អាដហុក៖ ឆ្នាំ២០១១កម្ពុជាផ្តល់សម្បទានដីសេដ្ឋកិច្ចច្រើនរហូតកាត់ដីឧទ្យានជាតិពីតំបន់ការពារសត្វនិងរុក្ខជាតិ
នៅថ្ងៃព្រហស្បតិ៍នេះ អង្គការសិទ្ធិមនុស្ស អាដហុក បានផ្សព្វផ្សាយរបាយការណ៍ ស្តីពី “សិទ្ធិដីធ្លី និងលំនៅដ្ឋាន ឆ្នាំ២០១១”។ របាយការណ៍ដែលមានកម្រាស់ ៣២ ទំព័របង្ហាញថា ក្នុងឆ្នាំ២០១១ ជាឆ្នាំមួយ ដែលរដ្ឋាភិបាលកម្ពុជា បានផ្តល់សម្បទានដីសេដ្ឋកិច្ចជាច្រើនរហូតដល់កាត់ដីចេញពីឧទ្យានជាតិ ពីតំបន់ការពារសត្វ និងរុក្ខជាតិ ផ្តល់ឲ្យក្រុមហ៊ុនឯកជន។ តាមរបាយការណ៍ ក្នុងឆ្នាំ២០១១ រដ្ឋាភិបាលបានចេញអនុក្រឹត្យចំនួន ១២៣ ដើម្បីផ្តល់ដីសម្បទានសេដ្ឋកិច្ចទៅឲ្យក្រុមហ៊ុនឯកជនដែលមានផ្ទៃដីចំនួនជាង ៧ សែនហិកតា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
របាយការណ៍របស់អាដហុក បង្ហាញថា ក្នុងឆ្នាំ២០១១ រដ្ឋាភិបាលកម្ពុជា បានចេញអនុក្រឹត្យ ចំនួន ១២៣ ដើម្បីផ្តល់សម្បទានដីសេដ្ឋកិច្ចឲ្យក្រុមហ៊ុនឯកជន ចំនួន ៧៥១.៨៨២ ហិកតា។ ផ្ទៃដីជាង ២ ភាគ ៣ បានកាត់ចេញពីដីការពារ ដោយព្រះរាជក្រឹត្យ ដែលជាតំបន់ការពារសត្វព្រៃ និងព្រៃឈើ។
តាមរបាយការណ៍ដែលបានផ្សព្វផ្សាយ នៅព្រឹកថ្ងៃព្រហស្បតិ៍នេះ នៅកម្ពុជា សព្វថ្ងៃពុំមានដីទំនេរ សម្រាប់ផ្តល់សម្បទានសេដ្ឋកិច្ចដល់ក្រុមហ៊ុនឯកជនទៀតទេ។
គិតមកទល់នឹងឆ្នាំ២០១១ រដ្ឋាភិបាលបានផ្តល់ដីសម្បទានសេដ្ឋកិច្ចសរុប ប្រមាណ ២.២៧៦.៣៤៩ ហិកតា ទៅដល់ក្រុមហ៊ុនឯកជនចំនួន ២២៥ ក្រុមហ៊ុន តាមរយៈក្រសួងកសិកម្ម រុក្ខាប្រមាញ់ និងនេសាទ និងតាមរយៈអនុក្រឹត្យ ផ្តល់ដីសម្បទានសេដ្ឋកិច្ច ពីប្រមុខរាជរដ្ឋាភិបាលដោយផ្ទាល់។
តាមរបាយការណ៍ដដែល ចំនួនដីសម្បទានសេដ្ឋកិច្ចនៅកម្ពុជា អាចមានច្រើនជាងនេះទៀត ព្រោះមានក្រសួងមួយចំនួនទៀត ក៏មានសិទ្ធិផ្តល់សម្បទានដីសេដ្ឋកិច្ច សម្រាប់វិស័យផ្សេងៗ ដូចជា ដីសម្បទាន សម្រាប់រុករករ៉ែ ៥៦ សម្បទាន តាមរយៈក្រសួងឧស្សាហកម្មរ៉ែ និងថាមពល និងមានផ្តល់សម្បទានដីសេដ្ឋកិច្ច សម្រាប់ពង្រីកតំបន់សេដ្ឋកិច្ចពិសេស ដែលមានចំនួន ២២ សម្បទានផ្សេងទៀត។
ក្នុងសន្និសីទកាសែតនៅព្រឹកមិញ លោក ធន សារាយ ប្រធានអង្គការ អាដហុកបានលើកឡើងថា ការផ្តល់ដីសម្បទានសេដ្ឋកិច្ចដ៏ច្រើននេះ ជាមូលហេតុដ៏ចម្បង ដែលបង្កឲ្យមានទំនាស់ដីធ្លីនាពេលបច្ចុប្បន្ន និងទៅបណ្តាឆ្នាំខាងមុខៗទៀត។
របាយការណ៍លើកឡើងថា ជម្លោះដីធ្លី ក្នុងឆ្នាំ២០១១ តុលាការបានចោទប្រកាន់ប្រជាពលរដ្ឋចំនួន ៤២៧ នាក់។ ក្នុងនោះ មាន ៩៥នាក់ បានត្រូវចាប់ខ្លួន ហើយរហូតមកដល់ពេលនេះ នៅមានមនុស្ស ៤៨ នាក់ ដែលកំពុងតែជាប់ឃុំឃាំងនៅឡើយ។
អាដហុក លើកឡើងថា ក្រៅពីជម្លោះសម្បទានដីសេដ្ឋកិច្ច ក៏មានបញ្ហាលើការបណ្តេញសហគមន៍ក្រីក្រចេញដោយបង្ខំពីទីក្រុង ដែលធ្វើឡើងដោយអាជ្ញាធរមានសមត្ថកិច្ច។ រហូតមកទល់ឆ្នាំ២០១១ មានសហគមន៍ចំនួន ១២៧ សហគមន៍ ត្រូវបានបណ្តេញចេញ ក្នុងនោះ មាន ៨១ សហគមន៍នៅភ្នំពេញ។ ការបណ្តេញចេញដោយបង្ខំនេះ ប៉ះពាល់ដល់ពលរដ្ឋ ចំនួន ៣០.០០៩ គ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ