សមាគមខ្មែរកម្ពុជាក្រោមនឹងប្រើប្រាស់ទីលានប្រជាធិបតេយ្យមុនគេ បន្ទាប់ពីបើកឡើងវិញ
បន្ទាប់ពីបើកឲ្យមានការជួបជុំសម្តែងមតិឡើងវិញកាលពីថ្ងៃទី ០៥ សីហា ទីលានប្រជាធិបតេយ្យដែលបានជាប់ឃុំជាច្រើនខែនោះ នឹងត្រូវសមាគមខ្មែរកម្ពុជាក្រោមប្រើប្រាស់មុនគេ ។ ក្រោយជួបពិភាក្សាគ្នានៅរសៀលថ្ងៃ សុក្រនេះ សាលារាជធានីភ្នំពេញ បានអនុញ្ញាតឲ្យសមាគមខ្មែរកម្ពុជាក្រោម ធ្វើការជួបជុំជាមួយប្រជាពលរដ្ឋ និង ក្រុមយុវជនផ្សេងទៀតនៅលើទីលានប្រជាធិបតេយ្យនៅថ្ងៃទី ១១ សីហាខាងមុខ ដើម្បីជួបជុំ សម្តែងមតិទាមទារឲ្យអ្នកនាំពាក្យស្ថានទូតវៀតណាមសុំទោសរឿងទឹកដីកម្ពុជាក្រោម។ ប៉ុន្តែមិនឲ្យមានការហែរក្បួនដាក់ញ្ញតិក្រោមទ្រង់ទ្រាយធំនោះទេ។
ចុះផ្សាយនៅថ្ងៃ៖
ស្តាប់ - ០២:០២
សាលារាជធានីភ្នំពេញបានអនុញ្ញាតឲ្យសមាគមខ្មែរកម្ពុជាក្រោម ធ្វើការជួបជុំគ្នាសម្តែងមតិនៅលើទីលានប្រជាធិបតេយ្យ ។ ជាការជួបជុំ ទាមទារឲ្យអ្នកនាំពាក្យស្ថានទូតវៀតណាមប្រចាំនៅកម្ពុជា ធ្វើការសុំទោស និង ទទួលស្គាល់ប្រវត្តិសាស្ត្រពិតនៃការបាត់បង់ទឹកដីកម្ពុជាក្រោមទៅឲ្យវៀតណាម។
លោក ថាច់ សេដ្ឋា ប្រធានសមាគមខ្មែរកម្ពុជាក្រោម បានថ្លែងប្រាប់វិទ្យុបារាំងអន្តរជាតិនៅល្ងាចនេះថា សាលារាជធានីភ្នំពេញបានឯកភាពឲ្យសមាគមខ្មែរកម្ពុជាក្រោមធ្វើការជួបជុំនៅលើទីលានប្រជាធិបតេយ្យនៅថ្ងៃទី ១១ សីហា តែបានបដិសេធមិនឲ្យមានហែរក្បួនទ្រង់ទ្រាយធំនោះទេ។
បើតាមគម្រោង សមាគមខ្មែរកម្ពុជាក្រោម នឹងជួបជុំជាមួយប្រជាពលរដ្ឋ ជាងមួយពាន់នាក់ ហែក្បួន យកញត្តិទៅដាក់នៅក្រសួងការបរទេស បណ្តាស្ថានទូតប្រទេសអាស៊ាន និង ស្ថានទូតវៀតណាម ដើម្បីទាមទារឲ្យអ្នកនាំពាក្យស្ថានទូតសុំទោសចំពោះការលើកឡើងរបស់ខ្លួនដែលថា ទឹកដីកម្ពុជាក្រោម ជារបស់វៀតណាមតាំងពីយូរយារណាស់មកហើយនោះ។ ប៉ុន្តែសាលារាជធានីភ្នំពេញ កំណត់ឲ្យជួបជុំមិនលើសពី ២០០ នាក់ និង អនុញ្ញាតឲ្យមានតំណាងយកញត្តិទៅដាក់នៅស្ថានទូត តែមិនអនុញ្ញាតឲ្យហែក្បូននោះទេ។
យ៉ាងណាក៏ដោយ លោក ថាច់ សេដ្ឋា បានឯកភាពជាគោលការណ៍ហើយជាមួយសាលារាជធានីភ្នំពេញ ប៉ុន្តែការកំណត់ចំនួនមនុស្សមិនលើសពី ២០០ នាក់នោះ មិនទាន់ត្រូវរ៉ូវគ្នានៅឡើយទេ។
លោក ឡុង ឌីម៉ង់ អ្នកនាំសាលារាជធានីភ្នំពេញ បានបញ្ជាក់ប្រាប់វិទ្យុបារាំងអន្តរជាតិដែរថា ការកំណត់មនុស្សចូលរួមនេះ សាលារាជធានីភ្នំពេញនឹងស្នើសុំគោលការណ៍ពីក្រសួងមហាផ្ទៃជាបន្តទៀត។ អ្នកនាំពាក្យសាលារាជធានីភ្នំពេញ បានគូសបញ្ជាក់ថា មូលហេតុដែលសាលារាជធានីភ្នំពេញមិនអនុញ្ញាតឲ្យសមាគមខ្មែរកម្ពុជាក្រោមធ្វើហែក្បួននោះ ព្រោះវាអាចប៉ះពាល់ដល់សន្តិសុខសណ្តាប់ធ្នាប់សាធារណៈ និង ធ្វើឲ្យកកស្ទះចរាចរណ៍នៅក្នុងរាជធានីភ្នំពេញ។
សូមបញ្ជាក់ថា សមាគមខ្មែរកម្ពុជាក្រោម រួួមទាំងសហព័ន្ធនិស្សិតបញ្ញវន្តកម្ពុជា និង ក្រុមយុវជនផ្សេងទៀតធ្លាប់បានដឹកនាំប្រជាពលរដ្ឋធ្វើការតវ៉ាទាមទារឲ្យអ្នកនាំពាក្យស្ថានទូតវៀតណាមប្រចាំកម្ពុជាសុំទោសជាសាធារណៈពីរម្តងរួចមកហើយ តែអ្នកនាំពាក្យស្ថានទូតវៀតណាមនៅតែមិនចេញមកសុំទោសដល់ប្រជាពលរដ្ឋខ្មែរដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ