រាជរដ្ឋាភិបាលកម្ពុជា ការពារខ្លួនពីការចោទប្រកាន់ក្រោយការបង្ក្រាបដោយហិង្សា និងការបោសសម្អាតទីលានប្រជាធិបតេយ្យ
រាជរដ្ឋាភិបាលកម្ពុជា នៅរសៀលថ្ងៃទី៤មករានេះ បានបើកធ្វើសន្និសីទកាសែតមួយនៅទីស្ដីការគណៈរដ្ឋមន្ដ្រី ដើម្បីថ្លែងការពារខ្លួនពីការចោទប្រកាន់ទាំងឡាយ របស់អង្គការសង្គមស៊ីវិល និងសហគមន៍អន្ដរជាតិ។ ជាការចោទប្រកាន់ និងថ្កោលទោស ពាក់ព័ន្ធនឹងការបង្ក្រាបដោយហិង្សាចាប់តាំងពីថ្ងៃទី២មករា រហូតដល់ការបណ្ដេញបាតុកររបស់គណបក្សប្រឆាំង ចេញពីទីលានប្រជាធិបតេយ្យ នៅពេលថ្ងៃត្រង់កន្លងទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
លោកកែវ រ៉េមី រដ្ឋលេខាធិការនៃទីស្ដីការគណៈរដ្ឋមន្ដ្រី បានបញ្ជាក់នៅក្នុងសន្និសីទកាសែតមួយ ដែលរៀបចំធ្វើនៅរសៀលថ្ងៃទី៤មករា ថា រាជរដ្ឋាភិបាលកម្ពុជា គាំទ្របាតុកម្មអហិង្សា។ ក៏ប៉ុន្តែបើតាមលោកកែវ រ៉េមី សំណើរបស់គណបក្សប្រឆាំងចុងក្រោយនេះ ដើម្បីធ្វើបាតុកម្មជារៀងរាល់ថ្ងៃ និងជារៀងរហូត មានចរិតផ្ដួលរំលំ។ ការបោសសម្អាតទីលានប្រជាធិបតេយ្យនៅថ្ងៃទី៤មករានេះ ធ្វើឡើងដើម្បីរក្សាស្ថានការណ៍ឲ្យមានភាពស្ងប់ស្ងាត់ និងបញ្ចៀសកុំឲ្យមានអនាធិបតេយ្យនៅក្នុងសង្គម។
ទាក់ទងនឹងអំពើបង្ក្រាបដោយហិង្សារបស់សមត្ថកិច្ច ទៅលើក្រុមបាតុករក្នុងអំឡុងពេលពីរថ្ងៃកន្លងមកនេះ លោកកែវ រ៉េមី បានបដិសេធចំពោះការប្រើប្រាស់ពាក្យថា «បង្ក្រាប»។ លោកថា មិនអាចប្រើប្រាស់ពាក្យបង្ក្រាបបានទេ ព្រោះមែនទែនទៅវាជាការការពាររបស់សមត្ថកិច្ច ឆ្លើយតបទៅនឹងការវាយប្រហាររបស់ក្រុមជនអនាធិបតេយ្យ។
អំពើហិង្សាដែលបណ្ដាលឲ្យមានមនុស្សស្លាប់ និងរងរបួសជាច្រើននាក់ ត្រូវបានរដ្ឋលេខាធិការរូបនេះ អះអាងថា ជាការទទួលខុសត្រូវរបស់ក្រុមជនអនាធិបតេយ្យដែលជាអ្នកញុះញង់ និងអ្នកគាំទ្រអ្នកញុះញង់ គឺគណបក្សសង្គ្រោះជាតិ។ ប៉ុន្តែប្រធានគណបក្សប្រឆាំង លោក សម រង្ស៊ី ធ្លាប់បានទាត់ចោលយ៉ាងដាច់អហង្ការ ការចោទប្រកាន់ដែលថា បក្សសង្គ្រោះជាតិជាអ្នកអុជអាលអំពើហិង្សានេះ។
ទោះបីជាបែបណាក៏ដោយ ដើម្បីដោះស្រាយបញ្ហានាពេលបច្ចុប្បន្ន រដ្ឋាភិបាលរបស់គណបក្សប្រជាជនកម្ពុជា បានអះអាងថា មានតែការចរចាមួយតែប៉ុណ្ណោះ ដែលជាដំណោះស្រាយមានប្រសិទ្ធភាព។ លោកកែវ រ៉េមី បានបញ្ជាក់ថា គណបក្សប្រជាជនកម្ពុជា នៅតែបើកទ្វារចំហជានិច្ចសម្រាប់ការចរចា ជាមួយគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ