បស្ចិមលោកសម្លឹងឃើញទ័ណ្ឌកម្មរបស់ខ្លួនលើភូមា គ្មានប្រសិទ្ធិភាព
នៅប្រទេសភូមា ការអំពាវនាវឲ្យប្រទេសលោកខាងលិចលើកទ័ណ្ឌកម្មចេញវិញកំពុងបន្តមានកាន់តែច្រើនឡើងៗ។ ប៉ុន្តែក្រុមអ្នកវិភាគបានមើលឃើញថា ការអំពាវនាវរបៀបនេះនឹងពិបាកទទួលយកបាន ដរាបណាគ្មានការគំាទ្រពីប្រមុខបក្សប្រឆំាងលោកស្រី អ៊ុង សានស៊ូជី ឬមួយក៏គ្មានការរីកចម្រើននៅលើវិស័យសិទ្ធិមនុស្សនោះទេ។
ចុះផ្សាយនៅថ្ងៃ៖
សេចក្តីរាយការណ៍របស់ គួច កន្ធារ៉ា
វាពិតជាលំបាកណាស់សម្រាប់សហភាពអឺរ៉ុប ឬមួយក៏សហរដ្ឋអាមេរិក ដើម្បីសម្រេចលើកទ័ណ្ឌកម្មចេញពីប្រទេសភូមាវិញ នោះបើទោះបីជាពួកគេគិតថា ទ័ណ្ឌកម្មនោះហាក់ដូចជាគ្មានប្រសិទ្ធិភាពក៏ដោយ។ ទ័ណ្ឌកម្មដែលសហគមន៍អន្តរជាតិបានដាក់លើរបបសឹកភូមាកាលពីដំណាច់ឆ្នំា ១៩៩០។ ជាការពិត ប្រទេសលោកខាងលិចបានបរិហារការបោះឆ្នោតសភាភូមាក្នុងខែវិច្ឆិកា ឆ្នំា ២០១០កន្លងទៅ ថាមិនសេរី និងយុត្តិធម៌។ ក៏ប៉ុន្តែទន្ទឹមគ្នានេះ និងក្រោយពីមានការដោះលែងប្រមុខបក្សប្រឆំាងលោកស្រី អ៊ុងសានស៊ូជីមក ប្រទេសលោកខាងលិចកំពុងរង់ចំាកាយវិការផ្សេងទៀតនៃរបបសឹក នោះគឺធ្វើឲ្យចម្រើននៅលើវិស័យសិទ្ធិមនុស្ស ពិសេស ឲ្យមានការដោះលែងអ្នកទោសនយោបាយជាង ២០០០នាក់។
ក្នុងរយៈពេលប៉ុន្មានថ្ងៃចុងក្រោយនេះ គណបក្សប្រឆំាងចំនួន ២ និងគណបក្សតំណាងឲ្យជនជាតិភាគតិចជាច្រើន ព្រមទំាងអាស៊ានផងដែរ បានអំពាវនាវឲ្យបិទបញ្ចប់ ការដាក់ទ័ណ្ឌកម្មលើប្រទេសភូមា។ ត្រង់ចំណុចនេះ ក្រុមអ្នកវិភាគបានមើលឃើញថា ការលើកទ័ណ្ឌកម្មចេញវិញនឹងអាចធ្វើទៅបាន លុះត្រាណាតែមានការយល់ស្របពីលោកស្រី អ៊ុង សានស៊ូជី។ លោកស្រី ស៊ូជីដែលពេលនេះ មិនទាន់បានធ្វើការអំពាវនាវជាផ្លូវការទេ តែដូចជាមានជំហរទន់ភ្លន់ជាងមុន ដោយបានសុំឲ្យសហគមន៍អន្តរជាតិពិនិត្យមើលឡើងវិញនូវទ័ណ្ឌកម្មរបស់ខ្លួនចំពោះប្រទេសភូមា។
ជាមួយនឹងទ័ណ្ឌកម្មនេះ អាមេរិកមិនអនុញ្ញាតឲ្យមានការនំាចូលផលិតផលភូមាទៅអាមេរិក និងមិនឲ្យនំាសេវាហិរញ្ញវត្ថុពីអាមេរិក ទៅភូមាទេ។ ចំណែកសហភាពអឺរ៉ុបវិញ អឺរ៉ុបក៏មិនអនុញ្ញាតឲ្យមានការនំាចូលផលិតផលឈើ រ៉ែដែក និងត្បូងមានតម្លៃពីភូមា ទៅអឺរ៉ុប។ និយាយជារួមទៅ មានតែប្រទេសលោកខាងលិចមួយចំនួនទេ ដែលបានអនុវត្តនូវទ័ណ្ឌកម្មនេះ។ ទ័ណ្ឌកម្មដែលហាក់ដូចជាមិនបានធ្វើឲ្យសេដ្ឋកិច្ចភូមាងាប់ស្តូកទេ ព្រោះថា ក្រៅពីប្រទេសលោកខាងលិច ភូមាបានបែរខ្លួនទៅរកស៊ីជាមួយបណ្តាប្រទេសជិតខាងរបស់ខ្លួន រួមមានប្រទេសថៃ ចិន ឬមួយក៏ប្រទេសឥណ្ឌាជាដើម។
ត្រង់ចំណុចនេះ ត្រូវបានក្រុមអ្នកវិភាគមើលឃើញថា ស្ថានការណ៍សេដ្ឋកិច្ច និងសង្គមយ៉ាងដុនដាបនៅក្នុងប្រទេសភូមានាពេលនេះ មិនមែនដោយសារតែទ័ណ្ឌកម្មរបស់ប្រទេសលោកខាងលិចទេ តែជាលទ្ធផលនៃការដឹកនំាអំណាចផ្តាច់ការនៃរបបសឹកក្នុងរយៈពេល ៥០ឆ្នំាកន្លងទៅ។
យ៉ាងណាក៏ដោយ ទោះបីជាទ័ណ្ឌកម្មរបស់បស្ចិមលោកហាក់ដូចជាគ្មានប្រសិទ្ធិភាពក៏ដោយ ក៏សម្រាប់ប្រទេសលោកខាងលិច វាជានិមិត្តរូបមួយដែលមិនអាចខ្វះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ