលោករ៉ាមូស្សេនព្រមព្រៀងបន្តវាយប្រហារតាមផ្លូវអាកាសទៅលើប្រទេសលីប៊ី
លោកប្រធានាធិបតីអាមេរិកបារ៉ាក់អូបាម៉ាបានជួបពិភាក្សានៅថ្ងៃសុក្រ ទី១៣ឧសភានៅទីក្រុងវ៉ាស៊ីនតោនជាមួយអគ្គលេខាធិការនៃបក្សសម្ព័ន្ធ Otan លោករ៉ាមូស្សេន។ អ្នកទាំងពីរបានយល់ព្រមព្រៀងគ្នាថា ជាការចាំបាច់ត្រូវតែបន្តប្រតិបត្តិការយោធាវាយប្រហារតាមផ្លូវអាកាសទៅលើប្រទេសលីប៊ី ដរាបណាប្រមុខដឹកនាំផ្តាច់ការលីប៊ីកាដាហ្វ៊ីនៅតែបន្តធ្វើការវាយប្រហារទៅលើប្រជាជនលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:០៨
បច្ចុប្បន្ននេះ បក្សសម្ព័ន្ធOtanនៅតែបន្តប្រតិបត្តិការយោធាវាយប្រហារតាមផ្លូវអាកាសដោយធ្វើការទម្លាក់គ្រាប់បែកពុំស្រាកស្រានទៅលើទីក្រុងទ្រីប៉ូលី។ នៅព្រឹកថ្ងៃសៅរ៍ទី១៤ឧសភានេះទៀត នៅរដ្ឋធានីនៃប្រទេសលីប៊ី គេបានឮសូរសំឡេងផ្ទុះលាន់ឮយ៉ាងខ្លាំងនៃការផ្ទុះគ្រាប់បែក៦លើក។
ក្រោយពីមានកិច្ចពិភាក្សារវាងលោកប្រធានាធិបតីអាមេរិកបារ៉ាក់អូបាម៉ានិងអគ្គលេខាធិការនៃបក្សសម្ព័ន្ធOtan លោករ៉ាមូស្សេន សេចក្តីថ្លែងការណ៍មួយបានឲ្យដឹងថា បេសកកម្មយោធារបស់បក្សសម្ព័ន្ធOtanបានជួយស្រោចស្រង់ជីវិតប្រជាជនលីប៊ីស្លូតត្រង់ជាច្រើននាក់។ ដូច្នេះ បក្សសម្ព័ន្ធOtanត្រូវតែបន្តប្រតិបត្តិការយោធារបស់ខ្លួននៅប្រទេសលីប៊ីដោយធ្វើការវាយប្រហារតាមផ្លូវអាកាសដើម្បីជួយការពារប្រជាជនលីប៊ី ដរាបណាប្រមុខដឹកនាំផ្តាច់ការកាដាហ្វ៊ីនៅតែបន្តធ្វើការវាយប្រហារទៅលើប្រជាជនលីប៊ីស្លូតត្រង់។
ម្យ៉ាងទៀត បក្សសម្ព័ន្ធOtanយល់ឃើញថាការវាយប្រហារតាមផ្លូវអាកាសដោយបាញ់និងទម្លាក់គ្រាប់បែកទៅលើទាហានរបស់កាដាហ្វ៊ី បានធ្វើឲ្យកងកម្លាំងស្មោះស្ម័គ្រនឹងកាដាហ្វ៊ីស្គាល់ការខូចខាតយ៉ាងដំណុំ។ មូលហេតុនេះហើយដែលជំរុញឲ្យលោកប្រធានាធិបតីអាមេរិកបារ៉ាក់អូបាម៉ានិងអគ្គលេខាធិការនៃបក្សសម្ព័ន្ធOtan លោករ៉ាមូស្សេនព្រមព្រៀងគ្នាបន្តធ្វើការវាយប្រហារតាមផ្លូវអាកាសទៅលើប្រទេសលីប៊ី។
ចំពោះការចោទប្រកាន់ថាទីក្រុងវ៉ាស៊ីតោនចង់សម្លាប់កាដាហ្វ៊ី សេតវិមានបានឆ្លើយបដិសេធទាំងស្រុង។ សហរដ្ឋអាមេរិកគ្រាន់តែធ្វើការទាមទារឲ្យមេដឹកនាំផ្តាច់ការលីប៊ីលាចាកចេញពីមុខតំណែងប៉ុណ្ណោះ។ ទាំងនេះស្របតាមសេចក្តីសម្រេចចិត្ត១៩៧៣របស់ក្រុមប្រឹក្សាសន្តិសុខនៃអ ស ប ដែលសហរដ្ឋអាមេរិកបានគាំទ្រ។
នៅថ្ងៃសុក្រម្សិលមិញ បើយោងតាមព័ត៌មានដែលទទួលបានពីរដ្ឋមន្ត្រីក្រសួងការបរទេសអ៊ីតាលីលោកFranco Frattini បានឲ្យដឹងថា ប្រមុខដឹកនាំផ្តាច់ការលីប៊ីកាដាហ្វ៊ីប្រហែលជាបានទទួលរងរបួសហើយបានរត់គេចខ្លួនចេញពីរដ្ឋធានីទ្រីប៉ូលី។ សូមបញ្ជាក់ថា កាដាហ្វ៊ីបានបាត់មុខពុំឃើញចេញមកបង្ហាញខ្លួនតាំងពីមានការវាយប្រហារទម្លាក់គ្រាប់បែកទៅលើទីក្រុងទ្រីប៉ូលីកាលពីថ្ងៃទី៣០មេសាកន្លងទៅដែលបានបណ្តាលឲ្យកូនប្រុសពៅរបស់កាដាហ្វ៊ីនិងចៅបីនាក់ទៀតស្លាប់។
គណៈប្រតិភូនៃក្រុមអ្នកប្រឆាំងលីប៊ីដឹកនាំដោយលោកMahmoud Djibril ដែលជាប្រធាននៃការិយាល័យប្រតិបត្តិនៃក្រុមប្រឹក្សាជាតិអន្តរកាលលីប៊ីបានជួបពិភាក្សានៅសេតវិមាននៅថ្ងៃសុក្រទី១៣ឧសភាម្សិលមិញ។ ក៏ប៉ុន្តែ គណៈប្រតិភូនៃក្រុមអ្នកប្រឆាំងលីប៊ីនេះពុំបានទទួលជំនួយហិរញ្ញវត្ថុនិងការទទួលស្គាល់ជាផ្លូវការពីសហរដ្ឋអាមេរិកនៅឡើយ ទោះបីជាទីក្រុងវ៉ាស៊ីនតោនយល់ថា “ក្រុមប្រឹក្សាជាតិអន្តរកាល”លីប៊ីមានលក្ខណៈស្របច្បាប់ក៏ដោយ។ ហើយលោកMahmoud Djibril ដែលជាប្រធាននៃការិយាល័យប្រតិបត្តិនៃក្រុមប្រឹក្សាជាតិអន្តរកាលនឹងត្រូវមានជំនួបពិភាក្សានៅថ្ងៃសៅរ៍ទី១៤ឧសភានេះនៅទីក្រុងប៉ារីសជាមួយលោកប្រធានាធិបតីបារាំងនីកូឡាសាកូហ្ស៊ី។
ទស្សនកិច្ចរបស់គណៈប្រតិភូនៃក្រុមអ្នកប្រឆាំងលីប៊ីដឹកនាំដោយលោកMahmoud Djibril បានទទួលជោគជ័យក្នុងវិស័យទំនាក់ទំនងសាធារណៈនៅសហរដ្ឋអាមេរិក៖ ដោយបានជួបប្រាស្រ័យនៅព្រឹទ្ធសភាអាមេរិកជាមួយប្រធានគណៈកម្មការទទួលបន្ទុកកិច្ចការបរទេសលោកJohn Kerry ហើយនិងបានជួបពិភាក្សានៅសេតវិមាន ទោះជាពុំបានជួបលោកប្រធានាធិបតីបារ៉ាក់អូបាម៉ាក៏ដោយ។
គួរកត់សម្គាល់ថា ក្រុមប្រឹក្សាជាតិអន្តរកាលលីប៊ីកំពុងត្រូវការជំនួយហិរញ្ញវត្ថុប្រមាណ៣ពាន់លានដុល្លារសម្រាប់ធ្វើការបន្តប្រយុទ្ធដើម្បីទម្លាក់កាដាហ្វ៊ីចេញពីមុខតំណែង។ ក៏ប៉ុន្តែ មកទល់ពេលនេះជំនួយអាមេរិកាំងមានត្រឹមតែ២៥លានដុល្លារសម្រាប់ជំនួយគ្រឿងសម្ភារៈដែលពុំមែនជាសព្វាវុធនិង៥៣លានដុល្លារជាជំនួយមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ