ជម្លោះនៅការ៉ាបាក់៖ អាមេនីនិងអាស៊ែបៃហ្សង់ដំឡើងសំឡេងដាក់គ្នានៅតុលាការយុត្តិធម៌អន្តរជាតិ
អាមេនី និងអាស៊ែបៃហ្សង់ឡើងតទល់គ្នានៅមុខតុលាការយុត្តិធម៌អន្តរជាតិ នៅទីក្រុងឡាអេ ប្រទេសហូឡង់។ នៅក្នុងសវនាការតទល់គ្នា នៅថ្ងៃព្រហស្បតិ៍ទី ១២ តុលា អ្នកតំណាងអាមេនីដាក់ពាក្យសុំទៅចៅក្រមរបស់តុលាការអន្តរជាតិឲ្យបញ្ជាទៅភាគីអាស៊ែបៃហ្សង់ឲ្យដកកងទ័ព និងអនុញ្ញាតឲ្យប្រជាជនដើមកំណើតអាមេនីអាចត្រលប់ទៅរស់នៅក្នុងតំបន់ការ៉ាបាក់ដោយសុវត្ថិភាពឡើងវិញ។
ចុះផ្សាយនៅថ្ងៃ៖
ស្តាប់ - ០៣:៣១
អាមេនី និងអាស៊ែបៃហ្សង់ចេញមុខតទល់គ្នានៅតុលាការយុត្តិធម៌អន្តរជាតិ នៅទីក្រុងឡាអេ នៅ១ខែក្រោយប្រតិបត្តិការយោធារបស់អាស៊ែបៃហ្សង់នៅតំបន់ការ៉ាបាក់ ក្នុងគោលដៅបោសសម្អាតក្រុមឧទ្ទាមផ្តាច់ទឹកដី អាមេនី។ ប្រតិបត្តិការយោធា ក្នុងរយៈពេលតែមួយថ្ងៃរបស់កងទ័ពអាស៊ែបៃហ្សង់បានបណ្តាលឲ្យមនុស្ស១២០ ០០០នាក់ រត់ភៀសខ្លួន យ៉ាងគំហុកចេញពីតំបន់ការ៉ាបាក់ ចំណែកក្រុមទាមទារផ្តាច់ទឹកដីអាមេនី ដែលគ្រប់គ្រងតំបន់ការ៉ាបាក់ តាំងពីឆ្នាំ ១៩៩១បានប្រកាសទម្លាក់អាវុធ និងរំលាយខ្លួនចាប់ពីខែ មករាដើមឆ្នាំក្រោយ ឆ្នាំ ២០២៤។
នៅក្នុងពាក្យបណ្តឹងទៅកាន់តុលាការក្រុងឡាអេ ភាគីអាមេនីបានទាមទារសុំឲ្យចៅក្រមបញ្ជាទៅរដ្ឋាភិបាលអាស៊ែបៃហ្សង់ឲ្យដកកងទ័ពចេញពីតំបន់ការ៉ាបាក់ និងហាមដាច់ខាតការប្រើកម្លាំងយោធាប្រឆាំងនឹងការវិលត្រលប់ជនភៀសខ្លួន ដើមកំណើតអាមេនី ទៅក្នុងតំបន់ការ៉ាបាក់។ Erevan ទាមទារផងដែរឲ្យកងទ័ពអាស៊ែបៃហ្សង់ធានាសុវត្ថិភាពប្រជាជនអាមេនីដែលចង់ចាកចេញ លែងចង់រស់នៅក្នុងតំបន់ការ៉ាបាក់ តទៅទៀត។
ប្រតិបត្តិការយោធាទ្រង់ទ្រាយធំរបស់កងទ័ពអាស៊ែបៃហ្សង់ នៅតំបន់ការ៉ាបាក់ កាលពីពាក់កណ្តាលខែកញ្ញា ដែលបានបណ្តាលឲ្យមនុស្សរាប់សែននាក់ រត់ភៀសខ្លួនភ្លូកទឹក ភ្លូកដីចូលទៅក្នុងទឹកដីអាមេនី បានអនុញ្ញាតអាស៊ែបៃហ្សង់ ដណ្តើមកាន់កាប់តំបន់ការ៉ាបាក់ទាំងស្រុង នៅបន្ទាប់ពី អាស៊ៃបៃហ្សង់ និងក្រុមឧទ្ទាមផ្តាច់ទឹកដីអាមេនីបានប្រយុទ្ធធ្វើសង្រ្គាមនឹងគ្នា ជាច្រើនទសវត្សរ៍។
នៅតុលាការយុត្តិធម៌អន្តរជាតិ កាលពីថ្ងៃព្រហស្បតិ៍ អាមេនីចោទប្រកាន់អាស៊ែបៃហ្សង់សាជាថ្មីថា កំពុងបោសសម្អាតពូជសាសន៍ នៅក្នុងគោលដៅលុបបំបាត់មិនឲ្យមានវត្តមានជនជាតិអាមេនី ក្នុងទឹកដី ការ៉ាបាក់ ដែលធ្លាក់ក្រោមការកាន់កាប់របស់អាស៊ៃបៃហ្សង់។ អាស៊ែបៃហ្សង់ទាត់ចោលការចោទប្រកាន់របស់អាមេនី និងបន្ថែមថា អាស៊ៃបៃហ្សង់បានអំពាវនាវឲ្យប្រជាជនអាមេនីដែលធ្លាប់រស់នៅក្នុងតំបន់ការ៉ាបាក់ ឲ្យបន្តរស់នៅ និងធ្វើសមាហរកម្មចុះចូលក្នុងសង្គមអាស៊ែបៃហ្សង់។
មានទីតាំងក្នុងទឹកដីអាស៊ែបៃហ្សង់ តំបន់ការ៉ាបាក់ ដែលមានប្រជាជននិយាយភាសាអាមេនី រស់នៅភាគច្រើន បានក្លាយជាតំបន់ប្រទាញប្រទង់គ្នា រវាងប្រទេសជិតខាង អាស៊ែបៃហ្សង់ និងអាមេនី។ ក្រុមឧទ្ទាមបំបែកទឹកដីនៅការ៉ាបាក់ ដែលគាំទ្រដោយអាមេនី ប្រកាសឯករាជ្យភាព នៅឆ្នាំ ១៩៩១ នៅក្រោយការដួលរលំសហភាពសូវៀត និងបានធ្វើសង្រ្គាមទាមទារផ្តាច់ទឹកដី ពីអាស៊ែបៃហ្សង់។
ដើម្បីទាមទារយុត្តិធម៌ នៅក្នុងជម្លោះទឹកដីជាមួយអាស៊ែបៃហ្សង់ អាមេនីបានរត់ទៅរកជំនួយពីតុលាការអន្តរជាតិមួយទៀត នោះគឺតុលាការព្រហ្មទណ្ឌអន្តរជាតិ។ នៅថ្ងៃទី ៣តុលាកន្លងទៅ សភាអាមេនីផ្តល់សច្ចាប័ន លើសេចក្តីសម្រេចដែលភ្ជាប់ប្រទេសអាមេនីទៅតុលាការព្រហ្មទណ្ឌអន្តរជាតិ។ ជំហររបស់អាមេនីបណ្តាលឲ្យរុស្ស៊ី ដែលជាសម្ព័ន្ធមិត្តខឹងច្រឡោតខ្លាំង ដោយសារថា លោកពូទីន កំពុងត្រូវតុលាការព្រហ្មទណ្ឌអន្តរជាតិចេញដីកាស្វែងរកចាប់ខ្លួន ក្នុងបទចោទប្រកាន់បញ្ជាឲ្យចាប់ជំរិតកុមារអ៊ុយក្រែន នៅក្នុងសង្រ្គាមឈ្លានពានអ៊ុយក្រែន។
តុលាការយុត្តិធម៌អន្តរជាតិជាស្ថាប័នច្បាប់របស់អង្គការសហប្រជាជាតិទទួលបន្ទុកដោះស្រាយជម្លោះរវាងប្រទេសសមាជិក។ ប៉ុន្តែ យ៉ាងណាក៏ដោយ យោបល់ផ្លូវច្បាប់របស់តុលាការមួយនេះមិនមានអំណាចផ្លូវច្បាប់ចាប់បង្ខំឲ្យប្រទេសសមាជិកត្រូវតែអនុវត្តតាមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ