អ៊ុយក្រែនថា ស្ថានការណ៍នៅសមរភូមិកាន់តែដាបចុះខ្លាំង ចំណែករុស្ស៊ីអួតនឹងការវាយយកបានដីអ៊ុយក្រែន
ស្ថានការណ៍នៅក្នុងសមរភូមិអ៊ុយក្រែនកាន់តែយ៉ាប់យ៉ឺនធ្លាក់ដុនដាបខ្លាំង នៅចំពោះមុខការវាយប្រហារកាន់តែសន្ធឹករបស់រុស្ស៊ី ដែលសំបូរទាំងអាវុធ និងកងទ័ព។ នៅថ្ងៃអាទិត្យម្សិលមិញ មេទ័ពអ៊ុយក្រែនបានចេញមុខសាជាថ្មី ទទួលស្គាល់ថា កងទ័ពអ៊ុយក្រែនបានធ្លាក់ដៃប្រយុទ្ធ និងត្រូវបង្ខំចិត្តដកថយចេញពីទីតាំងសមរភូមិមួយចំនួន ដែលមានការវាយប្រហារខ្លាំងរបស់រុស្ស៊ី។ នៅថ្ងៃអាទិត្យដដែល រុស្ស៊ីអះអាងថា កងទ័ពរបស់ខ្លួនទើបវាយយកបានភូមិមួយទៀតរបស់អ៊ុយក្រែន នៅក្នុងតំបន់ប្រយុទ្ធយុទ្ធសាស្រ្តភាគខាងកើតអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
នៅចំពោះមុខការវាយប្រហារដ៏សន្ធឹករបស់រុស្ស៊ី ដែលមានប្រៀបខ្លាំងទាំងខាងកម្លាំងទ័ពប្រយុទ្ធ និងសព្វាវុធ កងទ័ពអ៊ុយក្រែនប្រឹងទប់ទល់ ការពារខ្សែប្រយុទ្ធរបស់ខ្លួនយ៉ាងត្រដាបត្រដួស ប៉ុន្តែ មិនបានសម្រេចជោគជ័យ។ នៅថ្ងៃអាទិត្យ ទី ២៨មេសា រុស្ស៊ីបានអះអាងថា កងទ័ពរបស់ខ្លួនវាយដណ្តើមយកបានភូមិមួយទៀត ក្នុងតំបន់ដូណែតស្ក៍ភាគខាងកើតអ៊ុយក្រែន ជាទីដែលភូមិ ក្រុងរបស់អ៊ុយក្រែនម្តងមួយៗ បានធ្លាក់ក្នុងដៃរបស់កងទ័ពរុស្ស៊ី នៅមួយរយៈចុងក្រោយនេះ។
នៅថ្ងៃអាទិត្យដដែល មេទ័ពអ៊ុយក្រែន លោក Oleksandre Syrsky ទទួលស្គាល់ថា ស្ថានការណ៍នៅគ្រប់ជួរសមភូមិមុខរបស់អ៊ុយក្រែន ធ្លាក់ចុះដុនដាបខ្លាំងមែនទែន ដោយនៅតាមតំបន់ប្រយុទ្ធមួយចំនួន កងទ័ពអ៊ុយក្រែន ត្រូវបង្ខំចិត្តដកថយ នៅចំពោះមុខកលយុទ្ធដ៏ជោគជ័យរបស់កងទ័ពរុស្ស៊ី។ បើតាមមេទ័ពអ៊ុយក្រែន កងទ័ពអ៊ុយក្រែនរងការវាយប្រហារពីកងទ័ព រុស្ស៊ី នៅគ្រប់តំបន់ តាមបណ្តោយខ្សែសមរភូមិភាគខាងកើត។ នៅតំបន់មួយចំនួន កងទ័ពអ៊ុយក្រែនអាចត្រឹមការពារទប់ទល់ ប៉ុន្តែ នៅតំបន់ខ្លះទៀត ពួកគេត្រូវដកថយ ដោយសារតែការវាយប្រហារដ៏សន្ធឹករបស់កងទ័ពរុស្ស៊ី។
យោងតាមទីក្រុងកៀវ នៅមុនពេលដែលជំនួយសព្វាវុធរបស់អាមេរិកទៅដល់ដីអ៊ុយក្រែន រុស្ស៊ីឆ្លៀតកេងចំណេញក្នុងសមរភូមិ ដោយវាយលុកកាន់តែសន្ធឹក ដើម្បីលេបយកដីភូមិក្រុងអ៊ុយក្រែនបន្ថែមទៀត។
ប្រធានក្រុមស៊ើបការណ៍សម្ងាត់អ៊ុយក្រែន លោក Kyrylo Budanov វាយតម្លៃថា កងទ័ពរុស្ស៊ី ដែលកាន់តែស្វាហាប់ សម្រុកវាយយកទឹកដីអ៊ុយក្រែនឲ្យបានកាន់តែច្រើនបន្ថែមទៀត ដើម្បីជាអំណោយសម្រាប់បុណ្យស្នេហាជាតិ ថ្ងៃ ៩ ឧសភា ទិវាជ័យជម្នះលើពួកទាហានណាហ្ស៊ីក្នុងសង្រ្គាមលោកលើកទី២។
ជាក់ស្តែង នៅថ្ងៃចន្ទទី ២៩មេសា កងទ័ពអ៊ុយក្រែនបានវាយរុញច្រានកងទ័ពរុស្ស៊ី ដល់ ៥៥ដង ដែលចង់វាយទម្លុះខ្សែប្រយុទ្ធរបស់អ៊ុយក្រែន នៅតាមភូមិជាច្រើន នៅភាគខាងកើត និងខាងត្បូងអ៊ុយក្រែន។ បើតាមភាគីអ៊ុយក្រែន កងទ័ពថ្មើរជើងរុស្ស៊ី ដែលបានទទួលជំនួយការពារ និងបាញ់បើកផ្លូវពីយន្តហោះចម្បាំង បានព្យាយាមវាយទម្លុះខ្សែការពាររបស់អ៊ុយក្រែន ប៉ុន្តែ មិនបានទទួលជោគជ័យ។
ទោះសភាអាមេរិកសម្រេចផ្តល់កញ្ចប់ជំនួយយោធា ជាង៦១ពាន់លានដុល្លារ ប៉ុន្តែ អ៊ុយក្រែនដែលកំពុងខ្វះខ្លាំងទាហាន និងគ្មានអាវុធពីខាងលោកខាងលិច ដើម្បីវាយប្រហារទៅលើរុស្ស៊ី បានប្រមើលឃើញហើយថា ស្ថានការណ៍នៅសមរភូមិអ៊ុយក្រែន នៅប៉ុន្មានខែទៅមុខនឹងកាន់តែធ្លាក់ចុះដុនដាបខ្លាំង។ ប្រធានក្រុមស៊ើបការណ៍សម្ងាត់អ៊ុយក្រែនព្រមានរួចហើយថា ចាប់ពីពាក់កណ្តាលខែឧសភា ដើមខែមិថុនា អ៊ុយក្រែននឹងជួបការលំបាកខ្លាំងមែនទែន នៅក្នុងសមរភូមិ ព្រោះថា រុស្ស៊ីគ្រោងរួចហើយថា នឹងវាយសម្រុកទម្លាយខ្សែប្រយុទ្ធរបស់អ៊ុយក្រែនឲ្យបាក់ទ័ពតែម្តង នៅរដូវក្តៅខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ