ឯកសារបង្ហាញថា ការចំណាយរបស់កងទ័ពជាតិរុស្ស៊ីបានកើនឡើងទ្វេដង នៅឆ្នាំ ២០២៣
លង់ខ្លួនកាន់តែជ្រៅទៅក្នុងសង្រ្គាមឈ្លានពានអ៊ុយក្រែន រុស្ស៊ីឃើញខ្ទង់ចំណាយកងទ័ពរបស់ខ្លួនហក់កើនឡើងទ្វេដង នៅឆ្នាំ ២០២៣។ តាមឯកសាររដ្ឋាភិបាលរុស្ស៊ី ដែលទីភ្នាក់ងារព័ត៌មានអង់គ្លេស Reuters ចុះផ្សាយ នៅថ្ងៃសុក្រទី ៤ សីហា ប្រាក់ចំណាយសម្រាប់វិស័យការពារជាតិរុស្ស៊ី នៅឆ្នាំ ២០២៣ មានចំនួន ជិត១០០ពាន់លានដុល្លារ ដែលស្មើនឹង១ភាគ៣នៃថវិកាជាតិសរុប។ ដោយសារការចំណាយសម្រាប់សង្រ្គាមនៅអ៊ុយក្រែន កាន់តែកើនឡើងខ្ពស់ និងការធ្លាក់ចុះនៃការនាំចេញ រុស្ស៊ីមានឱនភាពថវិកាប្រមាណ២៨ពាន់លានដុល្លារ។
ចុះផ្សាយនៅថ្ងៃ៖
ស្តាប់ - ០២:២៧
រុស្ស៊ីបានបង្កើនការចំណាយកងទ័ពទ្វេដងដើម្បីឆ្លើយតបនឹងខ្ទង់ចំណាយសម្រាប់សង្រ្គាមនៅអ៊ុយក្រែន ដែលចេះតែកើនឡើងខ្ពស់។ ឯកសាររបស់រដ្ឋាភិបាលរុស្ស៊ី ដែលទីភ្នាក់ងារព័ត៌មានអង់គ្លេស Reuters បានចុះផ្សាយ កាលពីថ្ងៃសុក្រ បង្ហាញថា រុស្ស៊ីដៅខ្ទង់ចំណាយជិត ១០០លានដុល្លារ សម្រាប់វិស័យការពារជាតិ នៅឆ្នាំ ២០២៣ ពោលគឺស្មើនឹង១ភាគ៣ នៃការចំណាយសាធារណៈសរុប។
រុស្ស៊ីបង្កើនកញ្ចប់ថវិកាសម្រាប់កងទ័ព បន្ទាប់ពី សង្កេតថា នៅក្នុងរយៈពេលតែ ៦ខែ ដើមឆ្នាំ ២០២៣ ការចំណាយសម្រាប់វិស័យកងទ័ពបានកើនឡើង ១២% ហួសការដៅទុករបស់រដ្ឋាភិបាល។ ម៉ូស្គូគ្រោងការចំណាយប្រមាណ ១៧%នៃថវិកាជាតិសម្រាប់វិស័យការពារជាតិ។ ប៉ុន្តែ នៅក្នុងការអនុវត្តជាក់ស្តែង ការចំណាយសម្រាប់វិស័យកងទ័ព បានកើនឡើងដល់ ៥ ៥៩០ពាន់លានរូប្ល លុយរុស្ស៊ី ដែលស្មើនឹង៣៧%នៃថវិកាជាតិសរុប។ ក្រៅពីការចំណាយលើគ្រឿងសព្វាវុធសម្រាប់ធ្វើសង្រ្គាមនៅអ៊ុយក្រែន ឯកសារបង្ហាញដែរថា រដ្ឋាភិបាលបានចំណាយថវិកាជិត ១ទ្រីលានរូប្ល ដែលស្មើនឹង១០ពាន់លានដុល្លារ សម្រាប់បើកប្រាក់ខែឲ្យកងទ័ពរុស្ស៊ី នៅក្នុងរយៈពេល៦ខែដើមឆ្នាំ២០២៣។
សង្រ្គាមនៅអ៊ុយក្រែនបានធ្វើឲ្យខ្ទង់ចំណាយកងទ័ពរុស្ស៊ីកើនឡើង ប៉ុន្តែ វាក៏ជាដើមហេតុនៃការរីកចម្រើនវិស័យឧស្សាហកម្មផលិតសព្វាវុធរុស្ស៊ី ដែលជាតួអង្គសំខាន់ជំរុញសេដ្ឋកិច្ចរុស្ស៊ី ឲ្យងើបដើរឡើងវិញ ទោះត្រូវរួបរឹតដោយការដាក់ទណ្ឌកម្មសេដ្ឋកិច្ចរបស់ប្រទេសលោកខាងលិច។
កាលពីខែកក្កដាកន្លងទៅថា ឧបនាយករដ្ឋមន្រ្តីរុស្ស៊ីបាននិយាយថា នៅឆ្នាំ ២០២៣ ការផលិតសព្វាវុធរបស់រុស្ស៊ី បានកើនឡើងច្រើន បើធៀបនឹងឆ្នាំ ២០២២។ ដោយសារការដាក់ទណ្ឌកម្មសេដ្ឋកិច្ច ឧស្សាហកម្មស៊ីវិល និងការនាំចេញប្រេងឧស្ម័ន រួមទាំងការវិនិយោគបរទេស នៅរុស្ស៊ីបានធ្លាក់ចុះ ដោយគំហុក។ ប៉ុន្តែ មន្រ្តីរុស្ស៊ីវាយតម្លៃថា វិស័យឧស្សាហកម្មកងទ័ពកំពុងក្លាយជាចន្ទល់សំខាន់សម្រាប់ទ្រទ្រង់សេដ្ឋកិច្ចរុស្ស៊ី។
ដើម្បីប៉ះប៉ូវខ្ទង់ចំណាយសម្រាប់ធ្វើសង្រ្គាមនៅអ៊ុយក្រែន រដ្ឋាភិបាលរបស់លោកពូទីនបានកាត់ច្រិប ថវិកាសម្រាប់វិស័យអប់រំ វិស័យសុខាភិបាល និងវិស័យជាច្រើនទៀត សម្រាប់បង្វែរផ្តោតការចំណាយភាគច្រើនទៅលើវិស័យកងទ័ព និយាយឲ្យចំ គឺសង្រ្គាមនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ