អៀរឡង់៖ផ្ទុះកុបកម្មយ៉ាងហិង្សាកណ្តាលទីក្រុង ក្រោយមានការវាយប្រហារដោយកាំបិត
នៅក្នុងប្រទេសអៀរឡង់ ក្រុងឌុយប្លាំងបានក្លាយជាឆាកនៃកុបកម្មយ៉ាងហិង្សានាយប់ថ្ងៃព្រហស្បតិ៍ ទី២៣ វិច្ឆិកា។ កុបកម្មនេះបានផ្ទុះឡើងនៅប៉ុន្មានម៉ោងក្រោយការវាយប្រហារដោយកាំបិតដែលបានបណ្តាលឲ្យរបួសមនុស្សចំនួន ៥នាក់ ក្នុងនោះមានក្មេងចំនួន ៣នាក់។ អ្នកទទួលខុសត្រូវប៉ូលិសបានបញ្ជាក់ក្នុងថ្ងៃសុក្រ ទី២៤ វិច្ឆិកាថា ព្រឹត្តិការណ៍ហិង្សានេះជាព្រឹត្តិការណ៍ដែលអៀរឡង់មិនធ្លាប់ជួបទេតាំងពីច្រើនទសវត្សរ៍។ ចំណែកនាយករដ្ឋមន្រ្តីលោកឡេអូ វ៉ារ៉ាដការបានចាត់ទុកជាព្រឹត្តិការណ៍ដែលធ្វើឲ្យអាម៉ាស់មុខអៀរឡង់។
ចុះផ្សាយនៅថ្ងៃ៖
ស្តាប់ - ០២:២៩
ក្នុងរយៈពេលជាច្រើនម៉ោងនាយប់ថ្ងៃព្រហស្បតិ៍ ទី២៣ វិច្ឆិកា ក្រុងឌុយប្លាំងនៃប្រទេសអៀរឡង់បានក្លាយជាឆាកនៃកុបកម្មយ៉ាងហិង្សា។ ក្រៅពីការប្រឈមមុខទល់នឹងកម្លាំងប៉ូលិស ក្រុមកុបករបាននាំគ្នាដុតរថយន្ត ចូលលួច និងវាយកម្ទេចហាងលក់ទំនិញជាច្រើន។ សង្កាត់ដែលបានរងការបំផ្លិចបំផ្លាញខ្លាំងជាងគេគឺសង្កាត់ដែលរស់នៅច្រើនដោយប្រជាជនអន្តោប្រវេសន៍។ កុបកម្មយ៉ាងហិង្សានេះបានផ្ទុះឡើង ក្រោយពីមានបុរសម្នាក់បានវាយប្រហារដោយកាំបិតនៅក្បែរសាលារៀនមួយក្នុងក្រុងឌុយប្លាំងដែលបណ្តាលឲ្យរបួសមនុស្សចំនួន ៥នាក់ ក្នុងនោះមានក្មេងចំនួន ៣នាក់។ ខ្មាន់កំាបិតដែលមានវ័យ ៥០ឆ្នាំត្រូវបានចាប់ខ្លួនភ្លាមៗនៅនឹងកន្លែងដោយមានជំនួយពីអ្នកដឹកជញ្ជូនឥវ៉ាន់ម្នាក់។
នៅក្នុងការស៊ើបអង្កេតបឋម ប៉ូលិសមិនបានចាត់ទុកទង្វើរបស់ខ្មាន់កាំបិតជាអំពើភេរវកម្មទេ។ តែគ្មាននរណានឹកស្មានដល់សោះឡើយថា ការវាយប្រហារដោយកាំបិតមួយនេះបានក្លាយជាប្រភពនៃកុបកម្មយ៉ាងហិង្សា។ តាមប៉ូលិស ក្រុមស្តាំនិយមជ្រុលជាអ្នកអុជអាលឲ្យមានការបះបោរដោយពួកគេបានបង្ហោះលើបណ្តាញសង្គមពីដើមចមនៃការវាយប្រហារដោយកាំបិត។ អ្វីជាការកត់សម្គាល់ ព្រឹត្តិការណ៍មួយនេះបានកើតមានឡើងនៅក្នុងបរិបទមួយដែលអៀរឡង់កំពុងស្គាល់កំណើននៃការប្រឆាំងជនអន្តោប្រវេសន៍ ពិសេសពីសំណាក់ពួកស្តាំនិយមជ្រុលក្រោមហេតុផលថា ជនអន្តោប្រវេសន៍ និងជនភៀសខ្លួនជាដើមចមនៃវិបត្តិលំនៅដ្ឋានសព្វថ្ងៃនៅអៀរឡង់។
ប៉ូលិសបានប្រាប់ពីការចាប់ខ្លួនកុបករចំនួន ៣៤នាក់ និងព្រមានពីការចាប់ខ្លួនបន្ថែមទៀត។ ស្នងការប៉ូលិសលោក Drew Harris បានបញ្ជាក់ថា អ្វីដែលបានកើតឡើងកាលពីយប់ថ្ងៃព្រហស្បតិ៍ ទី២៣ វិច្ឆិកាជាការផ្ទុះអំពើហិង្សាដ៏សាហាវជាមួយនឹងឈុតឆាកដែលអៀរឡង់មិនធ្លាប់បានឃើញតាំងពីច្រើនទសវត្សរ៍កន្លងមក។ តែលោក Drew Harris មិនភ្លេចបញ្ជាក់ពីការអាចមានអំពើហិង្សាថ្មីៗទៀត។ ចំណែកនាយករដ្ឋមន្រ្តីអៀរឡង់លោកឡេអូ វ៉ារ៉ាដការបានថ្លែងនៅក្នុងសន្និសីទកាសែតនាព្រឹកថ្ងៃសុក្រ ទី២៤ វិច្ឆិកាដោយបរិហារអំពើហិង្សា និងបញ្ជាក់ថា ក្រុមកុបករបាននាំមកនូវភាពអាម៉ាស់ដល់ក្រុងឌុយប្លាំង ភាពអាម៉ាស់ដល់ប្រទេសអៀរឡង់ ភាពអាម៉ាស់ដល់គ្រួសាររបស់ពួកគេ និងភាពអាម៉ាស់ដល់ខ្លួនគេផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ