គ្រោះរញ្ជួយដី៖ក្រុមអ្នកជួយសង្រ្គោះអន្តរជាតិផ្តើមទៅជួយជប៉ុន
២៤ម៉ោង បន្ទាប់ពីមានគ្រោះរញ្ជួយដី ជប៉ុនបានចាប់ផ្តើមធ្វើការជួយសង្រ្គោះជនរងគ្រោះ។ ក្រៅពីការពឹងផ្អែកលើសមត្ថភាព និងកម្លំាងផ្ទាល់ខ្លួន ជប៉ុនក៏បានសម្រេចចិត្តសុំជំនួយកម្លំាងពីសំណាក់ផ្សេងទៀត។ យ៉ាងណាក៏ដោយ និងក៏ដូចជានៅក្នុងបរិបទនៃវិបត្តិផ្សេងទៀត កងទ័ពបានដើរតួនាទីយ៉ាងសំខាន់នៅក្នុងកិច្ចសហប្រតិបត្តិការជួយ សង្រ្គោះ។
ចុះផ្សាយនៅថ្ងៃ៖ កែប្រែថ្ងៃទី៖
ការប្រើកម្លំាងទ័ព បូកបញ្ចូលនឹងកម្លំាងស៊ីវិលដើម្បីជួយជនរងគ្រោះ គឺវាចំាបាច់ និងមិនអាចខ្វះបាន។ គេធ្លាប់បានឃើញករណីរបៀបនេះនៅក្នុងប្រទេសចិន នៅពេលដែលខេត្ត Sichuan របស់ចិនបានទទួលរងគ្រោះរញ្ជួយដីកាលពីប៉ុន្មានឆ្នំាមុន។ អ៊ីចឹងហើយបានជានៅពេលនេះ ជប៉ុនបានសម្រេចបញ្ជូនទ័ពរបស់ខ្លួនប្រមាណជា ៥ម៉ឺននាក់ បំពាក់ទៅដោយសម្ភារៈពិសេស ជាមួយនឹងយន្តហោះ ១៩០គ្រឿង និងនាវាប្រមាណជា ១០គ្រឿងទៅកាន់តំបន់រងគ្រោះ ពិសេសក្នុងទីក្រុង Sendaï ដែលបានទទួលគ្រោះថ្នាក់ធ្ងន់ធ្ងរជាងគេ។ មួយវិញទៀត និងនៅក្នុងបរិបទនៃភាពតានតឹងតាមផ្លូវយោធារវាងប្រទេសជប៉ុន និងប្រទេសចិនក្នុងពេលថ្មីៗកន្លងទៅនេះ កងទ័ពជប៉ុនចង់បង្ហាញអំពីសមត្ថភាពរបស់ខ្លួនក្នុងការ ការពារប្រទេសជាតិ ក៏ដូចជាការចូលរួមជួយសង្រ្គោះជនរងគ្រោះរបស់ខ្លួន ដោយធ្វើយ៉ាងណា មិនឲ្យចាញ់កងទ័ពចិនឡើយ។
និយាយពីកម្លំាងជំនួយអន្តរជាតិវិញ កម្លំាង បើគេពិនិត្យជារួមទៅ ជប៉ុនកម្រនឹងហាមាត់សុំឲ្យគេជួយណាស់ ជាក់ស្តែងដូចករណីគ្រោះរញ្ជួយដីនៅក្នុងទីក្រុង Kobé ក្នុងឆ្នំា ១៩៩៥ ដែលកាលណោះ ជប៉ុនបានពឹងតែលើសមត្ថភាព និងកម្លំាងផ្ទាល់ខ្លួន ដោយមិនបានអំពាវនាវសុំកម្លំាងជំនួយរបស់អ្នកដទៃទេ។ ជាទូទៅ គឺមានតែប្រទេសផ្សេងទៅវិញទេ ដែលបានប្រកាសត្រៀមខ្លួនដើម្បីបញ្ជូនកម្លំាងទៅជួយ ប្រសិនបើរដ្ឋាភិបាលជប៉ុនប្រកាសសុំឲ្យគេជួយជាផ្លូវការ។
ជាគោលការណ៍ រហូតមកដល់ម៉ោងនេះ ជប៉ុនបានយល់ព្រមទទួលយកកម្លំាងជំនួយពីបណ្តាប្រទេសមួយចំនួន។ នៅថ្ងៃសៅរិ៍ ទី១២ មីនានេះ កម្លំាងរបស់ប្រទេសមួយចំនួននឹងទៅដល់ប្រទេសជប៉ុន មុនគេគឺប្រទេសនូវែលសេឡង់ដែលបានបញ្ជូនក្រុមអ្នកឯកទេសស្រាវជា្រវចំនួន ៤៨នាក់។ ប្រទេសអូស្រ្តាលីប្រកាសបញ្ជូនក្រុមអ្នកសង្រ្គោះ ជាមួយនឹងសត្វឆ្កែ តាមយន្តហោះយោធាមួយគ្រឿង។ ប្រទេសសិង្ហបុរីក៏បានប្រកាសបញ្ជូនកម្លំាងដូចគ្នានេះ។ ចំណែកឯកូរ៉េខាងត្បូងវិញ ទីក្រុងសេអ៊ូលបានប្រាប់ឲ្យដឹងថា ក្រុមវេជ្ជបណ្ឌិត និងក្រុមជួយសង្រ្គោះជាង ១០០នាក់ ព្រមទំាងយន្តហោះយោធាចំនួន ៣គ្រឿងកំពុងត្រៀមខ្លួនចេញដំណើរ។
រីឯសម្ព័ន្ធមិត្តអាមេរិក លោកប្រធានាធិបតីអូបាម៉ាដែលបានទូរស័ព្ទជួបលោកនាយករដ្ឋមន្រ្តីជប៉ុន ណាអូ តូកាននៅថ្ងៃម្សិលមិញ បានព្រមព្រៀងជាគោលការណ៍ ឲ្យជប៉ុនប្រើប្រាស់កម្លំាងទ័ពអាមេរិកទំាង ៤៧ ០០០នាក់ដែលកំពុងឈរជើងនៅលើទឹកដីជប៉ុននាពេលបច្ចុប្បន្ន។ ដោយឡែក ទីភ្នាក់ងារអាមេរិកំាងទទួលបន្ទុកខាងការអភិវឌ្ឍន៍អន្តរជាតិបានប្រកាសថា នឹងបញ្ជូនក្រុមអ្នកជួយសង្រ្គោះចំនួន ៧២នាក់ ជាមួយនឹងសត្វឆ្កែ ព្រមទំាងសម្ភារៈផ្សេងៗចំនួន ៧២តោន។
ពីប្រទេសកម្ពុជាវិញ ជាមួយនឹងសារចូលរួមរំលែកទុក្ខជាមួយប្រជារាស្រ្តជប៉ុន រដ្ឋាភិបាលកម្ពុជាបានប្រកាសផ្តល់ជំនួយជាប្រាក់ចំនួន ១០ម៉ឺនដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ