ផ្ទុះការរិះគន់លើលោកម៉ាក្រុង ដែលចង់ប្រើអាវុធនុយក្លេអ៊ែរបារាំងជាខែលការពារអឺរ៉ុប
លោកប្រធានាធិបតីបារាំង អេម៉ានុយអែល ម៉ាក្រុង កំពុងតែរងការរិះគន់ជាខ្លាំង ពីបណ្តាអ្នកនយោបាយបារាំង ទាក់ទិននឹងអាវុធនុយក្លេអ៊ែរ។ បន្ទាប់ពីបានថ្លែងក្នុងសុន្ទរកថាកាលពីថ្ងៃព្រហស្បតិ៍សប្តាហ៍មុន អំពីទស្សនវិស័យចង់ឲ្យអឺរ៉ុបមានប្រព័ន្ធការពារជាតិរួមគ្នាដ៏រឹងមាំ លោកម៉ាក្រុងបានថ្លែងកាលពីថ្ងៃសុក្រ ថាលោកគាំទ្រគំនិត បង្កើតឲ្យមានការជជែកគ្នា ស្តីពីការយកអាវុធនុយក្លេអ៊ែរបារាំងទៅប្រើ ដើម្បីធ្វើជាខែលការពារអឺរ៉ុបទាំងមូល។ សម្តីនេះ បានធ្វើឲ្យមានមតិរិះគន់ខ្លាំងៗ ថាលោកម៉ាក្រុង កំពុងតែបំផ្លាញយុទ្ធសាស្ត្រអាវុធនុយក្លេអ៊ែរបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៤
ក្នុងបរិបទសុន្ទរកថាទស្សនវិស័យស្តីពីអឺរ៉ុប ដែលលោកម៉ាក្រុងបានធ្វើបទបង្ហាញកាលពីថ្ងៃព្រហស្បតិ៍ ទី២៥មេសា នៅឯសកលវិទ្យាល័យសកបូន កាលពីថ្ងៃសុក្រទីក្រុងស្ត្រាសបួរ លោកប្រធានាធិបតីបារាំងបានជួបសំណេះសំណាល ជាមួយយុវជនជាង១០នាក់។ មានយុវជនម្នាក់បានសួរទៅលោកម៉ាក្រុងថា តើបារាំងសុខចិត្តយល់ព្រមដែរឬទេ ក្នុងការយកសមត្ថភាពកំញើញនុយក្លេអ៊ែររបស់ខ្លួន ទៅប្រើប្រាស់ក្នុងក្របខណ្ឌអឺរ៉ុប?
លោកម៉ាក្រុងបានឆ្លើយថា លោកគាំទ្រ ចង់ឲ្យអឺរ៉ុបមានប្រព័ន្ធការពារជាតិរួមគ្នា រឹងមាំ និងមានកម្លាំងគ្រប់គ្រាន់ឲ្យគេខ្លាចញញើត។ លោកបានបន្ថែមថា លោកគាំទ្រការដាក់ពង្រាយប្រព័ន្ធខែលមីស៊ីល តែត្រូវឲ្យច្បាស់ថាជាប្រព័ន្ធដែលអាចចាប់ស្ទាក់បានគ្រប់ប្រភេទមីស៊ីលទាំងអស់ ដោយរាប់ទាំងមីស៊ីលចម្ងាយឆ្ងាយ និងអាវុធនុយក្លេអ៊ែរផង។
លោកម៉ាក្រុងបានគូសបញ្ជាក់ថា ទ្រឹស្តីយុទ្ធសាស្រ្តរបស់បារាំង គឺបារាំងអាចប្រើប្រព័ន្ធសព្វាវុធនុយក្លេអ៊ែរបាន នៅពេលណាដែលផលប្រយោជន៍ជាអាយុជីវិតជាតិ រងនូវការគំរាមកំហែង។ ក៏ប៉ុន្តែទន្ទឹមនឹងនេះ លោកម៉ាក្រុងបានលើកឡើងថា សម្រាប់លោក នៅក្នុងពាក្យថា “ផលប្រយោជន៍ជាអាយុជីវិតជាតិ” គឺមានរាប់ទាំងសន្តិសុខរួមរបស់អឺរ៉ុប។ ក្នុងន័យនេះ លោកម៉ាក្រុងបានបន្ថែមថា លោកគាំទ្រគំនិត បង្កើតឲ្យមានការជជែកគ្នា ស្តីអំពីការបញ្ចូលប្រព័ន្ធខែលមីស៊ីលគ្រប់ប្រភេទមីស៊ីល ដោយរាប់តែមីស៊ីលនុយក្លេអ៊ែរ សម្រាប់ប្រទេសសាមជិកដែលមានស្រាប់ និងអ្នកដែលប្រើប្រព័ន្ធខែលរបស់នុយក្លេអ៊ែររបស់អាមេរិក។
សូមបញ្ជាក់ថា បារាំងគឺជាមហាអំណាចនុយក្លេអ៊ែរតែមួយគត់ ក្នុងចំណោមប្រទេសសាមជិកសហភាពអឺរ៉ុបទាំង២៧។ សំដីលើកឡើងរបស់លោកម៉ាក្រុងនេះ គឺហាក់មានន័យថា លោកចង់យកប្រព័ន្ធសព្វាវុធនុយក្លេអ៊ែររបស់បារាំង ទៅប្រើប្រាស់ក្នុងក្របខណ្ឌការពារជាតិអឺរ៉ុប។ ជាគំនិត ដែលបានបង្កឲ្យផ្ទុះការរិះគន់ជាខ្លាំង ពីសំណាក់បក្សនយោបាយធំៗនៅបារាំង ស្របពេលដែលការឃោសនាបោះឆ្នោតសភាអឺរ៉ុប កំពុងតែប្រពឹត្តិទៅយ៉ាងសកម្ម។
លោក François Xavier Bellamy បេក្ខជននាំមុខរបស់បក្សសាធារណរដ្ឋសម្រាប់ការបោះឆ្នោតអឺរ៉ុប បានរិះគន់ខ្លាំងៗ ថាសម្តីរបស់លោកម៉ាក្រុង គឺជាគ្រោះថ្នាក់ធំណាស់សម្រាប់យុទ្ធសាស្ត្រសន្តិសុខជាតិបារាំង។ ដូចគ្នាដែរ បក្សឆ្វេងនិយម La France insoumise បានប្រតិកម្មថា លោកម៉ាក្រុងកំពុងតែយកប្រព័ន្ធកំញើញយុទ្ធសាស្ត្រនៃសព្វាវុធនុយក្លេអ៊ែរបារាំង ទៅលេងសើច។ ដោយឡែក លោកFrançois Bayrou បក្សកណ្តាលនិយម MoDem បានលើកឡើងថា អាយុជីវិតជាតិរបស់បារាំងពេលខ្លះគឺវាមិនអាចផ្តាច់ចេញពីអាយុជីវិតរបស់អឺរ៉ុបឡើយ។ លោកបន្ថែមថា ឧទាហរណ៍បើថ្ងៃណាមួយ អាល្លឺម៉ង់ប្រឈមនឹងគ្រោះថ្នាក់ត្រូវគេគំរាម នោះបារាំងក៏មិនអាចបានសុខដែរ។
គួររំលឹកថា បារាំងមានទស្សនវិស័យយូរមកហើយ ចង់ឲ្យអឺរ៉ុបមានប្រព័ន្ធការពារខ្លួនរួមគ្នា។ តែគំនិតនេះ តែងតែពើបប្រទះនឹងឧបសគ្គ ដោយសារប្រទេសសមាជិកខ្លះ គិតថាគ្មានអ្វីល្អជាងម្លប់ការពាររបស់អាមេរិកក្នុងក្របខណ្ឌអូតង់ឡើយ។ ក៏ប៉ុន្តែ សង្គ្រាមឈ្លានពានអ៊ុយក្រែនដែលរុស្ស៊ីបានធ្វើ បានបំផុតគំនិតពង្រឹងការការពារខ្លួននេះឲ្យផុសឡើង ទូទាំងអឺរ៉ុប ព្រោះគ្រប់គ្នាអាចក្លាយជាមុខសញ្ញារបស់រុស្ស៊ីទៅថ្ងៃមុខ។ ជាងនេះទៀត ជាមួយនឹងលទ្ធភាពនៃការវិលត្រលប់មកកាន់អំណាចវិញរបស់លោកដូណាល់ ត្រាំ គឺធ្វើឲ្យប្រទេសអឺរ៉ុបកាន់តែភ័យនិងលែងទុកចិត្ត។ ទស្សនវិស័យរបស់លោកម៉ាក្រុង ដែលចង់ឲ្យអឺរ៉ុបមានប្រព័ន្ធការពារជាតិរួមគ្នាដោយខ្លួនឯង លែងពឹងលើអាមេរិកនេះ ហាក់បានទទួលការគាំទ្រកាន់តែច្រើនពីប្រទេសអឺរ៉ុបផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ