នាយករដ្ឋមន្រ្តីជប៉ុនប្រកាសចង់កែប្រែរដ្ឋធម្មនុញ្ញសន្តិភាពនិយម
លោកនាយករដ្ឋមន្រ្តី ស្ហ៊ីនហ្សូ អាបេ បានប្រាប់សមាជិកសភា នៅថ្ងៃព្រហស្បតិ៍នេះថា លោកចង់ឲ្យមានការធ្វើវិសោធនកម្មរដ្ឋធម្មនុញ្ញជប៉ុនបច្ចុប្បន្ន ដែលជារដ្ឋធម្មនុញ្ញបន្សល់ទុកពីក្រោយសង្រ្គាមលោកលើកទី២ ហើយដែលដាក់កម្រិតលើការអភិវឌ្ឍកម្លាំងយោធារបស់ជប៉ុន។ គម្រោងកែប្រែរដ្ឋធម្មនុញ្ញនេះកំពុងតែធ្វើឲ្យប្រទេសជិតខាងរបស់ជប៉ុនមានការព្រួយបារម្ភ។
ចុះផ្សាយនៅថ្ងៃ៖
ស្តាប់ - ០២:១៤
ការធ្វើការកែប្រែរដ្ឋធម្មនុញ្ញសន្តិភាពនិយមរបស់ជប៉ុននេះ គឺជាការសន្យា ដែលលោកស្ហ៊ីនហ្សូ អាបេ បានធ្វើ តាំងពីក្នុងអំឡុងយុទ្ធនាការឃោសនាបោះឆ្នោតម៉្លេះ។ គោលដៅ គឺចង់ធ្វើការសើរើឡើងវិញ អំពីតួនាទី និងបេសកកម្មរបស់កងទ័ពជប៉ុន។
គួរបញ្ជាក់ថា ក្រោយពីជប៉ុនចាញ់សង្រ្គាមលោកលើកទី២ អាមេរិកបានបង្ខំឲ្យជប៉ុនបង្កើតរដ្ឋធម្មនុញ្ញ ដែលដាក់កម្រិតឲ្យជប៉ុនមានកម្លាំងទ័ព សម្រាប់តែការពារខ្លួនប៉ុណ្ណោះ។ ការធ្វើបែបនេះ គឺដើម្បីចៀសវាងកុំឲ្យជប៉ុនអភិវឌ្ឍកម្លាំងយោធា ហើយវិលត្រឡប់ទៅរកនយោបាយយោធានិយម និងវាតទីនិយម ដូចជាកាលពីមុនសង្រ្គាមលោកលើកទី២ទៀត។
នៅក្នុងពេលបច្ចុប្បន្ននេះ កងទ័ពជប៉ុន ដែលត្រូវបានគេទទួលស្គាល់ថាជាកងទ័ពដែលមានអាវុធយុទ្ធភ័ណ្ឌ និងបច្ចេកវិទ្យាដ៏ទំនើបនោះ ត្រូវបានគេឲ្យឈ្មោះត្រឹមតែជា “កងកម្លាំងការពារខ្លួន” ប៉ុណ្ណោះ។ ក៏ប៉ុន្តែ លោកស្ហ៊ីនហ្សូ អាបេ ដែលជាអ្នកនយោបាយអភិរក្សនិយមម្នាក់នោះ ចង់ឲ្យជប៉ុនមានសេរីភាព ក្នុងការអភិវឌ្ឍកម្លាំងទ័ពរបស់ខ្លួនឲ្យទៅជាកងទ័ពជាតិពេញលេញ ដូចគេ ដូចឯង។
គម្រោងកែប្រែរដ្ឋធម្មនុញ្ញរបស់លោកស្ហ៊ីនហ្សូ អាបេនេះ កំពុងតែធ្វើឲ្យប្រទេសជិតខាង ជាពិសេស ចិន និងកូរ៉េ ដែលធ្លាប់ជាប្រទេសរងគ្រោះដោយកងទ័ពជប៉ុនពីអតីតកាល មានមន្ទិលសង្ស័យលើមហិច្ឆតាពិតប្រាកដរបស់ជប៉ុន។
នៅក្នុងប្រទេសជប៉ុន ការកែប្រែរដ្ឋធម្មនុញ្ញនេះក៏បង្កឲ្យមានការខ្វែងគំនិតគ្នាមិនតិចដែរ។ បណ្តាអ្នកនយោបាយ និងប្រជាជនជាច្រើន នៅតែចង់ឲ្យជប៉ុនរក្សារដ្ឋធម្មនុញ្ញសន្តិភាពនិយមនេះឲ្យនៅដដែល ដើម្បីបញ្ចៀសសង្រ្គាម។ ក៏ប៉ុន្តែ មានមនុស្សមួយចំនួនផ្សេងទៀត បានធ្វើការរិះគន់ថា រដ្ឋធម្មនុញ្ញសន្តិភាពនិយមបច្ចុប្បន្ននេះ គឺជាការចងដៃខ្លួនឯង មិនឲ្យអភិវឌ្ឍកម្លាំងទ័ព នៅក្នុងខណៈពេលដែលជម្លោះដែនទឹកក្នុងតំបន់កំពុងតែកើតមានច្រើនជាមួយនឹងចិន ដែលចេះតែបង្កើនកម្លាំងទ័ពរបស់ខ្លួនឥតឈប់ឈរ។
គួរបញ្ជាក់ថា ការកែប្រែរដ្ឋធម្មនុញ្ញជប៉ុនទាមទារនូវសំឡេងភាគច្រើន ២ភាគ៣ នៅក្នុងសភាទាំងពីរ ហើយបន្ទាប់មកវិសោធនកម្មរដ្ឋធម្មនុញ្ញនេះត្រូវយកទៅឆ្លងកាត់ការបោះឆ្នោតប្រជាមតិមួយទៀត។ នៅក្នុងពេលបច្ចុប្បន្ននេះ គណបក្សអភិរក្សនិយមរបស់លោកស្ហ៊ីនហ្សូ អាបេ បូករួមជាមួយនឹងគណបក្សជាដៃគូ មានសំឡេងលើសពី ២ភាគ៣ នៅក្នុងរដ្ឋសភា ក៏ប៉ុន្តែ គណបក្សជាដៃគូក្នុងរដ្ឋាភិបាល មិនសូវជាគាំទ្រឲ្យមានការកែប្រែរដ្ឋធម្មនុញ្ញនេះប៉ុន្មានទេ។ ចំណែកនៅឯព្រឹទ្ធសភាឯណោះវិញ គណបក្សរបស់លោកស្ហ៊ីនហ្សូ អាបេ ក៏មិនមានសំឡេងភាគច្រើន ២ភាគ៣នោះដែរ។ឮ
ដូច្នេះ ការធ្វើវិសោធនកម្មរដ្ឋធម្មនុញ្ញសន្តិភាពនិយមនេះ មិនមែនជារឿងងាយស្រួលប៉ុន្មានទេ សម្រាប់លោកស្ហ៊ីនហ្សូ អាបេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ