សហព័ន្ធនិស្សិតបញ្ញវន្តកម្ពុជា គ្រោងបើកសិក្ខាសាលាស្តីពីរឿងរ៉ាវទឹកដីកម្ពុជាក្រោមរៀងរាល់សប្តាហ៍
សហព័ន្ធនិស្សិតបញ្ញវន្តកម្ពុជា គ្រោងរៀបចំសិក្ខាសាលាស្តីពីរឿងរ៉ាវនៃទឹកដីកម្ពុជាក្រោម ជារៀងរាល់សប្តាហ៍ និង ឲ្យបានគ្រប់ខេត្តក្រុងនៅទូទាំងប្រទេសកម្ពុជា។ នេះបើតាមសេចក្តីអំពាវនាវរបស់សហព័ន្ធនិស្សិតបញ្ញវន្តកម្ពុជា ដែលបានចេញផ្សាយកាលពីថ្ងៃ សៅរ៍ ទី ០៩ សីហា ម្សិលមិញ។ លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជាបានអះអាងថា សិក្ខាសាលានេះ នឹងធ្វើឲ្យប្រជាពលរដ្ឋក៏ដូចជា សិស្ស និស្សិតខ្មែរយល់ដឹងបានកាន់តែច្បាស់ពីប្រវត្តិសាស្ត្រទឹកដីកម្ពុជាក្រោម។
ចុះផ្សាយនៅថ្ងៃ៖
ចាប់ពីសប្តាហ៍ក្រោយនេះតទៅ សហព័ន្ធនិស្សិតបញ្ញវន្តកម្ពុជានឹងបើកសិក្ខាសាលាមួយស្តីពីរឿងរ៉ាវទឹកដីកម្ពុជាក្រោម ជារៀងរាល់ចុងសប្តាហ៍ ដល់សិស្សនិស្សិតខ្មែរដែលមិនទាន់បានយល់ដឹងស៊ីជម្រៅពីរឿងទឹកដីកម្ពុជាក្រោមនេះ។
តាមរយៈសេចក្តីអំពាវនាវចុះថ្ងៃទី ០៩ សីហា សហព័ន្ធនិស្សិតបញ្ញវន្តកម្ពុជាបានលើកឡើងថា សិស្សនិស្សិតខ្មែរមួយចំនួនមិនបានដឹងពីប្រវត្តិសាស្ត្ររឿងរ៉ាវទឹកដីកម្ពុជាក្រោម ដែលធ្វើឲ្យវត្តមានរបស់ពួកគេចូលរួមបាតុកម្មទាមទារឲ្យអ្នកនាំពាក្យស្ថានទូតវៀតណាមសុំទោសចំពោះរឿងទឹកដីកម្ពុជាក្រោមនាពេលកន្លងមក នៅមានកម្រិត។ តាមរយៈសេចក្តីអំពាវនាវនេះ សហព័ន្ធនិស្សិតបញ្ញវន្តកម្ពុជា បានចោទរដ្ឋាភិបាលថា មិនបានឲ្យសិស្សនិស្សិតខ្មែរចេះដឹងពីប្រវត្តិទាក់ទងនឹងទឹកដីកម្ពុជាក្រោមនេះ។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា បានប្រាប់វិទ្យុបារាំងអន្តរជាតិនៅថ្ងៃអាទិត្យ ទី ១០ សីហា បន្ថែមពីសេចក្តីអំពាវនាវនោះថា សិស្សនិស្សិតក្មេងៗបច្ចុប្បន្ន មិនបានរៀនពីប្រវត្តិសាស្ត្រទឹកដីកម្ពុជាក្រោមទេ ឫរៀនប្រវត្តិសាស្ត្របានតិចតូចបំផុត។ ដូច្នេះសិក្ខាសាលានេះនឹងជួយអប់រំដល់សិស្សនិស្សិតទាំងនោះបានដឹងច្បាស់ពីប្រវត្តិសាស្ត្រទឹកដីកម្ពុជាក្រោមដែលបានបាត់បង់ទៅឲ្យប្រទេសវៀតណាម។ លោក បន្តថា សិក្ខាសាលានេះនឹងធ្វើឡើងរៀងរាល់ថ្ងៃអាទិត្យ ចាប់ពីសប្តាហ៍ក្រោយនេះតទៅ ដោយជំហានដំបូងចាប់ផ្តើមនៅរាជធានីភ្នំពេញ និង បន្តទៅគ្រប់ខេត្តក្រុងទាំងអស់នៅទូទាំងប្រទេសកម្ពុជាប្រសិនបើមានលទ្ធភាននោះ។
លោក ម៉ៅ ពិសេស បានអំពាវនាវដល់សាធារណជនទាំងអស់ជួយឧបត្ថម្ភជាថវិកាដើម្បីទិញសៀវភៅប្រវត្តិសាស្ត្រនៃទឹកដីកម្ពុជាក្រោម បោះពុម្ភអាវយឺត ទឹកបរិសុទ្ធ និង សម្រាប់ការចំណាយលើការធ្វើដំណើរចុះទៅធ្វើសិក្ខាសាលានៅតាមបណ្តាខេត្តនានា។
សូមបញ្ជាក់ថា សហព័ន្ធនិស្សិតបញ្ញវន្តកម្ពុជាធ្លាប់បានដឹកនាំបាតុកម្មទាមទារឲ្យអ្នកនាំពាក្យស្ថានទូតវៀតណាមប្រចាំនៅកម្ពុជាធ្វើការសុំទោសចំពោះការលើកឡើងរបស់ខ្លួនដែលថា ទឹកដីកម្ពុជាក្រោមជារបស់វៀតណាមតាំងពីយូរយារណាស់មកហើយនោះ ចំនួនពីរលើករួច
មកហើយ។ ចំណែកគម្រោងរៀបចំសិក្ខាសាលានេះ គឺជាបេសកកម្មថ្មីមួយទៀតរបស់សហព័ន្ធនេះក្នុងបង្រៀនឲ្យយុវជនយល់បានច្រើនពីទឹកដីកម្ពុជាក្រោម ដែលអាចឲ្យពួកគេចួលរូមបាតុកម្មតវ៉ាឲ្យអ្នកនាំពាក្យសុំទោសចំពោះការលើកឡើងរបស់ខ្លួនបានច្រើនថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ