បាតុកម្មបានឈានចូលដល់ថ្ងៃទី២ជាមួយនឹងការហែរញត្តិទៅកាន់ប្រទេសមហាអំណាច
ថ្ងៃទីពីរនៃបាតុកម្មដឹកនាំដោយគណបក្សសង្គ្រោះជាតិ បាតុករដែលដឹកនាំដោយ មេបក្សប្រឆាំងទាំងពីរ បានដង្ហែរញត្តិដោយសុវត្ថិភាពទៅកាន់ ស្ថានទូតប្រទេសមហាអំណាចចំនួន៣ ដើម្បីស្នើសុំឲ្យបណ្តាមេដឹកនាំនៃប្រទេសទាំងនោះ អន្តរាគមន៍ទៅដល់ការគោរពកិច្ចព្រមព្រៀងទីក្រុងប៉ារីស និងជំរុញឲ្យមានការស្វែងរកយុត្តិធម៌នៅក្នុងការបោះឆ្នោតនៃប្រទេសកម្ពុជា។ ការដង្ហែរញត្តិនេះបានធ្វើឡើងបន្ទាប់ពីបាតុករបានដាក់ញត្តិ ទៅកាន់ការិយាល័យ អង្គការសហប្រជាជាតិកាលពីថ្ងៃទី២៣ ដែលជាថ្ងៃបាតុកម្មទីមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
មេដឹកនាំគណបក្សសង្គ្រោះជាតិ លោក សម រង្សី និងលោក កឹម សុខា ហែរហមដោយអ្នក
គាំទ្រជាច្រើនពាន់នាក់បានធ្វើដំណើរកាត់តាមដងវិថីនានាដោយជើងឆ្ពោះទៅកាន់ស្ថានទូត
ប្រទេសជាសមាជិកសហភាពអឺរ៉ុប និងស្ថានទូតអាមេរិកប្រចាំនៅកម្ពុជាដើម្បីសុំឲ្យប្រទេសជាម្ចាស់ហត្ថលេខីជំរុញឲ្យមានការគោរពកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣តុលា ឆ្នាំ១៩៩១។
បាតុករដែលដឹកនាំដោយមេបក្សប្រឆាំងទាំងពីរដែលនៅលើថ្ងាសរបស់គេមានជួតក្បាល
ក្រណាត់ពណ៌ស្បង់លោក បាននាំគ្នាដើរផងស្រែកជ័យឃោសផង សុំឲ្យរដ្ឋាភិបាលគោរពនូវកិច្ចព្រមព្រៀងទីក្រុងប៉ារីស និងពាក្យពេចន៍ផ្សេងៗទៀត ដែលជាការមិនសប្បាយចិត្តចំពោះ
ទង្វើរបស់រដ្ឋសភាឯកបក្សនិងរដ្ឋាភិបាលនីតិកាលទី៥ ដែលពួកគេអះអាងថា បានកើតឡើងដោយមិនស្របទៅនឹងកិច្ចព្រមព្រៀងទីក្រុងប៉ារីស និងដោយសារមានភាពមិនប្រក្រតីក្នុងការបោះឆ្នោត។ពួកគេធ្វើដំណើរដោយមិនខ្លាចនឿយហត់ នៅនឹងដៃមានកាន់ទង់ជាតិកម្ពុជា និងទង់ជាតិរបស់ប្រទេសហត្ថលេខី ទីក្រុងប៉ារីស ទង់ជាតិសហរដ្ឋអាមេរិក និងទង់សហភាពអឺរ៉ុប។
បន្ទាប់ពីដើរដង្ហែរក្បួនអស់រយៈពេលពេញមួយព្រឹកលោក កឹម សុខា អនុប្រធានគណបក្ស
សង្គ្រោះជាតិបានឡើងលើវេទិការ ហើយថ្លែងប្រាប់អ្នកគាំទ្រនៅទីលានប្រជាធិបតេយ្យថា
បាតុករបាននាំយកញត្តិដែលមានស្នាមមេដៃប្រជាពលរដ្ឋចំនួនជាង ២លាននាក់ជូនដល់នាយករដ្ឋមន្ត្រីបារាំង មុនគេនៅថ្ងៃនេះ បន្ទាប់មកជូនទៅប្រទេសអង់គ្លេស ហើយចុងក្រោយដាក់ជូនប្រទេសអាមេរិក តាមរយៈតំណាងស្ថានទូតរបស់គេនៅប្រទេសកម្ពុជា។
ការដាក់ញត្តិដ៏ច្រើនសន្ធឹកសន្ធាប់ដល់បណ្តាប្រទេសទាំងនេះគឺដើម្បីទាមទារឲ្យមានកិច្ចអន្តរាគមន៍មួយ ឲ្យរដ្ឋាភិបាលគោរពនូវកិច្ចព្រមព្រៀងទីក្រុងប៉ារីសនិងទាមទារឲ្យរកយុត្តិធម៌ក្នុងការបោះឆ្នោតកន្លងមក នេះបើតាមការប្រកាសរបស់លោក កឹម សុខា។ អនុប្រធានគណបក្សប្រឆាំងបន្តថាតំណាងប្រទេសទាំងអស់ដែលបាតុករបានដាក់ញត្តិបានសម្តែងនូវការស្វាគមន៍ និងសន្យាបញ្ជូនញត្តិទាំងនេះទៅដល់មេដឹកនាំរដ្ឋាភិបាលគេរៀងៗខ្លួន ដើម្បីជួយដល់កម្ពុជាឲ្យមានលទ្ធិប្រជាធិបតេយ្យ។
ក្រោមសម្លេងហ៊ោរទះដៃពីអ្នកគាំទ្រ លោក សម រង្សី ប្រធានគណបក្សសង្គ្រោះជាតិ បន្ថែមថាថ្ងៃស្អែកទី២៥ តុលា ដែលជាថ្ងៃបាតុកម្មចុងក្រោយ លោកនឹងដើរជាមួយអ្នកចូលរួមនៅលើចំងាយផ្លូវឆ្ងាយ និងមានការចូលរួមពីមនុស្សច្រើនជាងនេះ ដើម្បីយកខ្លឹមសារញត្តិទៅជូនដល់ស្ថានទូតបរទេសមួយចំនួនទៀត។
យោងតាមកម្មវិធីដែលបានគ្រោងទុក ក្រុមបាតុករនឹងធ្វើការដើក្បួទៅកាន់ស្ថានទូត អូស្ត្រាលី
ទូតរុស្សី ទូតជប៉ុន ឥណ្ឌូនេស៊ី និងស្ថានទូតចិនជាចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ