វិស័យដឹកជញ្ជូនផ្លូវសមុទ្ទ ព្រមព្រៀងកាត់បន្ថយឧស្ម័នកាបូនិក ក្រោមការរិះគន់របស់អ្នកបរិស្ថាន
ជំនួបប្រជុំរៀបចំឡើងដោយអង្គការនាវាចរណ៍អន្តរជាតិ ស្តីអំពីការកាត់បន្ថយឧស្ម័នកាបូនិច បញ្ចេញដោយនាវាដឹកជញ្ជូនទំនិញតាមផ្លូវសមុទ្ទ បានបិទបញ្ចប់នៅថ្ងៃសុក្រទី ៧ កក្កដា ដោយប្រសូតចេញនូវកិច្ចព្រមព្រៀងមួយ។ ប៉ុន្តែ អង្គការការពារបរិស្ថានមិនពេញចិត្តទេ ព្រោះកិច្ចព្រមព្រៀងនេះមានមហិច្ឆតាទាបជាងការរំពឹងទុក។
ចុះផ្សាយនៅថ្ងៃ៖
ស្តាប់ - ០២:៣០
នៅក្នុងសេចក្តីថ្លែងការណ៍បញ្ចប់ជំនួបប្រជុំ អង្គការនាវាចរណ៍អន្តរជាតិ បានអះអាងថាក្រុមប្រទេសជាសមាជិកបានអនុម័តយុទ្ធសាស្ត្រកាត់បន្ថយឧស្ម័នកាបូនិកបញ្ចេញដោយនាវាដឹកជញ្ជូនតាមផ្លូវសមុទ្ទ ជាមួយនឹងកម្មវត្ថុអព្យាក្រិត្យកាបូន ប្រសើរជាងមុន។ កិច្ចព្រមព្រៀងដែលសឱ្យឃើញពីមហិច្ឆតារួម គ្រោងនឹងកាត់បន្ថយការបញ្ចេញផ្សែងបំពុលបរិយាកាស ឱ្យបានយ៉ាងហោច ៤០% នៅឆ្នាំ២០៣០ ជាមធ្យម បើប្រៀបទៅនឹងឆ្នាំ២០០៨ និងឱ្យបានយ៉ាងហោច៧០% ឬឡើងដល់៨០%ផង នៅឆ្នាំ២០៤០ បើប្រៀបនឹងឆ្នាំ២០០៨ដដែល។ យុទ្ធសាស្ត្រថ្មីនៃកិច្ចព្រមព្រៀងកាត់បន្ថយឧស្ម័នផ្ទះកញ្ចក់ រក្សាលទ្ធភាពនៃការឡើងកម្តៅសីតុណ្ហភាពភពផែនដីត្រឹម១,៥អង្សា តែជាការជំរុញវិស័យដឹកជញ្ជូនតាមផ្លូវសមុទ្ទឆ្លងអន្តរកាលថាមពលប្រកបដោយសមធម៌។
ប៉ុន្តែកម្មវត្ថុកំណត់ក្នុងកិច្ចព្រមព្រៀងនេះ គ្មានតម្លៃជាការដាក់កំហិតឱ្យសម្រេចតាមទេ គឺគ្រាន់តែជាការចង្អុលបង្ហាញទិសដៅប៉ុណ្ណោះ។ ហេតុដូច្នេះហើយបានអង្គការអ្នកបរិស្ថាន ខកចិត្តខ្លាំងណាស់ និងបានរិះគន់ថាកិច្ចព្រមព្រៀងនេះ មិនគ្រប់គ្រាន់សម្រាប់នាំវិស័យដឹកជញ្ជូនតាមផ្លូវសមុទ្ទ ឱ្យសម្រេចកម្មវត្ថុកាត់បន្ថយឧស្ម័នផ្ទះកញ្ចក់ដូចមានចែងក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ទេ។ ពិតជាគួរឱ្យព្រួយបារម្ភណាស់ និង ជាកិច្ចព្រមព្រៀងដ៏ស្រាលជ្រុលសម្រាប់វិស័យដែលសំងំបំពុលបរិស្ថានតាំងពីយូរមកហើយ។ នេះបើតាមអង្គការOcean Campaigns និង Greenpeace។
ទោះជាយ៉ាងដូច្នេះក្តី ក៏សម្រាប់បារាំង នេះជាដំណាក់កាលដ៏សំខាន់មួយនៃដំណើរឆ្ពោះទៅរកអព្យាក្រិត្យកាបូន មុននឹងឈានដល់ការអនុម័តវិធានការដាច់ខាតត្រូវតែគោរព។
សូមបញ្ជាក់ថា នៅក្នុងពេលប្រជុំបច្ចេកទេស នាដើមសប្តាហ៍នេះ សហភាពអឺរ៉ុប ទាមទារឱ្យកំរិតកម្មវត្ថុអព្យាក្រិត្យភាពកាបូនទាំងស្រុង (សូន្យ) នៅឆ្នាំ២០៥០ ដោយឆ្លងកាត់ដំណាក់កាលពីរ គឺកាត់បន្ថយការបញ្ចេញឧស្ម័នកាបូនិក ឲ្យបាន២៩%ពីនេះដល់ឆ្នាំ២០៣០ រួចពី៨៣%នេះដល់ឆ្នាំ២០៤០។ ក្រុមប្រទេសខ្លះទៀត ដូចជាសហរដ្ឋអាមេរិក និងកាណាដា ទាមទារថាត្រូវធ្វើឲ្យបានខ្លាំងជាងនេះ គឺកាត់បន្ថយការបញ្ចេញឧស្ម័នកាបូនិក ឲ្យបាន ៩៦%នៅរវាងឆ្នាំ២០៤០។ ចំណែកអង្គការក្រៅរដ្ឋាភិបាលវិញ បានទាមទារ ថាត្រូវតែកាត់បន្ថយ ឲ្យបាន ចំនួន៥០% នៅរវាងឆ្នាំ២០៣០។ កាលពីឆ្នាំ២០១៨ អង្គការនាវាចរណ៍អន្តរជាតិ បានកំណត់កម្មវត្ថុឱ្យក្រុមហ៊ុនដឹកជញ្ជួន កាត់បន្ថយការបញ្ចេញឧស្ម័នពុលCO2 ឱ្យបាន៥០% នៅឆ្នាំ២០៥០ បើប្រៀបនឹងឆ្នាំ២០០៨។ កាលណោះ គេយល់ថាមិនគ្រប់គ្រាន់ស្រេចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ