ថៃមិនទាន់ដោះលែងពលករខ្មែរទាំង១៤នាក់ទេ
ក្រោយការផ្សព្វផ្សាយរបស់សារព័ត៌មានថៃថានឹងមានការដោះលែងពលករខ្មែរទាំង១៤នាក់ដែលកំពុងជាប់ពន្ធនាគារក្នុងស្រុកថៃនោះ នៅថ្ងៃព្រហស្បតិ៍ទី៣ កក្កដា ក្រសួងការបទេសកម្ពុជាបានបញ្ជាក់ថា ពុំទាន់មានព័ត៌មានផ្លូវការណាមួយត្រូវបានបញ្ជាក់មកភាគីថៃនោះទេ។ ប៉ុន្តែគេរំពឹងថាពលករខ្មែរនឹងត្រូវបានដោះលែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
អ្នកនាំពាក្យក្រសួងការបរទេសកម្ពុជា លោក កុយ គួងបានបញ្ជាក់ថា រហូតមកដល់ថ្ងៃព្រហស្បតិ៍នេះ មិនទាន់មានដំណឹងជាផ្លូវការណាមួយត្រូវបានភាគីថៃបានផ្តល់មកកាន់ភាគីកម្ពុជាស្តីពីបញ្ហាពលករនោះទេ។ លោកបានសង្កត់ធ្ងន់ថា ស្ថានទូតកម្ពុជានិងអគ្គកុងស៊ុលកម្ពុជា កំពុងតាមដានពីបញ្ហានេះ។
ការថ្លែងបញ្ជាក់យ៉ាងដូចនេះ គឺធ្វើឡើងក្រោយពីបណ្តាញព័ត៌មានថៃដែលបានចេញផ្សាយកាលពីម្សិលមិញដោយដកស្រង់សម្តីរដ្ឋមន្ត្រីក្រសួងយុត្តិធម៌ស្តីទីរបស់ថៃថា ពលករខ្មែរចំនួន១៤នាក់ដែលកំពុងជាប់ពន្ធនាគារនៅថៃនឹងត្រូវបានដោះលែងបន្ទាប់ពីសកម្មជនអាវលឿងថៃ វីរៈស៊ុមខ្វាមឃីត បានវិលត្រឡប់ទៅដល់ទឹកដីថៃវិញ។ បើតាមបាងកកប៉ុស្តិ៍ ភាគីថៃបានអះអាងពលករខ្មែរទាំងអស់នៅមិនទាន់ត្រូវបានតុលាការកាត់ទោសនៅឡើយទេ ។ដូចនេះថៃអាចអនុវត្តតាមសំណើរបស់កម្ពុជាដោយទម្លាក់ការចោទប្រកាន់ទាំងអស់ និងបញ្ជូនមកកាន់កម្ពុជាវិញ។
ដំណឹងនៃការប្រកាសដោះលែងពលករខ្មែរចំនួន១៤នាក់ដែលកើតឡើងក្រោយកម្ពុជាដោះលែងមេដឹកនាំសកម្មជនអាវលឿងថៃ វីរៈស៊ុមខ្វាមឃីតនេះ បានបណ្តាលឱ្យមានការលើកឡើងថា កម្ពុជា និងថៃដោះដូរអ្នកទោសគ្នា។ ប៉ុន្តែលោកនាយករដ្ឋមន្ត្រីហ៊ុន សែន នៅព្រឹកថ្ងៃព្រហស្បតិ៍ទី៣កក្កដានេះ បានបដិសេធថា ការដោះលែងសកម្មជនអាវលឿង វីរៈ ស៊ុមខ្វាមឃីត មិនមែនជាថ្នូរនៃការដោះលែងពលករខ្មែរខុសច្បាប់ក្នុងពន្ធនាគារថៃទេ។
យ៉ាងណាក៏ដោយ លោកនាយករដ្ឋមន្ត្រី បានស្នើឱ្យប្រមុខរដ្ឋាភិបាលយោធាថៃ ប្រាយុទ្ធ ចាន់អ៊ូចា គួរពិចារណាដោះលែងពលករខ្មែរទាំង ១៤នាក់ ដែលតម្រួតថៃចាប់ខ្លួន ព្រោះកាន់លិខិតឆ្លងដែនខុសច្បាប់។
សូមបញ្ជាក់ជូនថា ពលករខ្មែរចំនួន១៤នាក់ត្រូវបានអាជ្ញាធរថៃចាប់ឃាត់ខ្លួនកាលពីដើមខែមិថុនាកន្លងទៅដោយសារការប្រើប្រាស់លិខិតឆ្លងដែន និងបណ្ណការងារក្លែងក្លាយ។ ប៉ុន្តែយ៉ាងណាក៏ដោយ គេនៅរំពឹងថា ពលករខ្មែរចំនួន១៤នាក់ដែលកំពុងជាប់ពន្ធនាគារនៅស្រុកថៃ នឹងត្រូវបានដោះលែងក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ