តំបន់ជង្រុកស្រូវនៅអាស៊ីអាគ្នេយ៍ទទួលរងគ្រោះទឹកជំនន់
គ្រោះមហន្តរាយទឹកជំនន់បានកំទេចខ្ទេចអស់ដីស្រែនៅតំបន់អាស៊ី អាគ្នេយ៍ដែលក្នុងនោះមានដីស្រែនៃប្រទេសផលិតអង្ករដ៏សំខាន់ជាងគេ ក្នុងលោក។ ទាំងនេះបានបណ្តាលឲ្យគេបារម្ភយ៉ាងខ្លាំង ខ្លាចកើតមានបញ្ហាអង្ករឡើងថ្លៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ដីស្រែនៃប្រទេសថៃ វៀតណាម កម្ពុជា និងឡាវប្រមាណ១លាន៥សែនហិកតារបានត្រូវកំទេចឬឋិតនៅក្រោមការគំរាមនៃគ្រោះមហន្តរាយទឹកជំនន់។
គ្រាន់តែនៅប្រទេសថៃដែលជាប្រទេសជាប់ចំណាត់ថ្នាក់ទី១ក្នុងលោកក្នុងការនាំអង្ករចេញទៅលក់ក្រៅប្រទេស គ្រោះមហន្តរាយទឹកជំនន់បានសម្លាប់មនុស្សអស់២៤៤នាក់ក្នុងរយៈពេល២ខែចុងក្រោយនេះ ហើយបានធ្វើឲ្យខូចខាតដីស្រែអស់ប្រមាណ១លានហិកតារឬស្មើនឹង១០%នៃផ្ទៃដីស្រែសរុប។
ដូច្នេះ តំបន់ទាំងមូលនឹងត្រូវទទួលរងគ្រោះនឹងបញ្ហាចំណីអាហារឡើងថ្លៃ ដោយហេតុតែគ្រោះមហន្តរាយទឹកជំនន់។
តម្លៃអង្ករដែលឋិតនៅក្រោមការគំរាមរួចទៅហើយរបស់រដ្ឋាភិបាលថៃដែលគ្រោងជួយជំរុញឲ្យអង្ករឡើងថ្លៃដើម្បីជាជំនួយជួយលើកតម្កើងជីវភាពរបស់ប្រជាកសិករថៃ។
ហើយគ្រោះមហន្តរាយទឹកជំនន់ដែលធ្វើឲ្យលិចលង់ដីស្រែនៅតំបន់ដែនដីសណ្តទន្លេមេគង្គនៅប្រទេសវៀតណាមខាងត្បូងទៀត ក៏ជាកត្តាអវិជ្ជមានមួយបន្ថែមទៀតមកធ្វើឲ្យតម្លៃអង្ករឡើងថ្លៃ។ ដោយហេតុថា តំបន់ដែនដីសណ្តទន្លេមេគង្គ(អតីតកម្ពុជាក្រោម)នេះជាតំបន់ជង្រុកស្រូវមួយដ៏សំខាន់សម្រាប់ប្រទេសវៀតណាមដែលជាប្រទេសជាប់ចំណាត់ថ្នាក់ទី២ក្នុងលោកក្នុងការនាំអង្ករចេញទៅលក់ក្រៅប្រទេស។
តំបន់ដែនដីសណ្តទន្លេមេគង្គនេះជាតំបន់មួយដែលដីមានជីជាតិអាចផលិតស្រូវបានដល់ទៅបីដងក្នុង១ឆ្នាំ ហើយអាចផលិតបានប្រមាណពាក់កណ្តាលនៃផលិតផលស្រូវសរុបរបស់វៀតណាម។ អាជ្ញាធរវៀតណាមបានប្រកាសឲ្យដឹងថា មានមនុស្ស១១នាក់បានត្រូវរងគ្រោះស្លាប់ដោយទឹកជំនន់ ហើយមានផ្ទះប្រមាណ២៧ ០០០ខ្នងបានត្រូវលិចលង់។
រីឯប្រទេសកម្ពុជាដែលឋិតនៅចន្លោះប្រទេសថៃនិងប្រទេសវៀតណាមវិញ ដីស្រែប្រមាណ៣៣០ ០០០ហិកតារបានស្គាល់ការខូចខាត មនុស្ស១៧២នាក់បានរងគ្រោះស្លាប់ដោយទឹកជំនន់។
ចំណែកឯប្រទេសឡាវដែលជាប្រទេសក្រីក្រជាងគេក្នុងតំបន់វិញ អាជ្ញាធរបានថ្លែងឲ្យដឹងថា មានមនុស្សរងគ្រោះស្លាប់២៣នាក់ហើយនិងដីស្រែប្រមាណ៦០ ០០០ហិកតារបានត្រូវខូចខាតលិចលង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ