ស្លាប់យ៉ាងហោចពីរនាក់ ក្នុងហេតុការណ៍រលំលំនៅដ្ឋាននៅភាគខាងត្បូងបារាំង
ជាង៣០ម៉ោងក្រោយហេតុការណ៍ដួលរលំអាគារលំនៅដ្ឋាន កណ្តាលទីប្រជុំខេត្តមក ក្រុមអ្នកសង្គោះ ជាងមួយរយនាក់ កំពុងប្រញឹកកាយគាស់កម្ទេចថ្ម ដោយមានជំនួយពីសត្វឆ្កែ ក្រែងអាចរកឃើញអ្នករួចពីស្លាប់ផ្សេងទៀត។ ប្រតិបត្តិការសង្គ្រោះ លំបាកនិងស្មុគស្មាញខ្លាំង តែអភិបាលក្រុងម៉ាសី បានអះអាងនៅព្រឹកថ្ងៃចន្ទនេះ ដរាបណាក្តីសង្ឃឹមនៅមាន ប្រតិបត្តិការជួយជីវិតត្រូវតែបន្ត និងជាច្រើនថ្ងៃទៀត។
ចុះផ្សាយនៅថ្ងៃ៖
ស្តាប់ - ០១:៥៩
នៅយប់ថ្ងៃអាទិត្យឆ្លងមកថ្ងៃចន្ទនេះ ក្រុមអ្នកសង្គ្រោះបានកាយរកឃើញសាកសពមនុស្សពីរនាក់។ នេះបើតាមសេចក្តីថ្លែងការណ៍ខ្លីរបស់ស្ថាប័នសង្គ្រោះ ដោយលម្អិតថា ប្រតិបត្តិការរុករកជនបាត់ខ្លួនដែលបើតាមរដ្ឋអាជ្ញាមានចំនួន៨នាក់ នឹងបន្តធ្វើយ៉ាងប្រញឹក តែអាចប្រើពេលបន្តិច ព្រោះស្ថានភាពនៅស្មុគស្មាញនិងគ្រោះថ្នាក់ខ្លាំង។ សូម្បីតែមន្ត្រីពាក់ព័ន្ធនៃក្រសួងយុត្តិធម៌ ក៏មិនទាន់អាចចូលត្រួតពិនិត្យកន្លែងកើតដោយផ្ទាល់បានផង គិតត្រឹមរសៀលថ្ងៃអាទិត្យម្សិលមិញ។
ឧប្បត្តិហេតុបានកើតឡើង ជាដំបូង ដោយមានស្នូរផ្ទុះលាន់ចេញពីផ្ទះមួយនៃអគារលំនៅដ្ឋានដែលមានបួនជាន់នោះ ប៉ើងបែកខ្ទេច។ អគារពីរជាប់សងខាងនោះ រងការខូចខាតយ៉ាងខ្លាំង ដែលប៉ុន្មានម៉ោងក្រោយមក មានមួយបានដួលរំលំតាមក្រោយ ប៉ុន្តែជាសំណាងល្អ អ្នកស្នាក់នៅបានរត់ចេញមកក្រៅ និងខ្លះត្រូវបានក្រុមអ្នកសង្គ្រោះជួយជម្លៀសចេញ ទាន់ពេលវេលា។ ចំណែកអគារមួយទៀត ក៏កំពុងរករលំដែរ។
ជាសរុបមានមនុស្សជិតពីររយនាក់ ត្រូវជាជាច្រើនគ្រួសារ ត្រូវបានជម្លៀសចេញពីលំនៅដ្ឋានជាង៣០ដែលនៅជុំវិញអគារផ្ទុះរលំនោះ។
គេនៅពុំទាន់ដឹងអំពីមូលហេតុនៃការផ្ទុះឆេះផ្ទះនេះទេ។ ការអង្កេតទើបចាប់ផ្តើម តែបើតាមអាជ្ញាធរ គេសង្ស័យថាហ្កាសជាដើមហេតុមួយ ព្រោះបើតាមអ្នករស់នៅជិតនោះ ក្លិនហ្កាសនៅសាយភាយខ្លាំងមិនបាត់ផងមកទល់នឹងព្រឹកមិញនេះ។
ដំណឹងស្តីអំពីការផ្ទុះដួលរំលំលំនៅដ្ឋានថ្ងៃអាទិត្យ បានដាស់សតិអារម្មណ៍ប្រជាពលរដ្ឋក្នុងក្រុងម៉ាសី ភាគខាងត្បូងប្រទេសបារាំងនេះ នឹកឃើញហេតុការណ៍បាក់រលំលំនៅដ្ឋានពីរកន្លែង កាលពីឆ្នាំ២០១៨ ដែលជាលំនៅដ្ឋានកណ្តាលក្រុងតែរខេករខាក គ្មានសុវត្ថិភាព។ កាលណោះមានមនុស្ស៨នាក់បានបាត់បង់ជីវិត។ ចំណែកគ្រោះថ្នាក់លើកនេះ មានស្ថានភាពខុសគ្នាស្រលះ ផ្ទះរលំនោះជាសំណង់លំនៅដ្ឋានមាំទាំមានការថែទាំត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ