លោក សម រង្ស៊ី ប្រាប់អ្នកគាំទ្រម្តងទៀត កុំឲ្យបារម្ភរឿងចូលប្រជុំសភា
កិច្ចចរចារវាងក្រុមការងារបច្ចេកទេសរវាងគណបក្សប្រជាជនកម្ពុជានិងគណបក្សសង្គ្រោះជាតិស្តីពីកំណែទម្រង់បោះឆ្នោតពេលនេះកំពុងធ្វើឲ្យអ្នកគាំទ្រគណបក្សប្រឆាំងរំជើបរំជួលនិងព្រួយបារម្ភថា គណបក្សសង្គ្រោះជាតិអាចយល់ព្រមចូលប្រជុំសភាវិញដោយបោះបង់ការទាមទារឲ្យបោះឆ្នោតឡើងវិញ។ ស្ថានការណ៍នេះបានជំរុញឲ្យមេដឹកនាំគណបក្សសង្គ្រោះជាតិចេញមុខពន្យល់អ្នកគាំទ្រគ្រប់ច្រកល្ហក។ លោក សម រង្ស៊ី ប្រាប់អ្នកគាំទ្រតាមរយៈ ហ្វេសប៊ុក នៅថ្ងៃទី៦មីនានេះថា សង្គ្រោះជាតិនឹងមិនចូលប្រជុំសភាទេបើគ្នាការបោះឆ្នោតឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
តាមរយៈសារជាសំឡេងដែលត្រូវបានបង្ហោះតាមបណ្តាញសង្គម ហ្វេសប៊ុក នៅថ្ងៃព្រហស្បតិ៍ទី ៦ មីនានេះ លោក សម រង្ស៊ី ប្រធានគណបក្សសង្គ្រោះជាតិបានបញ្ជាក់ប្រាប់អ្នកគាំទ្ររបស់ខ្លួនជាថ្មីម្តងទៀតថា គ្មានទេការចូលប្រជុំសភាប្រសិនបើគ្មានការរៀបចំបោះឆ្នោតមុនអាណត្តិទេនោះ។
ការបញ្ជាក់ជំហរបែបនេះបានធ្វើឡើងខណៈដែលក្រុមការងារបច្ចេកទេសគណបក្សទាំងពីរគ្រោងជួបគ្នាជាថ្មីម្តងទៀតនៅថ្ងៃទី១០មីនាដើមសប្តាហ៍ក្រោយនេះ។ ចាប់តាំងពីគណបក្សជាប់ឆ្នោតទាំងពីរបានព្រមព្រៀងគ្នានិយាយពីកំណែទម្រង់បោះឆ្នោតមកម្ល៉េះ មេដឹកនាំគណបក្សសង្គ្រោះជាតិបានបើកយុទ្ធនាការចុះជួបប្រជាពលរដ្ឋអ្នកបោះឆ្នោតនៅគ្រប់ច្រកល្ហក ដើម្បីបញ្ជាក់ជំហរប្រាប់អ្នកគាំទ្ររបស់ខ្លួន។
យុទ្ធនាការនេះមិនមែនជារឿងចៃដន្យទេ ប៉ុន្តែ ដំណឹងស្តីពីការចរចាជាមួយគណបក្សប្រជាជនកម្ពុជាធ្វើឲ្យរំជើបរំជួលក្នុងចំណោមអ្នកគាំទ្រគណបក្សបក្រឆាំង។ ពួកគេព្រួយបារម្ភថា គណបក្សនេះអាចនឹងចូលប្រជុំសភាដោយបោះបង់ការទាមទារឲ្យបោះឆ្នោតឡើងវិញ។ នៅតាមបណ្តាខេត្ត ក៏ដូចជាតាមរយៈសារជាសំឡេងក្នុងហ្វេសប៊ុកនៅពេលនេះដែរ លោក សម រង្ស៊ី ពន្យល់អ្នកគាំទ្ររបស់ខ្លួនថា កិច្ចចរចាស្តីពីកំណែទម្រង់បោះឆ្នោតរវាងគណបក្សទាំងពីរគឺជាបញ្ហាបច្ចេកទេសតែប៉ុណ្ណោះ ប៉ុន្តែ បញ្ហានយោបាយមិនទាន់បានដោះស្រាយនៅឡើយទេ។
បញ្ហានយោបាយដែលលោកសម រង្ស៊ី ចង់និយាយគឺការរៀបចំកាលបរិច្ឆេទថ្មីសម្រាប់ការបោះឆ្នោតលើកក្រោយ។ ប៉ុន្តែ រហូតមកដល់ពេលនេះ គណបក្សប្រជាជនកម្ពុជានៅតែប្រកាន់ជំហរម៉ឺងម៉ាត់ដដែលថាគ្មានការបោះឆ្នោតឡើងវិញមុនអាណត្តិឡើយ។ បក្សកាន់អំណាចតែងបដិសេធមិនដាក់បញ្ហានេះក្នុងរបៀបវារៈនៃកិច្ចចរចាទេ។
គួរបញ្ជាក់ថា ក្នុងកិច្ចចរចាថ្នាក់បច្ចេកទេសកាលពីថ្ងៃទី៣មីនា គណបក្សទាំងពីរបានសម្រេចកិច្ចព្រមព្រៀងពីរចំណុចរួចហើយគឺទី១ ទាក់ទងនឹងការរៀបចំបញ្ជីឈ្មោះអ្នកបោះឆ្នោត និងទី២ ទាក់ទងនឹងការបង្កើតច្បាប់ស្តីពីហិរញ្ញវត្ថុបក្សនយោបាយ។ ក្រុមការងារគណបក្សទាំងពីរគ្រោងជួបគ្នាម្តងទៀតនៅថ្ងៃចន្ទដើមសប្តាហ៍ក្រោយ។ ជំនួបនេះហើយដែលជំរុញឲ្យលោក សម រង្ស៊ី ត្រូវបញ្ជាក់ជំហរប្រាប់អ្នកគាំទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ