ការបង្រ្កាបបាតុកម្មនៅកម្ពុជាត្រូវបានចុះផ្សាយព្រោងព្រាតលើបណ្តាញព័ត៌មានបរទេស
ហេតុការណ៍បង្រ្កាបបាតុកម្មនៅក្នុងប្រទេសកម្ពុជា ដែលបណ្តាលឲ្យស្លាប់ និងរបួសមនុស្សជាច្រើននាក់ កាលពីថ្ងៃសុក្រ គឺជាប្រធានបទដ៏សំខាន់មួយ ដែលត្រូវបានចុះផ្សាយព្រោងព្រាត ដោយបណ្តាញព័ត៌មានបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
“កម្ពុជា៖ ប៉ូលិសបាញ់ប្រហារទៅលើបាតុករជាកម្មករកាត់ដេរ” នេះគឺជាចំណងជើងអត្ថបទរបស់កាសែតបារាំង ឈ្មោះ Libération ចុះផ្សាយ នៅថ្ងៃសៅរ៍នេះ។ Libération ដែលជាកាសែតឆ្វេងនិយម ស្និទ្ធនឹងគណបក្សកាន់អំណាចបារាំង បានគូសបញ្ជាក់ថា ការបង្រ្កាបបាតុកម្ម “ដែលបណ្តាលឲ្យស្លាប់មនុស្សយ៉ាងតិច ៣នាក់ កាលពីថ្ងៃសុក្រ កំពុងតែធ្វើឲ្យវិបត្តិសង្គម និងនយោបាយកម្ពុជា ដែលបានអូសបន្លាយពេល ៦ខែមកហើយនោះ មានសភាពកាន់តែធ្ងន់ធ្ងរ”។ កាសែត Libération ក៏បានគូសបញ្ជាក់ផងដែរថា កម្មករកាត់ដេរនៅកម្ពុជាភាគច្រើនធ្វើការឲ្យម៉ាកសម្លៀកបំពាក់ធំៗខ្នាតអន្តរជាតិ។
កាសែត Le Figaro ដែលជាកាសែតស្និទ្ធនឹងបក្សប្រឆាំងបារាំង ក៏បានចុះផ្សាយពីហេតុការណ៍បង្រ្កាបបាតុកម្មនៅកម្ពុជាដែរ ដោយបានសរសេរនៅក្នុងលេខចុះផ្សាយថ្ងៃសៅរ៍នេះថា “គណបក្សប្រឆាំងដឹកនាំដោយលោកសមរង្ស៊ីបរិហាររិះគន់ការបង្រ្កាបដោយបង្ហូរឈាមទៅលើបាតុករ ក្នុងពេលដែលកំហឹងផ្ទុះឡើងកាន់តែខ្លាំង ចំពោះនាយករដ្ឋមន្រ្តីកម្ពុជា"។ កាសែត Le Figaro បានរំឭកអំពីដំណើរដើមហេតុនៃបាតុកម្មថា កម្មករកាត់ដេរទាមទារឲ្យដំឡើងប្រាក់ខែ ១ទ្វេជាពីរ ពោលគឺពី ៨០ដុល្លារក្នុងមួយខែនាពេលបច្ចុប្បន្ន ទៅ ១៦០ដុល្លារក្នុងមួយខែ។ ចំណែករដ្ឋាភិបាលកម្ពុជាវិញ បដិសេធមិនដំឡើងលើសពី ១០០ដុល្លារ។
“ការបាញ់ប្រហារបង្រ្កាបបាតុកម្មបានកើតមានឡើង នៅក្នុងពេលដែលកម្មករកាត់ដេររាប់ពាន់នាក់នាំគ្នាបិទផ្លូវនៅមុខរោងចក្រ ហើយបាតុករខ្លះ ដែលប្រដាប់ដោយដំបង ដុំថ្ម និងដបសាំង នាំគ្នាប្រឈមមុខនឹងកម្លាំងរដ្ឋាភិបាល” នេះគឺជាការសរសេររៀបរាប់របស់កាសែតបារាំងមួយទៀត ឈ្មោះ Lemonde។
ចំពោះសារព័ត៌មានជាភាសាអង់គ្លេសវិញ គេឃើញថា កាសែតអាមេរិក The Washington Post, The New York Times, The Wall Street Journal ទស្សនាវដ្តី Times ព្រមទាំងបណ្តាញទូរទស្សន៍អន្តរជាតិ ដូចជា CNN, BBC និង Al Jazeera ជាដើម សុទ្ធតែនាំគ្នាចាប់អារម្មណ៍ទៅលើហេតុការណ៍បង្រ្កាបបាតុកម្មនៅកម្ពុជា។
ទូរទស្សន៍ CNN បានធ្វើការកត់សម្គាល់ទៅលើតួលេខខុសៗគ្នា រវាងអាជ្ញាធរនិងសង្គមស៊ីវិល ដោយមន្រ្តីប៉ូលិសក្រុងអះអាងថា ការបង្រ្កាបបាតុកម្ម កាលពីថ្ងៃសុក្រ បណ្តាលឲ្យមនុស្សស្លាប់ ៣នាក់ និងរបួស ២នាក់ ចំណែកឯអង្គការសិទ្ធិមនុស្សវិញអះអាងថា មានមនុស្សយ៉ាងតិច ៤នាក់ត្រូវបាត់បង់ជីវិត និងរាប់សិបនាក់ផ្សេងទៀតរងរបួស។
“ស្នងការរងនគរបាលរាជធានីភ្នំពេញបានទទួលស្គាល់ថា បាតុករត្រូវបានបង់ជីវិត នៅពេលដែលប៉ូលិសបានប្រើកាំភ្លើងធុន អាកា ដើម្បីបាញ់បំបែកបាតុកម្ម” នេះបើតាមកាសែត The New York Times។ កាសែត The New York Times ដែលបានចុះផ្សាយអត្ថបទមួយនៅលើវិបសៃត៍របស់ខ្លួន នៅថ្ងៃសៅរ៍នេះ ដោយដាក់ចំណងជើងថា “ប៉ូលិសកម្ពុជាបំបែកបាតុករនៅទីលានប្រជាធិបតេយ្យ” មួយថ្ងៃមុនបាតុកម្មទ្រង់ទ្រាយធំ ដែលគ្រោងធ្វើនៅថ្ងៃអាទិត្យ។ New York Times ក៏បានបញ្ជាក់ផងដែរថា នៅក្នុងការបំបែកបាតុកម្មនៅទីលានប្រជាធិបតេយ្យ នៅព្រឹកថ្ងៃសៅរ៍នេះ មិនមានអំពើហិង្សា ដូចការបង្រ្កាបបាតុកម្ម កាលពីល្ងាចថ្ងៃសុក្រម្សិលមិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ