រញ្ជួយដី ៨,៩ រ៉ិចទ័រ នៅជប៉ុន បង្កជារលកយក្សនៅប៉ាស៊ីហ្វិក
គ្រោះរញ្ជួយដីដ៏ធំមួយបានកើតឡើង នៅក្បែរទីក្រុងតូក្យូ នៅរសៀលថ្ងៃសុក្រនេះ បង្កជារលកយក្សកម្ពស់រហូតដល់ទៅ ១០ម៉ែត្រ។ តុល្យការបណ្តោះអាសន្នរបស់ប៉ូលិសជប៉ុនបង្ហាញថា មានមនុស្សយ៉ាងតិច ៦០នាក់បានបាត់បង់ជីវិត និង ៥៦នាក់ផ្សេងទៀតបានបាត់ខ្លួន។ ប្រទេសយ៉ាងតិច ២០ នៅជាប់នឹងមហាសមុទ្រប៉ាស៊ីហ្វិក កំពុងស្ថិតក្រោមការប្រកាសអាសន្នរលកយក្ស។
ចុះផ្សាយនៅថ្ងៃ៖ កែប្រែថ្ងៃទី៖
ការរញ្ជួយដីបានចាប់ផ្តើមឡើង នៅម៉ោង ២ និង៤៦នាទី រសៀល ម៉ោងនៅក្នុងប្រទេសជប៉ុន (ត្រូវនឹងម៉ោង ១២ និង៤៦នាទី នៅប្រទេសកម្ពុជា)។ ចំណុចរញ្ជួយ ស្ថិតនៅចម្ងាយប្រមាណ ៤០០គីឡូម៉ែត្រពីទីក្រុងតូក្យូ ជម្រៅប្រមាណ ២៥គីឡូម៉ែត្រ ក្រោមដីបាតសមុទ្រ។ បន្ទាប់ពីការរញ្ជួយធំលើកទី១ ការរញ្ជួយតូចៗជាច្រើនផ្សេងទៀតបានកើតឡើង នៅជុំវិញចំណុចរញ្ជួយ។
ការរញ្ជួយដីនេះ មានកម្រិត ពី ៨,៨ ទៅ ៨,៩ រ៉ិចទ័រ ដែលជាការរញ្ជួយដីដ៏ធំបំផុតមិនធ្លាប់ឃើញមាននៅជប៉ុន។ នៅក្នុងចំណោមការរញ្ជួយដី នៅទូទាំងពិភពលោក គិតចាប់តាំងពីឆ្នាំ១៩០០មក ការរញ្ជួយដីនៅជប៉ុន ថ្ងៃសុក្រនេះ គឺជាការរញ្ជួយដែលមានកម្លាំងខ្លាំងលំដាប់ទី ៥។
ការរៀបរាប់របស់អ្នកឆ្លើយឆ្លងព័ត៌មាន RFI ប្រចាំក្រុងតូក្យូ
Frédéric Charles អ្នកឆ្លើយឆ្លងព័ត៌មានរបស់ RFI ប្រចាំទីក្រុងតូក្យូបានរៀបរាប់ឲ្យដឹងថា ចាប់តាំងពីគាត់បានរស់នៅក្នុងទីក្រុងតូក្យូរយៈពេល ២៩ឆ្នាំមកនេះ គាត់មិនដែលជួបនឹងការរញ្ជួយដីដ៏ខ្លាំងក្លាដូចជាពេលនេះទេ។ ឥទ្ធិពលរញ្ជួយបានធ្វើអគារនៅក្នុងទីក្រុងតូក្យូ យោលចុះយោលឡើង ចម្ងាយប្រមាណ ១ម៉ែត្រ ស្ទើរតែបោកទង្គិចជាមួយអគារផ្សេងទៀត។
បន្ទាប់ពីការរញ្ជួយដ៏ធំលើកទី១ ការរញ្ជួយតូចៗជាច្រើនផ្សេងទៀតបានកើតមានឡើងនៅក្នុងទីក្រុង តូក្យូ។ មិនយូរប៉ុន្មានក្រោយមក រលកសមុទ្រកម្ពស់រហូតដល់ទៅ ១០ម៉ែត្រក៏បានបោកមកដល់ឆ្នេរសមុទ្រជប៉ុន។ អ្នកជំនាញខាងការរញ្ជួយដីបានពន្យល់ថា ចំណុចរញ្ជួយដីនៅជប៉ុន នៅថ្ងៃសុក្រនេះ ស្ថិតនៅតែប្រមាណ ២៥គីឡូម៉ែត្រប៉ុណ្ណោះ ក្រោមដីបាតសមុទ្រ ដែលជាមូលហេតុនាំឲ្យមានរលកយក្សធំៗ។ ដោយចំណុចរញ្ជួយស្ថិតនៅក្បែរឆ្នេរ ហើយរលកក៏មានល្បឿនលឿនទៀតផងនោះ (ប្រមាណ ៨០០គីឡូម៉ែត្រក្នុងមួយម៉ោង) ចាប់ពីពេលរញ្ជួយលើកទីមួយ និងពេលរលកយក្សបោកមកដល់ឆ្នេរសមុទ្រជប៉ុន មានចន្លោះពេលតិចបំផុត។
ការពន្យល់របស់អ្នកជំនាញខាងផ្នែករញ្ជួយដី
នៅពេលនេះ រលកយក្សកំពុងតែធ្វើដំណើរឆ្លងកាត់មហាសមុទ្រប៉ាស៊ីហ្វិក ឆ្ពោះទៅកាន់តំបន់ផ្សេងៗទៀត។ ប្រទេសយ៉ាងតិច ២០ ដែលមានឆ្នេរសមុទ្រជាប់នឹងមហាសមុទ្រប៉ាស៊ីហ្វិក ត្រូវបានគេប្រកាសអាសន្នរលកយក្ស ក្នុងនោះ រួមមាន តៃវ៉ាន់ ឥណ្ឌូនេស៊ី ហ្វ៊ីលីពីន កោះគួរីល (រុស្ស៊ី) កោះហាវ៉ៃ (អាមេរិក) អូស្រ្តាលី និងបណ្តាប្រទេសផ្សេងៗទៀត នៅអាមេរិកឡាទីន។
បញ្ហាដ៏ធំមួយទៀត ដែលរដ្ឋាភិបាលជប៉ុនកំពុងតែប្រឈមមុខ គឺសុវត្ថិភាពនៅតាមបណ្តារោងចក្រនុយក្លេអ៊ែរ ដែលស្ថិតនៅក្បែរតំបន់រញ្ជួយដី។ យោងតាមលោកណាអូតូ កាន់ នាយករដ្ឋមន្រ្តីជប៉ុន រោងចក្រនុយក្លេអ៊ែរចំនួន ៤កន្លែង ត្រូវផ្អាកសកម្មភាពដោយស្វ័យប្រវត្តិ ក្រោយពីទទួលឥទ្ធិពលរញ្ជួយ។ ក៏ប៉ុន្តែ គេមិនឃើញមានបញ្ហាលេចសារធាតុវិទ្យុសកម្ម នៅទីតាំងណាមួយនោះទេ។ យោងតាមទីភ្នាក់ងារព័ត៌មានជប៉ុនក្យូដូ រោងចក្រនុយក្លេអ៊ែរមួយកន្លែងកំពុងតែជួបនឹងអគ្គិភ័យ។ ដើម្បីជាការបង្ការ រដ្ឋាភិបាលជប៉ុនបានប្រកាសដាក់ទីតាំងនុយក្លេអ៊ែរអស់ឲ្យស្ថិតក្នុង ភាពអាសន្ន។ ប្រជាជនរាប់ពាន់នាក់ ដែលរស់នៅក្បែររោងចក្រនុយក្លេអ៊ែរនឹងត្រូវជម្លៀសចេញ។
យោងតាមតុល្យការបណ្តោះអាសន្ន បង្ហាញដោយប៉ូលិសជប៉ុន មនុស្សចំនួន ៦០នាក់បានបាត់បង់ជីវិត និង៥៦នាក់ត្រូវបាត់ខ្លួន។ ក៏ប៉ុន្តែ យោងតាមទីភ្នាក់ងារព័ត៌មានជប៉ុនឈ្មោះ Jiji ប៉ូលិសជប៉ុនទើបនឹងបានរកឃើញសាកសព ប្រមាណពី ២០០ ទៅ៣០០នាក់ បន្ថែមទៀត។ ទូកផ្ទុកអ្នកដំណើរប្រមាណ ១០០នាក់ និងរថភ្លើងផ្ទុកអ្នកដំណើរមួយគ្រឿង ក៏ត្រូវបាត់ដំណឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ