ACUនៅតែមិនទាន់បង្ហាញមុខHacker ទាំងពីរ ខណៈក្រុមអនាមិកកម្ពុជាអះអាងថា គ្មានការចាប់ខ្លួន
អង្គភាពប្រឆាំងអំពើពុករលួយនៅតែមិនទាន់បង្ហាញអត្តសញ្ញាណជនវាយលុកអ៊ិនធើណិតទាំងពីរ ដែលខ្លួនបានប្រកាសថា ចាប់ខ្លួនបានកាលពីថ្ងៃទី០២ ឧសភា កន្លងទៅ។ ការណ៍នេះធ្វើឲ្យមានការសង្ស័យថា អង្គភាពនេះនៅមិនទាន់ចាប់បានជនទាំងនោះនៅឡើយទេ ក្រោយពីក្រុមអនាមិកកម្ពុជា ឬ Anonymous Cambodia ប្រកាសនៅក្នុងទំព័របណ្តាញទំនាក់ទំនងសង្គម Facebook របស់ខ្លូនថា អង្គភាពប្រឆាំងអំពើពុករលួយកំពុងបង្កើតព័ត៌មានក្លែងក្លាយនៃការចាប់ខ្លួននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
ក្តីមន្ទិលសង្ស័យនៅតែកើតមានជាបន្តបន្ទាប់ ជុំវិញការចាប់ខ្លួនសមាជិកអនាមិកកម្ពុជាពីរនាក់ផ្សេងទៀតពីសំណាក់អង្គភាពប្រឆាំងអំពើពុករលួយ។ ការសង្ស័យបានកើតឡើងដោយសារតែមានការអះអាងផ្ទុយគ្នា។
អង្គភាពប្រឆាំងអំពើពុករលួយបានប្រកាសជាសាធារណៈកាលពីថ្ងៃទី០២ ឧសភាថា ខ្លួនចាប់បានជនវាយប្រហារអ៊ីនធើណិតពីរនាក់ ក្រោយពីជនទាំងនោះបានចូលលុកលុយគេហទំព័រអង្គភាពប្រឆាំងអំពើពុករលួយកាលពីថ្ងៃទី២៩ មេសា កន្លងទៅ។ ក៏ប៉ុន្តែ ភ្លាមៗ និង ជាបន្តបន្ទាប់ ក្រុមអនាមិកកម្ពុជាតាមរយៈទំព័រFacebook របស់ខ្លួនបានសរសេរអះអាងថា ការចាប់ខ្លួននោះជារឿងមិនពិត និងគ្រាន់តែជាការបំភ្លៃព័ត៌មានរបស់អង្គភាពប្រឆាំងអំពើពុករលួយប៉ុណ្ណោះ។
ក្រុមអនាមិកកម្ពុជា ឬ Anonymous Cambodia បានលើកហេតុផលចំពោះការអះអាងរបស់ខ្លួនថា ប្រសិនបើរដ្ឋាភិបាល ឬអង្គភាពប្រឆាំងអំពើពុករលួយចាប់Hacker ទាំងពីរនាក់បានមែន ហេតុអ្វីមិនបង្ហាញអត្តសញ្ញាណ ប្រាប់ឈ្មោះសាលា និងទីកន្លែងពិតប្រាកដ? តាមរយៈសំណេរលើប្រព័ន្ធអេឡិចត្រូនិកដដែលនេះ សមាជិកក្រុមអនាមិកកម្ពុជាម្នាក់ដែលដាក់ឈ្មោះថា Attacker Fiber បានអះអាងបែបវាយប្រហារថា ដោយសាររដ្ឋាភិបាល និងអង្គភាពប្រឆាំងអំពើពុករលួយខ្លាចខ្មាសគេ ទើបប្រឌិតព័ត៌មានក្លែងក្លាយនេះឡើង។
ទោះបីជាយ៉ាងណាក៏ដោយ អង្គភាពប្រឆាំងអំពើពុករលួយនៅតែមិនទាន់បង្ហាញអត្តសញ្ញាណជនវាយប្រហារអ៊ិនធើណិតទាំងពីរនាក់នេះនៅឡើយនោះទេ។ លោក ឱម យិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយបានអះអាងប្រាប់វិទ្យុបារាំងអន្តរជាតិ RFI នៅព្រឹកថ្ងៃអាទិត្យ ទី០៤ ឧសភានេះថា អង្គភាពប្រឆាំងអំពើពុករលួយត្រូវការពេលធ្វើការស៊ើបអង្កេតលើរឿងនេះនិងបញ្ជូនទៅកាន់ព្រះរាជអាជ្ញា ប្រសិនបើមានបន្ទុកគ្រប់គ្រាន់ហើយតុលាការនឹងពិនិត្យមើល និងធ្វើការចោទប្រកាន់ឬមិនចោទ។
សូមបញ្ជាក់ថា បន្ទាប់ពីអគ្គស្នងការដ្ឋាននគរបាលជាតិ សហការជាមួយស្ថាប័នFBIប្រចាំនៅកម្ពុជាបានឃាត់ខ្លួនក្រុមអនាមិកកម្ពុជាចំនួនពីរនាក់ កាលពីចុងខែមេសាកន្លងមក ក្រុមអនាមិកកម្ពុជាបានប្រកាសធ្វើសង្គ្រាមអ៊ិនធើណិតជាមួយរាជរដ្ឋាភិបាលកម្ពុជា។ ជាមួយការប្រកាសនេះ ក្រុមលុកលុយប្រព័ន្ធអ៊ិនធើណិតបានធ្វើសកម្មភាពយ៉ាងសកម្ម ក្នុងការវាយប្រហារគេហទំព័ររបស់ស្ថាប័នរដ្ឋ និងឯកជននានាជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ