សារនយោបាយនៃភាពតានតឹង កើតឡើងជាថ្មី
សញ្ញានៃភាពតានតឹងនយោបាយ បានកម្រើកឡើងវិញហើយ រវាងគណបក្សជាប់ឆ្នោតទាំងពីរ។ នៅថ្ងៃចន្ទនេះ ទន្ទឹមនឹងថ្លែងអំណរគុណដល់អ្នកបោះឆ្នោត គាំទ្រគណបក្សប្រជាជន លោកនាយករដ្ឋមន្ដ្រីហ៊ុន សែន ក៏ឆ្លៀតវាយបកបក្សប្រឆាំងវិញថា ពួកគេក៏មានមុខដដែលៗ ដូចបក្សកាន់អំណាចដែរ។ ចំណែកលោកសម រង្ស៊ី ក៏បានទទួលស្គាល់ដែរថា ដំណោះស្រាយនយោបាយ មិនទាន់ដោះស្រាយបាននៅឡើយទេ បើទោះជាពេលនេះ គណបក្សទាំងពីរ កំពុងចរចារឿងកំណែទម្រង់បោះឆ្នោតក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
ថ្លែងក្នុងឱកាសសម្ពោធផ្លូវក្នុងខេត្តបាត់ដំបងនៅព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានថ្លែងអំណរគុណសារជាថ្មីទៀត ដល់អ្នកបោះឆ្នោតគាំទ្រគណបក្សប្រជាជនកម្ពុជាទាំងអស់។ សម្រាប់ប្រមុខដឹកនាំរដ្ឋាភិបាលគណបក្សប្រជាជន ការគាំទ្រនេះហើយដែលអនុញ្ញាតឲ្យរដ្ឋាភិបាលរបស់លោក អាចដឹកនាំប្រទេសរហូតដល់សព្វថ្ងៃ។
ការថ្លែងអំណរគុណដល់អ្នកបោះឆ្នោតមិនមែនជាសារនយោបាយតែមួយគត់របស់លោកនាយករដ្ឋមន្ត្រី ហ៊ុន សែន ទេ ប៉ុន្តែ លោកក៏បានឆ្លៀតសៀតស៊កឲ្យគណបក្សប្រឆាំងផងដែរ។ លោកអះអាងថា ពួកគេតែងរិះគន់ថា រដ្ឋាភិបាលមានមុខដដែលៗ ប៉ុន្តែ បក្សប្រឆាំងក៏មានមុខដដែលៗដូចគ្នាដែរ។
សម្រាប់លោកនាយករដ្ឋមន្ត្រី ហ៊ុន សែន រដ្ឋាភិបាលមុខដដែលៗនឹងបន្តដឹកនាំប្រទេសយូរតទៅទៀត ពីព្រោះតែប្រជាជនត្រូវការមនុស្សមុខដដែលៗនោះ។ សេចក្តីថ្លែងការណ៍បែបនេះ បានកើតឡើងស្របពេលដែលក្រុមការងារបច្ចេកទេសគណបក្សទាំងពីរ កំពុងបើកកិច្ចចរចានៅឯភ្នំពេញ។ កិច្ចចរចាដែលមិនទទួលបានលទ្ធផលអ្វីទេ នៅព្រឹកថ្ងៃចន្ទនេះ។
គណបក្សសង្គ្រោះជាតិក៏តែងតែបង្ហាញជំហរដាច់ខាតមិនដកថយដែរ ចំពោះការទាមទារឲ្យបោះឆ្នោតឡើងវិញ។ លោក សម រង្ស៊ី បានថ្លែងសារចុងក្រោយមួយ កាលពីថ្ងៃទី ៦ មីនា តាមរយៈបណ្តាញសង្គម ហ្វេសប៊ុក ដោយបញ្ជាក់ជំហរថា គណបក្សសង្គ្រោះជាតិនឹងមិនចូលប្រជុំសភាជាដាច់ខាត ដរាបណាគ្មានការបោះឆ្នោតមុនអាណត្តិទេនោះ។
គួរកត់សម្គាល់ថា ខណៈដែលវិបត្តិនយោបាយនៅតែជាប់គាំងដោះស្រាយមិនចេញ គណបក្សទាំងពីរ ក៏បានទុកបញ្ហានយោបាយមួយឡែកសិន ហើយងាកមកចរចាថ្នាក់បច្ចេកទេស ទាក់ទងនឹងកំណែទម្រង់បោះឆ្នោតវិញ។ កិច្ចចរចានេះ ត្រូវបានលោក សម រង្ស៊ី បញ្ជាក់ច្បាស់ថា មិនមែនជាដំណោះស្រាយនយោបាយទេ។
តាមរយៈសេចក្តីថ្លែងការណ៍របស់លោកនាយករដ្ឋមន្ត្រី ហ៊ុន សែន នៅថ្ងៃចន្ទនេះ គេក៏អាចយល់បានដែរថា គណបក្សប្រជាជន ក៏នៅតែប្រកាន់ជំហរដាច់ខាតដដែលដែរ ក្នុងនាមជាអ្នកឈ្នះឆ្នោតដឹកនាំប្រទេស។ ជំហរតឹងរ៉ឹងរៀងៗខ្លួនរបស់គណបក្សជាប់ឆ្នោតទាំងពីរជាសញ្ញាថា វិបត្តិនយោបាយនៅបន្តអូសបន្លាយយូរតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ