នាយករដ្ឋមន្ត្រីបំពេញទស្សនកិច្ចនៅអឺរ៉ុបក្រោមផ្លាកសេដ្ឋកិច្ចនិងសន្តិសុខ
លោក ស៊ីនហ្សូ អាបេ នាយករដ្ឋមន្ត្រីជប៉ុន ត្រូវចាប់ផ្តើមបំពេញទស្សនកិច្ចមួយជុំ នៅអឺរ៉ុប រយៈពេល៩ថ្ងៃ។ ជាដំណើរទស្សនកិច្ចដ៏វែង ដែលតូក្យូចង់បង្ហាញពីភាពសំខាន់របស់សហភាពអឺរ៉ុប ចំពោះក្រសែភ្នែកជប៉ុន ជាពិសេសក្នុងវិស័យសន្តិសុខ និងសេដ្ឋកិច្ច។
ចុះផ្សាយនៅថ្ងៃ៖
ស្តាប់ - ០២:០៣
អាល្លឺម៉ង់ អង់គ្លេស ព័រទុយហ្កាល់ អេស្ប៉ាញ បារាំង និងបែលហ្សិក នេះគឺជាប្រទេសដែល លោកនាយករដ្ឋមន្ត្រីអភិរក្សជប៉ុន នឹងធ្វើដំណើរទៅបំពេញទស្សនកិច្ចជាបន្តបន្ទាប់គ្នាពីថ្ងៃទី ២៩មេសា ដល់ថ្ងៃទី ៧ឧសភា។ ក្រៅពីនោះលោកប្រមុខរដ្ឋាភិបាលជប៉ុន ក៏នឹងត្រូវជួបប្រាស្រ័យជាមួយនឹងប្រមុខដឹកនាំអង្គការអូសេដេអឺ អង្គការអូតង់ និងសហភាពអឺរ៉ុប ក្នុងក្របខ័ណ្ឌជំនួបកំពូលអឺរ៉ុប-ជប៉ុននៅទីក្រុងប៉ារីសទៀតផង។
ជំនួបកំពូលអឺរ៉ុប-ជប៉ុន ដែលនឹងក្លាយជាឱកាសសម្រេចបង្កើតកិច្ចព្រមព្រៀងផ្តោះប្តូរពាណិជ្ជកម្មសេរី (ផ្តើមចរចាតាំងពីពីរឆ្នាំមុន) រវាងតូក្យូនិង២៧ប្រទេសរបស់សហភាពអឺរ៉ុប។ ប្រសិនបើកិច្ចព្រមព្រៀងអាចប្រសូតចេញបាន នោះដៃគូសហភាពអឺរ៉ុប-ជប៉ុន នឹងមានទម្ងន់សេដ្ឋកិច្ចក៏ខ្លាំង ដែលតំណាងឱ្យ៣០%នៃសេដ្ឋកិច្ចពិភពលោក និង៤០%នៃពាណិជ្ជកម្មលើភពផែនដី។
ម្យ៉ាងវិញទៀត មិនថានៅប៉ារីស ឬនៅឡុងដ៍ ប៊ែរឡាំងទេ បញ្ហាសន្តិសុខជាសំណុំរឿងដ៏សំខាន់ មានកត់ត្រាក្នុងកាលវិភាគទស្សនកិច្ចរបស់លោកនាយករដ្ឋមន្ត្រី ដែលមិនអាចរំលងបានឡើយ។ គោលដៅស្វែងរកការពង្រឹងសន្តិសុខ ដោយហេតុបរិយាកាសជុំវិញខ្លួន កាន់តែមិនច្បាស់លាស់ ៖ មានការគំរាមកំហែងអ៊ីស្លាមជ្រុលនិយមប៉ះពាល់ដល់ផលប្រយោជន៍ជប៉ុន ភាពតានតឹងបង្កឡើងដោយជម្លោះដែនដីជាមួយចិន។ អាមេរិកជាដៃគូចម្បងបំផុតនៅលើលោកហើយ តែសហភាពអឺរ៉ុប និងជប៉ុន ក៏អាច និងត្រូវតែដើរតួក្នុងវិស័យនេះសន្តិសុខនេះដែរ។ ជប៉ុនចង់ឃើញអឺរ៉ុបបង្កើនវត្តមាននៅអាស៊ី ហើយទន្ទឹមគ្នានោះជប៉ុនអាចបង្កើតតួនាទីនៅអឺរ៉ុបវិញដែរ។
ចំណែកខាងអឺរ៉ុបវិញ ក៏កំពុងសំឡឹងឃើញទស្សនវិស័យថ្មីជាមួយជប៉ុនដែរ បន្ទាប់ពីតូក្យូបានសម្រេចលុបចោលការបម្រាម ជិតកន្លះសតវត្សរ៍ មិនលក់អាវុធទៅបរទេស។ ជប៉ុនមានកិច្ចព្រមព្រៀងជាមួយអង់គ្លេសរួចហើយ។ ឯជាមួយបារាំង កិច្ចចរចាបានដំណើរការតាំងពី៦មុន សំដៅបង្កើតចំណងសហប្រតិបត្តិការក្នុងវិស័យការពារជាតិផង និងក្នុងវិស័យឧស្សាហកម្មស្ថាបនាឧទ្ធម្ភាគចក្រ ឌ្រូនមុជទឹក ... ឬផ្តល់ឱ្យគ្នាទៅវិញទៅមកបច្ចេកវិទ្យាការពារជាតិជាមួយបណ្តាប្រទេសជាសមាជិកអឺរ៉ុប លើសពីអ្វីដែលជប៉ុនធ្លាប់មានតែជាមួយសហរដ្ឋអាមេរិក និងអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ