អង្គការសង្គមស៊ីវិលជំរុញឲ្យមានច្បាប់ស្តីពីហិរញ្ញវត្ថុនយោបាយ
អង្គការសង្គមស៊ីវិលចំនួន៤ដែលធ្វើការងារពាក់ពន្ធ័នឹងប្រជាធិបតេយ្យ និងការបោះឆ្នោតនៅកម្ពុជាបានអំពាវនាវឲ្យរដ្ឋាភិបាល និងស្ថាប័ននីតិបញ្ញត្តិកម្ពុជាបង្កើតច្បាប់ស្តីពីហិរញ្ញវត្ថុនយោបាយ។ ការអំពាវនាវនេះបានធ្វើឡើងជាសាធារណៈនៅខណៈដែលការបោះឆ្នោតជ្រើសរើសតំណាងរាស្ត្រអាណត្តិទី៥កាន់តែខិតចូលមកដល់។ គោលបំណងនៃការបង្កើតច្បាប់នេះត្រូវបានអង្គការសង្គមស៊ីវិលទាំងនោះពន្យល់ថា ដើម្បីធានាឲ្យមានសមភាពយុត្តិធម៌ និងតម្លាភាពក្នុងការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:៣៣
នៅក្នុងសេចក្តីអំពាវនាវរួមគ្នាមួយដែលត្រូវបានផ្សព្វផ្សាយជាសាធារណៈតាមប្រព័ន្ធផ្សាយព័ត៌មានក្នុងស្រុកជាច្រើន អង្គការសង្គមស៊ីវិល៤ បានអំពាវនាវជាចំហដល់រដ្ឋាភិបាល រដ្ឋសភា និងព្រឹទ្ធសភាកម្ពុជាឲ្យបង្កើតច្បាប់ស្តីពីហិរញ្ញវត្ថុនយោបាយឲ្យបានឆាប់តាមដែលអាចធ្វើទៅបាន។
អង្គការទាំង៤នោះរួមមាន អង្គការ Comfrel, Nicfec, សម្ព័ន្ធដើម្បីសុចរិតភាព និងគណនេយ្យភាពសង្គម និងអង្គការសកម្មភាពដើម្បីប្រជាធិបតេយ្យ និងសិទ្ធិមនុស្សនៅកម្ពុជា។ សម្រាប់ក្រុមសង្គមស៊ីវិលទាំងនេះដែលធ្វើការពាក់ព័ន្ធនឹងប្រជាធិបតេយ្យ និងការបោះឆ្នោត ច្បាប់ស្តីពីហិរញ្ញវត្ថុនយោបាយជាសេចក្តីត្រូវការចាំបាច់ និងជាបន្ទាន់មួយសម្រាប់ប្រទេសកម្ពុជាដើម្បីធានាយុត្តិធម៌ តម្លាភាព និងសមភាពនៃដំណើរការប្រកួតប្រជែងក្នុងការបោះឆ្នោត។
លោកគល់ បញ្ញា នាយកអង្គការ Comfrel បានប្រាប់វិទ្យុបារាំងអន្តរជាតិនៅថ្ងៃនេះថា អង្គការរបស់លោករួមជាមួយដៃគូជាច្រើនទៀតបានជំរុញឲ្យមានច្បាប់នេះជាយូរមកហើយ។ បញ្ហានេះក៏ធ្លាប់ត្រូវបានគេលើកទៅពិភាក្សាក្នុងចំណោមសង្គមស៊ីវិល និងគណបក្សនយោបាយនានារួចទៅហើយដែរ ប៉ុន្តែ សេចក្តីព្រាងច្បាប់នេះនៅមិនទាន់ចេញរួចនៅឡើយទេ។ លោក គល់ បញ្ញា ប្រាថ្នាចង់ឃើញច្បាប់នេះចេញឲ្យបានមុនការបោះឆ្នោតជាតិឆ្នាំ ២០១៣ ខាងមុខនេះ។
សូមបញ្ជាក់ថា ច្បាប់ស្តីពីហិរញ្ញវត្ថុនយោបាយនេះតម្រូវឲ្យរដ្ឋាភិបាលមានកញ្ចប់ថវិកាមួយសម្រាប់ផ្តល់ឲ្យការឃោសនានយោបាយរបស់គណបក្សដែលចូលរួមប្រកួតប្រជែងក្នុងការបោះឆ្នោត និងតម្រូវឲ្យមានការត្រួតពិនិត្យហិរញ្ញវត្ថុរបស់គណបក្សនយោបាយផងដែរ។ អវត្តមានរបស់ច្បាប់នេះបានធ្វើឲ្យគណបក្សនយោបាយនីមួយៗត្រូវរកថវិកាដោយខ្លួនឯង តាមមធ្យោបាយដែលគ្មានតម្លាភាព។ គណបក្សនយោបាយជាច្រើនបានគាំទ្រឲ្យមានច្បាប់នេះជាពិសេសគណបក្សប្រឆាំង ប៉ុន្តែ គណបក្សកាន់អំណាចហាក់នៅរារែកនៅឡើយ។
មន្ត្រីរដ្ឋាភិបាលមិនអាចទាក់ទងសុំការពន្យល់បានទេនៅថ្ងៃនេះ ប៉ុន្តែ កន្លងទៅលោក ជាម យៀប តំណាងរាស្ត្រ និងជាមន្ត្រីជាន់ខ្ពស់គណបក្សប្រជាជនកម្ពុជាធ្លាប់បានចូលរួមក្នុងកិច្ចពិភាក្សាបញ្ហានេះដែរ។ ប៉ុន្តែ លោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍ថា រដ្ឋាភិបាលមិនទាន់មានថវិកាសម្រាប់គណបក្សនយោបាយនៅឡើយទេ ពីព្រោះមានតម្រូវការផ្សេងៗជាច្រើននិងចាំបាច់ជាងនេះ។ យ៉ាងណាក៏ដោយ សម្រាប់លោកគល់ បញ្ញា ច្បាប់នេះមានសារៈសំខាន់ណាស់សម្រាប់ពង្រឹងរបបប្រជាធិបតេយ្យសេរីពហុបក្សនៅកម្ពុជា។ លោកនៅតែទទូចឲ្យមានច្បាប់នេះជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ