កម្មករកាត់ដេរធ្វើបាតុកម្មប្រឆាំងទៅនឹងសេចក្តីសម្រេចដំឡើងប្រាក់ខែតិចតួច
នៅព្រឹកថ្ងៃអាទិត្យនេះ កម្មករជាច្រើនរយនាក់បានប្រមូលផ្តុំគ្នានៅពីមុខរដ្ឋសភាជាតិ ដើម្បីទាមទារអោយរដ្ឋាភិបាលនិងថៅកែរោងចក្រកាត់ដេរពិនិត្យនិង ពិភាក្សាឡើងវិញនូវសេចក្តីសម្រេចដំឡើងប្រាក់ខែអប្បបរមាចំនួន១១ ដុល្លារទៅអោយកម្មករកាត់ដេរ កាលពីដើមខែកក្កដាកន្លងមកនេះ។ ប៉ុន្តែក្រសួងការងារបានបញ្ជាក់តបវិញថា ការទាមទារនេះគឺមិនផ្លូវការទេ ពីព្រោះកម្មករភាគច្រើនមិនបានចូលរួមក្នុងបាតុកម្មនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គី សុខលីម
បើទោះបីជាមានការកាក់តាមផ្លូវមិនអោយកម្មករអាចជួបជុំគ្នាបានដោយស្រួលក៏ដោយ ក៏នៅទីបំផុត កម្មករប្រមាណជា៥០០នាក់បានជួបប្រជុំគ្នាជាច្រើនម៉ោងនៅពីមុខរដ្ឋសភាជាតិនៅព្រឹកថ្ងៃអាទិត្យនេះ។
នេះគឺជាការជួបជុំគ្នាលើកដំបូងនៅទីធ្លាសាធារណៈរបស់កម្មកររោងចក្រកាត់ដេរប្រឆាំងទៅនឹងសេចក្តីសម្រេចដំឡើងប្រាក់ខែអប្បបរមារបស់គណៈកម្មាធិការក្រុមប្រឹក្សាការងារ។
កាលពីថ្ងៃទី៨ខែកក្កដាកន្លងមក ក្រុមប្រឹក្សាការងារដែលមានសមាសភាពមកពីរដ្ឋាភិបាល មកពីរោងចក្រកាត់ដេរនិងមកពីសហជីពបានសម្រេចដំឡើងប្រាក់ខែអប្បបរមាជូនកម្មកររោងចក្រកាត់ដេរចំនួន១១ដុល្លារបន្ថែមទៀតលើប្រាក់ខែចាស់ដែលមានចំនួន៥០ដុល្លារអាមេរិក។ ប៉ុន្តែការដំឡើងនេះមិនបានធ្វើអោយកម្មករកាត់ដេរទាំងអស់សប្បាយចិត្តនោះទេ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាដែលដឹកនាំបាតុកម្មកាលពីព្រឹកមិញបានស្រែកបញ្ជាក់តាមមេក្រូថា កម្មករកាត់ដេរមិនពេញចិត្តនឹងការដំឡើងប្រាក់ខែនាពេលកន្លងមកនោះទេ។ បន្ទាប់ពីលោក អាត់ ធន់ ស្រែកហើយ កម្មករស្រែកបន្ទរជាបន្តបន្ទាប់ថា ពួកគេបន្តទាមទារការដំឡើងប្រាក់ខែអប្បបរមាអោយបានក្នុងចន្លោះពី៧៥ទៅ៩៣ដុល្លារអាមេរិក។ នេះគឺជាកម្រិតប្រាក់ខែដែលកម្មករគិតថាអាចរស់បាន ប៉ុន្តែវាមិនមែនជាប្រាក់ខែសមរម្យនោះទេ។
លោក អាត់ ធន់ សំណូមពរថា ភាគីរដ្ឋាភិបាល ថៅកែរោងចក្រកាត់ដេរនិងសហជីពត្រូវតែពិនិត្យនិងចរចារឿងប្រាក់ខែនេះឡើងវិញបើមិនអ៊ីចឹងទេ សហជីពរបស់លោកគ្រោងនឹងធ្វើកូដកម្មធំមួយនៅដើមខែក្រោយនេះ។
លោក មឿង តុលា ប្រធានផ្នែកកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ដែលបានពិនិត្យតាមដានមើលការទាមទារកាលពីព្រឹកមិញដែរនោះបាននិយាយថា ភាគីពាក់ព័ន្ធគួរតែពិនិត្យមើលឡើងវិញនូវអត្រាដំឡើងប្រាក់ខែនាពេលកន្លងមក។
ឆ្លើយតបទៅនឹងការទាមទារខាងលើនេះ លោក អ៊ំ មាន រដ្ឋលេខាធិការក្រសួងការងារ បានបញ្ជាក់នៅថ្ងៃអាទិត្យនេះថា គណៈកម្មាធិការក្រុមប្រឹក្សាការងារមិនអាចចរចាឡើងវិញបានទេ ពីព្រោះការសម្រេចរបស់ក្រុមប្រឹក្សាការងារកាលពីថ្ងៃទី៨ខែកក្កដាកន្លងមកគឺជាសេចក្តីសម្រេចចុងក្រោយហើយបន្ទាប់មក ក្រសួងការងារបានចេញសេចក្តីជូនដំណឹងទៅកាន់ភាគីពាក់ព័ន្ធអស់ហើយ។
លោក អ៊ំ មាន បានចោទប្រកាន់ការតវ៉ានេះថា គឺជាការតវ៉ាមិនផ្លូវការ និងធ្វើឡើងដោយមិនគោរពគោលការណ៍ប្រជាធិបតេយ្យ។ មន្ត្រីជាន់ខ្ពស់រូបនេះបានបន្តទៀតថា ការសម្រេចរបស់ក្រុមប្រឹក្សាការងារនាពេលកន្លងមក គឺកើតចេញពីការបោះឆ្នោតដោយមានសម្លេងគាំទ្រចំនួន២០និងសម្លេងប្រឆាំងចំនួន៥។ ដូច្នេះការធ្វើបាតុកម្មនៅថ្ងៃនេះគឺជាសម្លេងភាគតិច។ សម្លេងភាគតិចត្រូវតែគោរពសម្លេងភាគច្រើន។
សូមបញ្ជាក់ថា សហជីពសេរីកម្មករនៃព្រះរាជាណាចក្រកម្ពុជាដែលដឹកនាំដោយលោក ជា មុន្នី បានធ្វើការប្រឆាំងតវ៉ាខ្លាំងជាងគេទៅនឹងការដំឡើងប្រាក់ខែតិចតួចនិងតៀមធ្វើកូដកម្មទូទាំងប្រទេសទៀតផង ប៉ុន្តែនៅទីបញ្ចប់ មេដឹកនាំសហជីពរូបនេះបានបោះបង់គម្រោងកូដកម្មចោលទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ