ការជួបជុំគ្នារបស់កម្មករដើម្បីតវ៉ា មិនមានទេ នៅថ្ងៃនេះ
ស្ថានភាពជួបជុំគ្នារបស់កម្មករកាត់ដេរនៅតាមរោងចក្រនានា ដែលបានបិទ មានសភាពស្ងប់ស្ងាត់។ ក្រុមកម្មករបានជួបជុំគ្នាតែរយៈពេលខ្លីតែប៉ុណ្ណោះ ហើយក៏រំសាយ។ ជាមួយគ្នានេះ អាជ្ញាធរបានដាក់កម្លាំង ពង្រយានៅតាមតំបន់រោងចក្រសំខាន់ៗ ដែលមានការប៉ះទង្គិចគ្នាកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
បន្ទាប់ពីមានការប៉ះទង្គិចគ្នាដ៏បង្ហូឈាមរវាងសមត្ថកិច្ចនិងក្រុមអ្នកតវ៉ាអស់រយៈពេលពីរថ្ងៃមកនោះ ស្ថានភាពនៅលើកំណាត់ ផ្លូវវេងស្រេង បានវិលទៅរកសភាពធម្មតាវិញហើយ ដោយមានប្រជាជនបានចាប់ផ្តើមធ្វើដំណើរទៅមក ហើយលំនៅឋាន និងហាងទំនិញនានាក៏ត្រូវបានបើកទ្វារឡើងវិញដែរ។
ជាមួយគ្នានេះនៅតាមដងវិថី ម្តុំសួនកាណាឌីយ៉ា ដែលជាតំបន់ឧស្សាហកម្មមានរោងចក្រកាត់ដេរច្រើននោះ ត្រូវបានដាក់ពង្រាយដោយកងយោធាក្នុងឯកសណ្ឋានប៉ារ៉ាប្រដាប់អាវុធ និងមានរថយន្តយោធាបំពាក់ដោយកាំភ្លើងស្វ័យប្រវត្តិផងដែរ។ផ្លូវវ៉េងស្រេង ជាតំបន់ប៉ះទង្គិចគ្នាបង្ហូរឈាម កាលពី២ថ្ងៃមុន គេសង្កេតឃើញថាកម្មករ មួយចំនួន បានវិលត្រលប់ទៅស្រុកកំណើតរបស់ពួកគេ ហើយខ្លះទៀតនៅសំងំក្នុងផ្ទះជួលដោយមិនមានការដើរ រហេតរហូតឡើយ។
ដោយឡែកចំពោះទិដ្ឋភាពទូទៅនៅតាមកន្លែងផ្សេងៗទៀតក៏មានសភាពស្ងប់ស្ងាត់ ដូចជាតំបន់ឧស្សាហកម្ម ផ្លូវជាតិលេខ ២ ផ្លូវជាតិលេខ៤ ផ្លូវជាតិលេខ៥ម្តុំជម្ពូវន្តជាដើម។
មន្ត្រីផ្នែកច្បាប់សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អ៊ុំ វិសាល ដែលបានសង្កេតការណ៍ ពីសកម្មភាពនានារបស់កម្មករបានថ្លែងថានៅព្រឹកនេះ កម្មករភាគច្រើនបានប្រមូលផ្តុំគ្នានៅមុខរោងចក្ររបស់គេដែលបិទ តែមួយរយៈពេលខ្លីប៉ុណ្ណោះ ហើយក៏រំសាយទៅវិញ។
ដោយឡែកនៅឯតំបន់ឧស្សាហកម្មកាត់ដេរភូមិស្វាយរលំ ស្រុកស្អាង ខេត្តកណ្តាលវិញក្រុមកម្មករបាននាំគ្នាចាក់ធុងបាស រាំលេង នៅតាមរោងចក្រ ក៏ប៉ុន្តែត្រូវបានរារាំងដោយសមត្ថកិច្ច។ ការបញ្ឈប់សកម្មភាពជួបជុំគ្នាជាទ្រង់ទ្រាយតូចៗ នៅតាមរោងចក្របានធ្វើឡើង ដំណាលគ្នានិងការបណ្តេញបាតុកររបស់គណបក្សសង្គ្រោះជាតិចេញពីទីលានប្រជាធិបតេយ្យដូច្នេះដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ