គណបក្សនយោបាយនានាសុំឱ្យលើកទ័ណ្ឌកម្មដាក់ទៅលើរបបសឹកផ្តាច់ការ
នៅប្រទេសភូមា គណបក្សនយោបាយជាច្រើនដែលតំណាងជនជាតិភាគតិចបានអំពាវនាវឱ្យសហភាព អឺរ៉ូបនិងស.រ.អា.លើកទ័ណ្ឌកម្មដាក់ទៅលើរបបសឹកផ្តាច់ការ។ គឺជាលើកទីមួយហើយដែលជនជាតិភាគតិចបានធ្វើសំណូមពរបែបនេះ។ សំណូមពរធ្វើក្នុងចន្លោះពេលប៉ុន្មានថ្ងៃទៀតពីការកោះប្រជុំរដ្ឋ សភាជ្រើសតាំង នៅខែវិច្ឆិកាឆ្នាំទៅ២០១០។រដ្ឋសភាដែលអាសនៈមួយចំនួនត្រូវដណ្តើម បានដោយគណបក្សទាំងនេះ។
ចុះផ្សាយនៅថ្ងៃ៖
សេចក្តីរាយការណ៍របស់Arnaud DUBUSពីទីក្រុងបាងកកប្រែសម្រួលដោយវីនស្តុន រតនា
នៅក្នុងប្រទេសភូមា មានសំឡេងស្រែកទាមទារកាន់តែច្រើនឡើងសុំឱ្យលើកទ័ណ្ឌកម្មដែលបណ្តាប្រទេសលោកខាងលិចបានដាក់ទៅលើរបបសឹកផ្តាច់ការ។ ទឡ្ហីករណ៍ជាទូទៅគឺទ័ណ្ឌកម្មទាំងនេះបានជម្រុញរបបសឹកផ្តាច់ការឱ្យតាំងទំនាក់ទំនងពាណិជ្ជកម្មដ៏ជិតស្និទ្ធជាមួយប្រទេសចិន ឥណ្ឌានិងបណ្តាប្រទេសនៅអាស៊ីអាគ្នេយ៍ ប៉ុន្តែទ័ណ្ឌកម្មទាំងនេះក៏ប៉ះពាល់ខ្លាំងណាស់ដែរ ជាពិសេស បណ្តាជនភូមាជាមូលដ្ឋានគឺប្រជារាស្ត្រភូមាតូចតាច។
គណបក្សនយោបាយចំនួនប្រាំដែលតំណាងជនជាតិភាគតិចបានមករួបរួមផ្តុំកម្លាំងគ្នាជាមួយពួកអ្នកប្រឆាំងនឹងទ័ណ្ឌកម្ម។ស្របតាមយោបល់គេ ទ័ណ្ឌកម្មទាំងនេះគឺជាឩបស័គ្គរារាំងដល់ការធ្វើវិនិយោគទុនដែលប្រហែលអាចនឹងធ្វើឱ្យរីកលូតលាស់បរិមណ្ឌលគឺសង្កាត់ជាយក្រុងឬខេត្តខ័ណ្ឌនានានៃប្រទេស។
បញ្ហាទ័ណ្ឌកម្មគឺជាកម្មវត្ថុនៃការប្រកែកតវ៉ា ពីព្រោះក្រុមអ្នកប្រឆាំងខ្លះដែលនិរទេសខ្លួនរស់នៅក្រៅប្រទេសអះអាងថា ទ័ណ្ឌកម្មគឺជាកាយវិការនយោបាយមួយដ៏ខ្លាំងដែលគេត្រូវតែរក្សាទុក ដោយពុំគន់គិតដល់បញ្ហាប្រសិទ្ធិភាពរបស់វានោះទេ។ បន្ទាប់ពីត្រូវបានអាជ្ញាធរភូមាដោះលែងឱ្យមានសេរីភាពវិញនាពេលថ្មីៗ អ្នកស្រីAung San Suu Kyiជាមេប្រឆាំងធំ បាននិយាយថា គាត់មិនប្រឆាំងនឹងការលើកទ័ណ្ឌកម្មទេ ប្រសិនបើគេអាចនឹងបង្ហាញភ័ស្តុតាងប្រាប់គាត់ថា ទ័ណ្ឌកម្មទាំងនេះពិតជាបានប៉ះពាល់ដល់ជីវភាពប្រជាជនតូចតាចជាទូទៅមែន។ ទោះយ៉ាងណាក៏ដោយ ការលើកទ័ណ្ឌកម្មទាំងនេះនាពេលឆាប់ៗខាងមុខមិនប្រាកដជានឹងត្រូវធ្វើទេ ពីព្រោះទាំងនៅអឺរ៉ូប ទាំងនៅស.រ.អា. បណ្តារដ្ឋសភានិងមតិសាធារណជនមិនគាំទ្រការលើកវាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ