និយោជិតនិងមន្រ្តីរាជការជាង២០០នាក់ ស្នើឲ្យរដ្ឋបញ្ចុះតម្លៃប្រេងសាំងនិងទំនិញ
នៅព្រឹកថ្ងៃអាទិត្យ កម្មករ កម្មការិនី និងអ្នករត់ម៉ូតូឌុបជាង២០០នាក់ បានជួបជុំគ្នានៅទីលានប្រជាធិបតេយ្យ ដោយស្រែកតាមឧគ្ឃោសនសព្ទ និងលើក បដាទាមទារឲ្យរដ្ឋាភិបាលបញ្ចុះតម្លៃប្រេងសាំង ដែលជាមូលហេតុចម្បងធ្វើឲ្យទំនិញ គ្រប់សារពើនៅលើទីផ្សារ ហក់ឡើងថ្លៃជាលំដាប់។
ចុះផ្សាយនៅថ្ងៃ៖
ស្តាប់ - ០២:០៨
ការជួបជុំគ្នាយ៉ាងប្រញាប់ប្រញាល់ក្នុងថិរវេលាជាង១០នាទី របស់កម្មករនិង អ្នករត់ម៉ូតូឌុបជាង២០០នាក់ នៅព្រឹកមិញនេះ បញ្ចប់ទៅដោយគ្មានចម្លើយ តបពីរដ្ឋាភិបាលក្នុងសំណើសុំបញ្ចុះតម្លៃប្រេងនិងទំនិញ។
អាជ្ញាធរមានសមត្ថកិច្ចជាច្រើននាក់ ដែលឃ្លាំមើលសកម្មភាពទាមទារ របស់ កម្មករ មិនបានរារំាងពួកគេទេ ខណៈដែលមិនមានក្បួនដង្ហែព្យុះហយាត្រា តាមគម្រោងដែលបានព្រាងទុក។
ក្រុមកម្មករដែលធ្វើដំណើរ ពីជាយរាជធានីភ្នំពេញ មកជុំគ្នានៅទីលាន ប្រជាធិបតេយ្យ ក្បែររមណីយដ្ឋានវត្តភ្នំ បានឈរលើកបដា និងស្រែកតាម ឧគ្ឃោសនសព្ទ ដោយសុំឲ្យរដ្ឋាភិបាលកាត់បន្ថយពន្ធនាំចូលប្រេងសាំង រឺឈានទៅដល់ផ្អាកការយកពន្ធសាំងបណ្តោះអាសន្ន ។
លោក សាត់ ឈាងហួ សហភាពជាតិកម្ពុជាការពារកម្មករ ថ្លែងក្នុងក្រុមកូដករ ទាមទារថា តម្លៃប្រេងសាំងខ្ពស់ បានជះឥទ្ធិពលយ៉ាងខ្លាំង ធ្វើឲ្យតម្លៃទំនិញ តម្លៃម្ហូបអាហារ និងការចំណាយផ្សេងៗ មានការកើនឡើងយ៉ាងគំហុក ។ លោកថា ចំណូលរបស់កម្មករ និងអ្នករត់ម៉ូតូឌុប មានការធ្លាក់ចុះ ហើយពួកគេប្រឈមនឹងកង្វះ ខាតស្បៀងអាហារដែលមានជីវជាតិ សម្រាប់ទ្រទ្រង់សរីរាង្គ ដោយសារតែត្រូវត្បិត ត្បៀតចំណូលដ៏តិចតួច។
សហភាពជាតិកម្ពុជាការពារកម្មករ ដែលមានសហជីពចំនួន៥ បានដាក់លិខិត សុំបញ្ចុះតម្លៃប្រេងនិងទំនិញ ទៅលោក ហ៊ុន សែន នាយករដ្ឋមន្រ្តីខ្មែរ ម្តងរួច មកហើយ កាលពីពាក់កណ្តាលខែកក្កដា ។ តែរហូតមកដល់ថ្ងៃអាទិត្យនេះ មិនមានចម្លើយតបនៅឡើយ។
ប្រធានសហភាពជាតិកម្ពុជាការពារកម្មករ បានព្រមានចំពោះរដ្ឋាភិបាលថា ប្រសិនបើគ្មានវិធាន តាមសំណើសុំទេនោះ កម្មករនឹងធ្វើមហាបាតុកម្មអហិង្សា ជាលក្ខណៈទ្រង់ទ្រាយធំជាថ្មីម្តងទៀត ដោយមានការគាំទ្រពីអង្គការជាតិនិង អន្តរជាតិ។
មន្រ្តីអង្គការសិទ្ធិមនុស្សអាដហុក លោក ចាន់ សូវ៉េត បានឲ្យដឹងថាការបណ្តែតបណ្តោយឲ្យក្រុមឈ្មួញ ដំឡើងថ្លៃតាមទំនើងចិត្ត និងការដំឡើងពន្ធនាំចូលកាន់ខ្ពស់របស់រដ្ឋ កំពុងធ្វើឲ្យប្រជាពលរដ្ឋ ៣០ភាគរយ ដែលរស់នៅក្រោមបន្ទាត់ភាពក្រីក្រ មានជីវភាពកាន់តែលំបាក។ លោកអំពាវនាវឲ្យប្រជាពលរដ្ឋខ្មែរទាំងអស់ ជាពិសេស មន្រ្តីរាជការក្លាហានទាមទារឲ្យរដ្ឋបញ្ចុះតម្លៃទំនិញ ដើម្បីកែប្រែជីវភាពរស់នៅរបស់ ពួកគេឲ្យប្រសើរឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ