កម្ពុជា នឹងមានអត្តពលិកខ្មែរ នៅក្រៅប្រទេស មកចូលរួម ដើម្បីកីឡាខ្មែរ
អត្តពលិកខ្មែរ ដែលមានទេពកោសល្យនៅក្រៅប្រទេស នឹងអាចមកលេងកីឡាជាមួយអត្តពលិកខ្មែរ នៅប្រទេសកម្ពុជា ដើម្បីពង្រឹងវិស័យកីឡាខ្មែរ សម្រាប់ព្រឹត្តិការណ៍ប្រកួតអន្តរជាតិនានា ជាពិសេសដំណើរឆ្ពោះទៅកាន់ព្រឹត្តិការណ៍កីឡាស៊ីហ្គេម នាឆ្នាំ២០២៣ ដែលកម្ពុជាត្រូវធ្វើជាម្ចាស់ផ្ទះលើកដំបូង។ នេះគឺជាខ្លឹមសារចម្បង ដែលញ៉ាំងឲ្យមានពិធីចុះអនុស្សារណៈនៃការយោគយល់គ្នា រវាងគណៈកម្មាធិការជាតិអូឡាំពិកកម្ពុជា ជាមួយនឹងសមាគមខ្មែរនៅក្រៅប្រទេស ឈ្មោះ Anvaya។ ពិធីចុះអនុស្សារណៈ ដែលបានធ្វើឡើង នៅព្រឹកថ្ងៃទី៧ឧសភានេះ នៅស្នាក់ការគណៈកម្មាធិការជាតិអូឡាំពិកកម្ពុជា (NOCC)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
លោក វ៉ាត់ ចំរើន អគ្គលេខាធិការ NOCC បានថ្លែងថា នេះគឺជាជំហាននៃការប្រឹងប្រែងពង្រឹងសមត្ថភាពរួមគ្នារវាងស្ថាប័នកីឡាជាតិ និងសមាគមអានវ៉ាយ៉ា ដើម្បីបង្កើនចំនួនមេដាយរបស់កម្ពុជា ក្នុងព្រឹត្តិការណ៍ប្រកួតជា លក្ខណៈអន្តរជាតិ ជាពិសេសកីឡាស៊ីហ្គេម។
លោកបានលើកឡើងថា កម្ពុជាចាំបាច់រួមគ្នាស្វែងរកកីឡាករ កីឡាការិនី ដែលមានឧត្តមភាព និងទេពកោសល្យពិតប្រាកដដោយគ្មានការរើសអើង ជាពិសេសគឺអ្នកដែលមានឈាមជ័រជាខ្មែរ។ ហើយការមានបណ្តាញទំនាក់ទំនងច្បាស់លាស់ នឹងសាងទំនុកចិត្តខ្ពស់ដល់ អាណាព្យាបាល និងអត្តពលិកផ្ទាល់តែម្តង។
បើតាមអគ្គលេខាធិការ NOCC រូបនេះ ការចូលរួមរបស់អត្តពលិកខ្មែរពីក្រៅប្រទេសនឹងធ្វើកម្ពុជាអាច ចូលរួមបានទាំងព្រឹត្តិការណ៍កីឡារដូវក្តៅ និងរដូវរងារ។ ទោះបីជាយ៉ាងណាក៏ដោយ អត្តពលិកទាំងនោះ នឹងត្រូវឆ្លងកាត់ការធ្វើតេស្តិ៍យ៉ាងល្អិតល្អន់ ជាពិសេសការប្រជែងសមត្ថភាពជាមួយកីឡាករក្នុងស្រុក។
លោក កែប៊ិន សូរស្មី ប្រធានសមាគមអាន់វ៉ាយ៉ា បានបញ្ជាក់ឲ្យដឹងថា សមាគមរបស់លោកមានបណ្តាញជាច្រើន ជាពិសេសនៅក្នុងទ្វីបអឺរ៉ុប អាមេរិក និងអូស្ត្រាលី។ ប្រធានសមាគមអាន់វ៉ាន់យ៉ារូបនេះ បានអះអាងថា ការចុះអនុស្សារណៈនេះ គឺជាការផ្តល់សេចក្តីសង្ឃឹមកាន់តែខ្ពស់បន្ថែមទៀត ដល់យុវជននៅក្រៅ ប្រទេសដែលមានឈាមជ័រជាខ្មែរ មានឱកាសបង្ហាញសមត្ថភាពរបស់ខ្លួនដើម្បីសាងស្នាដៃជូនជាតិ។
សូមបញ្ជាក់ថា សមាគមអានវ៉ាយ៉ា (ANVAYA) ត្រូវបានបង្កើតឡើងនៅឆ្នាំ២០១០ ។ សមាគមមួយនេះ មានមូលដ្ឋាននៅក្នុងរាជធានីភ្នំពេញ ហើយមានតួនាទីជួយ សម្របសម្រួល និងផ្តល់ប្រឹក្សា ដល់ពលរដ្ឋខ្មែរដែលរស់នៅក្រៅប្រទេស និងចង់ត្រលប់មកកម្ពុជាវិញ ហើយសមាគមមួយនេះ ក៏បានជួយប្រទេសកម្ពុជា តាមរយៈសកម្មភាពនានា ដែលក្នុងនោះមានកីឡា និងសិល្បៈ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ