អាល្លឺម៉ង់ស៊ើបអង្កេតក្រោយពីមានការបែកលេចធ្លាយការសន្ទនាស្តីពីការបញ្ជូនមីស៊ីលTaurus ទៅឲ្យអ៊ុយក្រែន
នៅអាល្លឺម៉ង់ ភាពជ្រួលច្របល់កំពុងកើតមាននៅក្នុងចំណោមអ្នកនយោបាយ បន្ទាប់ពីមានការបែកលេចធ្លាយសារសំឡេង ដែលនៅក្នុងនោះ មន្រ្តីយោធាអាល្លឺម៉ង់ពិភាក្សាគ្នាពីលទ្ធភាពបញ្ជូនមីស៊ីលបណ្តែត Taurus របស់អាល្លឺម៉ង់ទៅឲ្យកងទ័ពអ៊ុយក្រែន។ សារសំឡេងត្រូវបាននាយកការផ្សាយរបស់ទូរទស្សន៍រដ្ឋរុស្ស៊ី RT ចុះផ្សាយនៅលើបណ្តាញសង្គមតេឡេក្រាម កាលពីថ្ងៃសុក្រទី ១មីនា។ អ្នកនាំពាក្យរបស់ក្រសួងការបរទេសរុស្ស៊ីបានទាមទារឲ្យប៊ែរឡាំងឆ្លើយបំភ្លឺទាក់ទងនឹងគម្រោងការបញ្ជូនមីស៊ីលទៅឲ្យអ៊ុយក្រែន ចំណែកប្រមុខរដ្ឋាភិបាលអាល្លឺម៉ង់ លោកអូឡាហ្វ ស្ហុលស៍បានបញ្ជាឲ្យមានការស៊ើបអង្កេតបន្ទាន់ និងល្អិតល្អន់បំផុត ព្រោះថាការបែកលេចធ្លាយលើកនេះធ្ងន់ធ្ងរណាស់។ អាជ្ញាធរអាល្លឺម៉ង់កំពុងបារម្ភថា រុស្ស៊ីកំពុងលួចស្តាប់យកការណ៍សម្ងាត់ នៅក្នុងទឹកដីអាល្លឺម៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥១
តើរុស្ស៊ីតាមដាន លបស្តាប់ការណ៍សម្ងាត់របស់កងទ័ពអាល្លឺម៉ង់? នៅថ្ងៃសៅរ៍ទី ២ មីនា ក្រសួងការពារជាតិអាល្លឺម៉ង់បានអះអាងថា ក្រសួងកំពុងស្រាវជ្រាវពិនិត្យ ដើម្បីដឹងថា តើវីដេអូសន្និសីទស្តីពីសង្រ្គាមអ៊ុយក្រែន ពិតជាត្រូវគេលបលួចស្តាប់ដែរឬទេ។
អាជ្ញាធរអាល្លឺម៉ង់បើកការរស៊ើបអង្កេត នៅបន្ទាប់ពីប្រធានការផ្សាយរបស់ទូរទស្សន៍រដ្ឋរុស្ស៊ី RT ដែលស្និទ្ធនឹងរបបលោកពូទីន គឺលោកស្រី Margarita Simonyan បានបង្ហោះផ្សាយសំឡេងសន្ទនា ដែលលោកស្រីអះអាងថា ជាសំឡេងរបស់មន្រ្តីយោធាអាល្លឺម៉ង់ កំពុងពិភាក្សាពីលទ្ធភាពបញ្ជូនមីស៊ីលTaurusរបស់អាល្លឺម៉ង់ទៅឲ្យអ៊ុយក្រែន។
នៅក្នុងសារសំឡេងរយៈពេល ៣៨នាទី ដែលប្រធានកម្មវិធីទូរទស្សន៍រុស្ស៊ី បង្ហោះផ្សាយនៅលើបណ្តាញតេឡេក្រាម អ្នកចូលរួមបានពិភាក្សាគ្នាពីគោលដៅវាយប្រហាររបស់មីស៊ីលអាល្លឺម៉ង់ Taurus ដូចជាដៅបំផ្លាញ ស្ពានKerch ដែលតភ្ជាប់ពីរុស្ស៊ី ទៅទឹកដីគ្រីមេដែលរុស្ស៊ីបានកាត់យកពីអ៊ុយក្រែន នៅឆ្នាំ ២០១៤។ លើសពីនោះ គេនៅបានលឺអ្នកចូលរួមនិយាយពីការប្រើមីស៊ីលបាញ់បានចម្ងាយជិត ដែលបារាំង និងអង់គ្លេសបានប្រគល់ទៅឲ្យអ៊ុយក្រែន ហើយនិងការបណ្តុះបណ្តាលទាហានអ៊ុយក្រែននៅទឹកដីអាល្លឺម៉ង់។
អ្នកនាំពាក្យរបស់ក្រសួងការពារជាតិអាល្លឺម៉ង់បាននិយាយប្រាប់អ្នកកាសែតថា គេនៅមិនទាន់អាចបញ្ជាក់ថា តើនោះពិតសំឡេងពិតប្រាកដរបស់មន្រ្តីយោធាអាល្លឺម៉ង់ដែរឬទេ។ ប៉ុន្តែ យ៉ាងណាក៏ដោយ អាល្លឺម៉ង់កំពុងបើកការស៊ើបអង្កេតថា តើប្រព័ន្ធទំនាក់ទំនងរបស់វិស័យកងទ័ពជើងអាកាសអាល្លឺម៉ង់កំពុងត្រូវគេឈ្លបយកការណ៍ឬក៏យ៉ាងណា។
តាមការចុះផ្សាយរបស់ទស្សនាវដ្តីអាល្លឺម៉ង់ Der Spiegel អ្នកជំនាញនិយាយថា គេជឿជាក់ថា សំឡេងដែលគេស្តាប់លឺអាចជាសំឡេងរបស់មន្រ្តីយោធាអាល្លឺម៉ង់ភាគច្រើន។ តាមទស្សនាវដ្តីអាល្លឺម៉ង់ ដដែល វីដេអូសន្និសីទរបស់មន្រ្តីយោធាអាល្លឺម៉ង់ដើម្បីជជែកពីសង្រ្គាមអ៊ុយក្រែន មិនបានធ្វើនៅលើខែ្សបណ្តាញសម្ងាត់ផ្ទៃក្នុងរបស់កងទ័ពអាល្លឺម៉ង់ ប៉ុន្តែ គេធ្វើវានៅលើបណ្តាញវីដេអូរបស់ក្រុមហ៊ុនឯកជនឈ្មោះWebEx។
ការបែកលេចធ្លាយកិច្ចសន្ទនាពីកិច្ចការសម្ងាត់កងទ័ពអាល្លឺម៉ង់បានធ្វើឲ្យអាល្លឺម៉ង់ទើសទាល់មែនទែន។ កំពុងធ្វើទស្សនកិច្ចនៅប្រទេសអ៊ីតាលី កាលពីថ្ងៃសៅរ៍ ប្រមុខរដ្ឋាភិបាលអាល្លឺម៉ង់ លោកអូឡាហ្វ ស្ហុលស៍បានចេញមកធ្វើសន្និសីទកាសែត បញ្ជាក់ថា ការបែកលេចធ្លាយលើកនេះធ្ងន់ធ្ងរណាស់។ អាជ្ញាធរអាល្លឺម៉ង់ត្រូវស៊ើបអង្កេត សិក្សាល្អិតល្អន់លឿនបំផុត ព្រោះថា រឿងនេះសំខាន់។
នៅក្រោយការចុះផ្សាយព្រោងព្រាតរបស់កាសែតក្នុងស្រុករុស្ស៊ី ស្តីពីការបែកលេចធ្លាយសារសំឡេងរបស់មន្រ្តីយោធាអាល្លឺម៉ង់ អ្នកនាំពាក្យរបស់ក្រសួងការបរទេសរុស្ស៊ីបានទាមទារឲ្យប៊ែរឡាំងស្រាយបំភ្លឺ ចំណែកប្រមុខការទូតរុស្ស៊ីលោកឡាវ្រូវបរិហារគម្រោងការខ្មៅងងឹតរបស់កងទ័ពអាល្លឺម៉ង់។
មន្រ្តីបក្សប្រឆាំងអាល្លឺម៉ង់ លោកRoderich Kiesewetter បារម្ភថា ការពិភាក្សារឿងសម្ងាត់ផ្សេងទៀតនឹងអាចបែកលេចធ្លាយ ជាបន្តបន្ទាប់នៅថ្ងៃខាងមុខ ដើម្បីផលប្រយោជន៍របស់រុស្ស៊ី ព្រោះវាកើតឡើងចំពេលដែលអាល្លឹម៉ង់កំពុងរារែកក្នុងរឿងបញ្ជូនមីស៊ីលTaurus ទៅឲ្យអ៊ុយក្រែន។ សម្រាប់មន្រ្តីបក្សប្រឆាំងអាល្លឺម៉ង់ ការបែកលេចធ្លាយសារសំឡេងរបស់មន្រ្តីយោធាអាល្លឺម៉ង់លើកនេះ ជាស្នាដៃរបស់រុស្ស៊ី ដែលមានចេតនារារាំងកុំឲ្យអាល្លឺម៉ង់បញ្ជូនមីស៊ីលបណ្តែតTaurus ទៅឲ្យអ៊ុយក្រែន។ នៅមួយរយៈចុងក្រោយនេះ រដ្ឋាភិបាលអាល្លឺម៉ង់កំពុងរងការដាក់សម្ពាធពីបក្សប្រឆាំង និងសភា ដែលទាមទារចង់ឲ្យអាល្លឺម៉ង់បញ្ជូនមីស៊ីលបណ្តែត Taurus ទៅតាមការទទូចចង់បានរបស់អ៊ុយក្រែន។
ប៉ុន្តែ នាយករដ្ឋមន្រ្តីអាល្លឺម៉ង់ លោកអូឡាហ្វ ស្ហុលស៍បានបដិសេធរហូតមក មិនបញ្ជូន មីស៊ីលបាញ់ចម្ងាយមធ្យម (៥០០គីឡូម៉ែត្រ)ទៅឲ្យអ៊ុយក្រែន ដាច់ខាត ព្រោះអាល្លឺម៉ង់មិនចង់ចូលទៅពាក់ព័ន្ធជ្រៅនៅក្នុងសង្រ្គាមអ៊ុយក្រែន។ នៅសប្តាហ៍មុន លោកនៅបានបដិសេធមិនធ្វើតាមបារាំង និងអង់គ្លេស ដែលបានសន្យាប្រគល់មីស៊ីលចម្ងាយឆ្ងាយ ទៅឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ