បារាំង ៖ កុប្បកម្មហិង្សាចាប់ស្ងប់ ប្រធានាធិបតីទទួលជួបប្រមុខសភានិងចៅហ្វាយក្រុង
បន្ទាប់ពីឆ្លងកាត់អំពើហិង្សា និងការបំផ្លិចបំផ្លាញសម្បត្តិសាធារណៈ អស់៥យប់ជាប់គ្នា និងការបើកឡានបុកបំផ្លាញគេហដ្ឋានរបស់ចៅហ្វាយក្រុងម្នាក់ ពីសំណាក់ក្រុមកុប្បករ ស្ថានភាពទូទៅនៅក្នុងផ្ទៃប្រទេសបារាំង ហាក់បានស្គាល់ភាពស្ងប់ស្ងាត់ច្រើន នៅយប់ថ្ងៃអាទិត្យឆ្លងមកថ្ងៃចន្ទនេះ។ នៅវេលាម៉ោង១២ថ្ងៃត្រង់ (ម៉ោងនៅស្រុកបារាំង) សមាគមចៅហ្វាយក្រុងបារាំង បានអំពាវនាវឱ្យពលរដ្ឋមកជួបជុំគ្នានៅមុខសាលាក្រុង និងបន្លឺស៊ីរ៉ែន ដើម្បីបង្ហាញសណ្តាប់ធ្នាប់សង្គម។ ចំណែកប្រធានាធិបតី ម៉ាក្រុង ត្រូវទទួលជួបប្រធានសភានិងព្រឹទ្ធសភា នៅថ្ងៃនេះ មុននឹងជួបចៅហ្វាយក្រុងដែលរងកុប្បកម្មហិង្សា។
ចុះផ្សាយនៅថ្ងៃ៖
ស្តាប់ - ០២:១៧
ពុំមានការជូនដំណឹងអំពីឧប្បត្តិហេតុហិង្សា នៅយប់មិញទេ។ នៅក្នុងរដ្ឋធានី និងតំបន់ជាយក្រុងប៉ារីស ប៉ូលិសបានចាប់ខ្លួនមនុស្សប្រមាណ២០នាក់ និងសរុបទូទាំងប្រទេស៧៨នាក់ នៅកណ្តាលអាធ្រាត្រយប់មិញ។ តើនេះជាលទ្ធផលនៃការអំពាវនាវរបស់គ្រួសារយុវជនដែលរងគ្រោះស្លាប់ឬ?
កាលពីរសៀលថ្ងៃអាទិត្យ ជីដូនរបស់ណាអែល បានចេញមុខតាមកញ្ចក់ទូរទស្សន៍សុំឱ្យកុប្បករបញ្ឈប់សកម្មភាពបំផ្លិចបំផ្លាញហាងទំនិញ សាលារៀន ឡានក្រុង និងបញ្ជាក់ថាទុកចិត្តលើតុលាការក្នុងការកាត់ទោសលើប៉ូលិសជាខ្មាន់កាំភ្លើង។ មុនសំឡេងរបស់ជីដូននេះ ក្រុមកីឡាករបាល់ទាត់បារាំង នាំមុខដោយកីឡាករ អ៊ឹមម៉ាប៉េ ជាទីពេញនិយមរបស់ក្រុមយុវជននោះ ក៏បានចេញសាររំលែកទុក្ខគ្រួសារសព យល់ពីកំហឹងរបស់យុវជន តែមិនគាំទ្រអំពើកុប្បកម្មហិង្សា បំផ្លិតបំផ្លាញទ្រព្យសាធារណៈឡើយ។
ក្នុងរយៈពេល៥យប់ និងគិតរហូតមកទល់នឹង ថ្ងៃអាទិត្យព្រឹក ក្រសួងមហាផ្ទៃបានរាប់ឃើញមានការដុតបំផ្លាញយានយន្តអស់៥ពាន់គ្រឿង ធុងសំរាម១ម៉ឺនធុង អគារស្នាក់នៅជិត១០០០ខ្នងត្រូវឆេះឬរងការខូតខាត មានការវាយប្រហារលើស្នងការប៉ូលិស ឬទីស្នាក់ការនគរបាលចំនួន២៥០កន្លែង កងកម្លាំងមានសមត្ថកិច្ចជាង៧រយនាក់រងរបួស និងការចាប់ខ្លួនក្មេងអាយុជាមធ្យម១៧ឆ្នាំចំនួន ៣២០០នាក់។
ប្រឈមនឹងបរិបទដ៏ហិង្សា និងតានតឹងនេះ ប្រធានាធិបតីបារាំង លោក អេម៉ានុយអែល ម៉ាក្រុង បានប្តេជ្ញារកដំណោះស្រាយនយោបាយ និងសន្យាពិចារណាឱ្យបានល្អិនល្អន់ ជីករកឬសគល់ដើមដែលនាំឱ្យមានការផ្ទុះកុប្បកម្មឡើងនៅទូទាំងប្រទេស។ តែជាបឋម លោកម៉ាក្រុង ត្រូវទទួលជួបប្រធានសភានិងព្រឹទ្ធសភា នៅថ្ងៃចន្ទនេះ ក្នុងពេលដែលនាយករដ្ឋមន្ត្រីត្រូវជួបពិភាក្សាជាប្រធានក្រុមសមាជិកសភា។ បន្ទាប់មក លោកម៉ាក្រុង ក៏នឹងទទួលជួប ចៅហ្វាយក្រុងជាង ២២០ក្រុង ដែលក្លាយជាផ្ទាំងស៊ីបនៃអំពើហិង្សា តាំងពីថ្ងៃអង្គារមក ដើម្បីសម្តែងសាមគ្គី ក្រោយពីមានហេតុការណ៍ចៅហ្វាយក្រុងម្នាក់ត្រូវកុប្បករបើកឡានបុកបំផ្លាញគេហដ្ឋាន របួសដល់កូនប្រពន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ