បារាំងបើកសម្ពោធរោងចក្រផលិតអាគុយអគ្គិសនីដ៏ធំ និងដំបូងបំផុតរបស់ខ្លួន
រោងចក្រផលិតអាគុយ សម្រាប់ប្រើក្នុងរងរថយន្តអគ្គិសនី ដ៏ធំនិងដំបូងបំផុតមួយ ត្រូវបានបើកសម្ពោធនៅភាគខាងជើងប្រទេសបារាំង កាលពីថ្ងៃអង្គារ ទី៣០ឧសភា។ រោងចក្រដ៏ធំ ដែលត្រូវបានផ្តួចផ្តើមឡើង ដោយក្រុមហ៊ុនអឺរ៉ុបធំៗចំនួន៣នេះ គឺជាការបោះជំហាន ក្នុងការពង្រឹងវិស័យឧស្សាហកម្មបៃតងរបស់អឺរ៉ុប ដើម្បីងាកចេញពីការពឹងផ្អែកខ្លាំងជ្រុលទៅលើចិន ដែលបច្ចុប្បន្ន គឺជាអ្នកផលិតអាគុយអគ្គិសនី ធំជាងគេបង្អស់នៃពិភពលោក។
ចុះផ្សាយនៅថ្ងៃ៖
Automative Cells Company (ACC) គឺជាក្រុមហ៊ុនផលិតអាគុយអគ្គិសនី ដ៏ធំបំផុតនៅអឺរ៉ុប ដែលត្រូវបានចូលហ៊ុនគ្នាបង្កើត ដោយក្រុមហ៊ុនផលិតរថយន្តបារាំង Stellantis ក្រុមហ៊ុនផលិតរថយន្តអាល្លឺម៉ង់ Mercedes និង ក្រុមហ៊ុន TotalEnergies។ រោងចក្រផលិតដ៏ធំ បណ្តោយ៦៤០ម៉ែត្រ និងទទឹង១០០ម៉ែត្រនេះ ស្ថិតនៅតំបន់ Pas de Calais ភាគខាងជើងប្រទេសបារាំង គឺជាគម្រោងដែលមានតម្លៃទឹកប្រាក់ចំនួន ៧ពាន់លានអឺរ៉ូ ក្នុងនោះរដ្ឋបារាំងបានជួយចូលរួម ចំនួន១២០០លានអឺរ៉ូ។
ថ្លែងនៅក្នុងកម្មវិធីសម្ពោធរោងចក្រ លោករដ្ឋមន្ត្រីក្រសួងសេដ្ឋកិច្ចបារាំង បានលើកឡើងថា នេះជាលើកទី១ហើយ ដែលអឺរ៉ុប បានរួមគ្នាបង្កើតក្រុមហ៊ុនឧស្សាហកម្មដ៏ធំ និងឈានមុខគេ បើរាប់ចាប់ពីក្រុមហ៊ុន Airbus មក។ លោកបន្តថា នៅក្នុងវិស័យឧស្សាហកម្ម អឺរ៉ុបត្រូវតែបង្ហាញសាច់ដុំ ខណៈដែលចិនឯណោះ មិនអនុគ្រោះ ឬធ្វើអំណោយឲ្យអឺរ៉ុបទេ។ ដោយឡែក លោករដ្ឋមន្ត្រីក្រសួងបច្ចេកវិទ្យា និងដឹកជញ្ជូនអាល្លឺម៉ង់ ដែលមានវត្តមានចូលរួមដែរនោះ បានបញ្ជាក់ថា រោងចក្រផលិតអាគុយអគ្គិសនីដ៏ធំ នៅភាគខាងជើងបារាំងនេះ គឺជាជំហានទីមួយនៃគម្រោង ដែលជំហានបន្ទាប់ គឺនឹងមានរោងចក្រដូចគ្នានេះ ១នៅអាល្លឺម៉ង់ និង១ទៀតនៅអ៊ីតាលី។
លោក Patrick Pouyanné អគ្គនាយកក្រុមហ៊ុន TotalEnergies បានអះអាងថា អាគុយអគ្គិសនីដែលនឹងផលិតដោយរោងចក្ររបស់ Automative Cells Company នឹងបញ្ចេញឧស្ម័នកាបូនិក តិចជាងអាគុយអគ្គិសនីដែលផលិតនៅចិន ចំនួន៤០%។ រោងចក្រនេះ នឹងចាប់ផ្តើមដំណើរការនៅរដូវក្តៅឆ្នាំនេះ ហើយផលិតផលនឹងត្រូវដាក់លក់លើទីផ្សារ នៅរវាងដំណាច់ឆ្នាំ២០២៣។
គួរកត់សំគាល់ថា វិស័យឧស្សាហកម្មផលិតរថយន្តនៅអឺរ៉ុប កំពុងតែប្រឹងប្រែងពង្រឹងសមត្ថភាពបច្ចេកវិទ្យា និងគ្រឿងផ្សំទាំងអស់ ឈានទៅផលិតរថយន្តអគ្គិសនីឲ្យបានក្នុងទំហំច្រើនបំផុត និងដោយមិនពឹងផ្អែកខ្លាំងពេក ទៅលើអាគុយអគ្គិសនីផលិតនៅចិន។ រដ្ឋាភិបាលបារាំងប្រកាសថានឹងផលិតរថយន្តអគ្គិសនីឲ្យបានចំនួន ២លានគ្រឿងក្នុងមួយឆ្នាំ ពីនេះដល់ឆ្នាំ២០៣០។
គួរបញ្ជាក់ថា ក្នុងវិស័យផលិតអាគុយអគ្គិសនី គឺចិនបានដើរឈានទៅមុខមុនអឺរ៉ុប ចន្លោះ១០ទៅ២០មុនរួចទៅហើយ។ តែយ៉ាងណាប្រទេសអឺរ៉ុប ដូចជាបារាំងនិងអាល្លឺម៉ង់ មានមហិច្ឆតា និងសមត្ថភាពបច្ចេកទេស ដែលអាចតាមទាន់ចិន។ រោងចក្ររបស់ក្រុមហ៊ុន ACCនេះ គឺជាក្រុមហ៊ុនដំបូងគេនៅអឺរ៉ុបហើយ។ នៅថ្ងៃអនាគត នឹងមានរោងចក្រផលិតអាគុយអគ្គិសនី ៣ផ្សេងទៀត ដែលគេគ្រោងស្ថាបនា នៅតំបន់ភាគខាងជើងប្រទេសបារាំងដែរ ក្នុងនោះមានដូចជាក្រុមហ៊ុនជប៉ុន AESC-Envision ដែលនឹងចាប់ដំណើរការ នៅដើមឆ្នាំ២០២៥ នឹងក្រុមហ៊ុនតៃវ៉ាន់ Proligium ដែនគ្រោងចាប់ផ្តើមសង្វាក់ផលិតកម្ម ចាប់ពីចុងឆ្នាំ២០២៦ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ