ទីផ្សារមូលបត្រអឺរ៉ុបច្រួលច្របល់ដោយសាររឿងអេបូឡានិងបញ្ហាសេដ្ឋកិច្ច
ទីផ្សារមូលបត្រនៅទូទាំងតំបន់អឺរ៉ុបបានធ្លាក់ចុះយ៉ាងខ្លាំង ចំនួន ២ថ្ងៃជាប់ៗគ្នាមកហើយ គឺកាលពីថ្ងៃពុធ និងថ្ងៃព្រហស្បតិ៍។ មូលហេតុចម្បង គឺបណ្តាលមកពីបញ្ហាសេដ្ឋកិច្ច នៅអឺរ៉ុប ក៏ដូចជា នៅសហរដ្ឋអាមេរិក និងបូករួមជាមួយនឹងក្តីបារម្ភ ជុំវិញផលប៉ះពាល់នៃមេរោគអេបូឡា។
ចុះផ្សាយនៅថ្ងៃ៖ កែប្រែថ្ងៃទី៖
ទីផ្សារមូលបត្រសំខាន់ៗ ដូចជា នៅបារាំង អង់គ្លេស និងអាល្លឺម៉ង់ ជាដើម សុទ្ធតែបានធ្លាក់ថ្លៃរហូតដល់ទៅជាង ២% ចំណែកឯអត្រាការប្រាក់បំណុលរដ្ឋរបស់បណ្តាប្រទេសនៅអឺរ៉ុបខាងត្បូង ដូចជា អេស្ប៉ាញ អ៊ីតាលី ព័រទុយហ្កាល់ និងក្រិក ជាដើម បានកើនឡើងយ៉ាងគំហុក នៅក្នុងចន្លោះ ពីថ្ងៃពុធ និងថ្ងៃព្រហស្បតិ៍។
នៅបារាំង មូលបត្ររបស់ក្រុមហ៊ុនរដ្ឋធំៗបានធ្លាក់ថ្លៃខ្លាំងជាងគេ ក្នុងចន្លោះ ពី៣% រហូតទៅដល់ ៦% ក្រោយពីរដ្ឋាភិបាលបារាំងបានប្រកាសឲ្យដឹងថា រដ្ឋគ្រោងនឹងលក់ចេញនូវភាគហ៊ុនរបស់រដ្ឋនៅតាមក្រុមហ៊ុនមួយចំនួន ដើម្បីយកលុយមកជួយទប់ទល់នឹងបញ្ហាឧនភាពថវិកា។
យោងតាមអ្នកជំនាញខាងទីផ្សារមូលបត្រ បញ្ហាច្រួលច្របល់នៅតាមទីផ្សារមូលបត្រអឺរ៉ុបនាពេលប៉ុន្មានថ្ងៃកន្លងទៅនេះ បង្កឡើងដោយកត្តាច្រើនរួមផ្សំគ្នា ក្នុងនោះ រួមមាន ក្តីបារម្ភរបស់អ្នកវិនិយោគចំពោះចក្ខុវិស័យនៃកំណើនសេដ្ឋកិច្ចនៅក្នុងតំបន់អឺរ៉ុប ក៏ដូចជា នៅអាមេរិក និងក្តីបារម្ភជុំវិញអនាគតនៃការវិនិយោគទៅលើមូលបត្របំណុលក្រិក។ បន្ថែមពីលើនេះទៅទៀត គឺមានក្តីបារម្ភជុំវិញផលប៉ះពាល់ដែលអាចបង្កឡើងដោយមេរោគអេបូឡា ដែលកំពុងតែរាតត្បាតខ្លាំងនៅអាហ្វ្រិក ហើយអាចរាលដាលចេញទៅតំបន់ផ្សេងៗទៀត។
ស្ថិតនៅក្នុងស្ថានភាពមិនច្បាស់លាស់បែបនេះ អ្នកវិនិយោគក៏នាំគ្នាខ្លាចរអា ហើយបង្វែរការវិនិយោគពីទីផ្សារមូលបត្រ ទៅរកវិស័យផ្សេង ដែលមានសុវត្ថិភាពជាង ជាពិសេស គឺវិនិយោគទៅលើទីផ្សារមាស។ ហេតុដូច្នេះហើយបានជាគេសង្កេតឃើញថា នៅក្នុងពេលដែលតម្លៃមូលបត្រចេះតែធ្លាក់ចុះ តម្លៃមាសវិញកំពុងតែកើនឡើង។
ដើម្បីព្យាយាមរំងាប់ក្តីបារម្ភរបស់អ្នកវិនិយោគ ធនាគារកណ្តាលអឺរ៉ុបបានចេញមុខប្រកាសធានាថានឹងផ្តល់សាច់ប្រាក់គ្រប់គ្រាន់ទៅតាមតម្រូវការរបស់ធនាគារក្រិក ចំណែកឯគណៈកម្មការអឺរ៉ុបវិញក៏បានសន្យាផងដែរថានឹងនៅតែបន្តជួយក្រិកតាមគ្រប់មធ្យោបាយ នៅក្នុងការដោះស្រាយបញ្ហាបំណុល។ ក៏ប៉ុន្តែ បើទោះបីជាមានការធានាបែបនេះក៏ដោយ ទីផ្សារមូលត្រអឺរ៉ុបនៅតែបន្តធ្លាក់ចុះ គិតត្រឹមល្ងាចថ្ងៃព្រហស្បតិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ